08 ޖޫން 2017 - 08:06
ފުރޮޅިލީގޮނޑީގައި އުޅޭ، އިންޑިއާގެ މުމްބާއީގެ ދެ ލޯބިވެރިއެއްގެ ވާހަކައަށް ސޯޝަލް މީޑިއާގައި ވަނީ ވަރަށް ބޮޑު ސަމާލުކަމެއް ލިބިފަ އެވެ. އެންމެ ފުރަތަމަ މި ދެ މީހުންގެ ވާހަކަ ގެނެސްދިނީ "ހިއުމަންސް އޮފް ބޮމްބޭ" ފޭސްބުކް ޕޭޖުންނެވެ. އޭގައި އެ މީހުންގެ ފޮޓޯއެއް ހިމަނާފައި ވިޔަސް ނަން ހާމަކޮށްފައެއް ނުވެ އެވެ.
މި މީހުން ފުރަތަމަ ބައްދަލުވީ މީގެ ނުވަ އަހަރު ކުރިން މެޑިކަލް ކޮންވެންޝަނަކުންނެވެ. އެންމެ ހައިރާންވާން ޖެހުނު ކަމަކީ ދެ މީހުން ވެސް ފުރޮޅުލީ ގޮނޑީގައި ތިބެން ޖެހިފައި ވަނީ ވަރަށް އެއްކަހަލަ ގޮތަކަށް ހިނގި ދެ އެކްސިޑެންޓަކުން މައިބަދައަށް ލިބުނު އަނިޔާއަކުން ކަމެވެ. މި ދެ މީހުން ތިބި ކާރު ވެސް އެކްސިޑެންޓްވީ ނިއު ބޮމްބޭގެ ހަމަ އެއް މަގެއްގަ އެވެ. އަދި ދެ މީހުން ދަތުރުކުރީ ހަމަ އެއް ކާރެއްގަ އެވެ. އެކަމަކު ދެ އެކްސިޑެންޓް ދެމެދުގައި ތިން އަހަރުވި އެވެ.
ކޮންވެންޝަނުން ބައްދަލުވުމުން ދެ މީހުން ވާހަކަ ދައްކަން ފެށުނު މައިގަނޑު ސަބަބަކީ އެ މީހުންގެ އެކްސިޑެންޓް ހިނގާފައިވާ ގޮތް އެއްގޮތް ވުމެވެ. އޭގެ ފަހުން މަޑުމަޑުން ދެ މީހުންގެ ގުޅުން ބަދަހިވާން ފެށި އެވެ. ރައްޓެހިންގެ ގްރޫޕްތަކާ އެކު ދެ މީހުން ފިލްމު ބަލާށާއި ކޮފީއަށް އެކުގައި ދާން ފެށި އެވެ. އަދި އަބަދު މެސެޖުގެ ޒަރިއްޔާއިން ދެ މީހުންނަށް ވާހަކަ ދެކެވެން ފެށުނެވެ.
މި ދެ މީހުންނަށް ވަކިނުވެވޭ ވަރަށް ލޯބި ވެވިފައިވާކަން އެނގުނީ އަންހެންމީހާ 20 ދުވަހުގެ ދަތުރެއްގައި ބޭރު ގައުމަކަށް ދިއުމުން ދެ މީހުންނަށް ވާހަކަ ދެއްކޭނެ ގޮތެއް ނުވި ހިސާބުންނެވެ. ބައެއް ފަހަރަށް އިންޓަނޭޝަނަލް ކޯލް ނަގައިގެން ވާހަކަ ދެއްކިޔަސް އަބަދު ވާހަކަ ނުދެއްކޭތީ ވަރަށް ދެރަވެގެން އުޅުނެވެ. އަންހެންމީހާ އެނބުރި އައުމަށް ފަހު ދެ މީހުން އެކަކު އަނެކަކު ދެކެ ލޯބިވާކަން ހާމަކޮށް ރައްޓެހިވި އެވެ. ނަމަވެސް ބައްދަލުކުރަން ތަންތަނަށް ދިއުމަކީ މި މީހުންނަށް ވަރަށް އުނދަގޫ ކަމަކަށްވި އެވެ. ފުރޮޅުލީ ގޮނޑީގައި ތިބެން ޖެހޭތީ އެހެން މީހުންގެ އެހީތެރިކަމާ އެކު ނޫނީ އެއްވެސް ތަނަކަށް ނުދެވެ އެވެ.
ނަމަވެސް ދިމާވި ހުރިހާ ގޮންޖެހުންތަކެއް ގިރާކޮށް ހަތް އަހަރު ވަންދެން މި ދެ މީހުން ރައްޓެހިވެގެން އުޅުނެވެ. އެންމެ ފުރަތަމަ ދުވަހުން ފެށިގެން ވެސް ދެ މީހުން ކައިވެންޏާ ދޭތެރޭ ވިސްނި ނަމަވެސް ދެ މީހުން ތިބި ހާލަތަށް ބަލާފައި އެކަކުވެސް ކައިވެނީގެ ވާހަކައެއް ނުދައްކަ އެވެ. ނަމަވެސް ކޮންމެ ގޮތެއް ވިޔަސް ހެޔޮކަމަށް ކައިވެނިކުރަން ނިންމި ހިސާބުން ދެން ކުރިމަތިވީ ދެ ފަރާތުގެ މައިންބަފައިންގެ ދެކޮޅު ހެދުމާ އެވެ.
އެމީހުންގެ ސުވާލަކީ ކައިވެނިކޮށްގެން އުޅޭނީ ކިހިނެއްތޯ އެވެ. ދެ މީހުން ކުރެ ކޮންމެވެސް އެކަކީ ކުޅެދޭ މީހަކަށް ވީ ނަމަވެސް އަނެކަކު ގޮވައިގެން އުޅެވުނީހެވެ. ނަމަވެސް ދެ މީހުން ވެސް ނުކުޅެދޭ މީހުންނަށް ވުމުން ދިރިއުޅޭނީ ކިހިނެއްތޯ އެމީހުންގެ މައިންބަފައިން ސުވާލު އުފެއްދި އެވެ.
ނަމަވެސް މިދިޔަ އަހަރުތަކުގައި އެ މީހުން ވަނީ އެކުގައި އުޅެވިދާނެކަން އެކަކު އަނެކަކަށް ސާބިތު ކޮށްދީފަ އެހެންކަމުން އާއިލާގެ މީހުން ނުރުހުނަސް ކައިވެނިކުރަން އެމީހުން ގަސްތު ކުރި އެވެ. އަދި އެއްވެސް މީހަކަށް އުނދަގޫނުކޮށް އެކަނި އުޅެވޭނެ ގޮތެއް ހޯދަން ވިސްނި އެވެ. އަދި ކައިވެނިކޮށްގެން އެކުގައި އުޅެމުން ދެން ދިމާވާ ހުރިހާ ކަމެއް ހައްލުކުރަން މަސައްކަތް ކުރަން ނިންމި އެވެ.
އެގޮތުން މިހާރު އެ ދެ މީހުން ދިރިއުޅެނީ އެކުގަ އެވެ. އެކަކު އަނެކަކަށް އެހީތެރިވަމުންނެވެ. އެމީހުން ގަބޫލުކުރާ ގޮތުގައި މިހާރު އެމީހުން ހޭދަކުރަމުން އަންނަނީ ހަޔާތުގެ އެންމެ އުފާވެރި ދުވަސްތަކެވެ.
އެ ދެ މީހުން ގަބޫލުކުރާ ގޮތުގައި ނުކުޅެދުންތެރިކަން ހުއްޓަސް ދެ މީހުން އެކުވުމުން ފުރިހަމަ އިންސާނަކަށް ވީ އެވެ.