30 މެއި 2017 - 07:46
އެޕަލް އަދި ނޮކިއާ އަކީ ވެސް ސްމާޓް އިލްކެޓްރޯނިކްސް އަށް ފަރިތަ ދެ ކުންފުންޏެވެ. މަސްރަހުގައި ބާރު ވެސް ގަދަ އެވެ. އެކަމަކު ދެ ކުންފުނި ދެމެދުގައި ވަނީ ކުނިޖެހިފަ އެވެ. މައްސަލަ ހައްލުކުރަން ގޮސް މިހާރު ތިބީ ކޯޓުގަ އެވެ.
ސިއްހީ ބޭނުންތައް ފަސޭހަކުރުމަށް ލުއި އިލެކްޓްރޯނިކްސް އުފެއްދުމަކީ އެޕަލުން ވެސް ކުރާ ކަމެކެވެ. މިއީ އެޕަލް އިން ފަހަކަށް އައިސް ވަރަށް ބޮޑު ސަމާލުކަމެއް ދޭ ދާއިރާއެކެވެ.
ބޭސްވެރިކަމުގެ ދާއިރާގައި ބޭނުންކުރެވޭ ސްމާޓް އާލާތްތަކަށް ބޭނުންވާ ޓެކްނޮލޮޖީ ނޮކިއާ އަތުގައި ބައިވަރެވެ. އެއިން ޓެކްނޮލޮޖީއެއް ހިމަނައިގެން އާލާތެއް އުފައްދާ ނަމަ، ނޮކިއާ އިން ލައިސަންސް ހޯދަން ޖެހެ އެވެ. އެޕަލް އާ ނޮކިއާ ކުނިޖެހުނު ހިސާބަކީ މި އެވެ.
ނޮކިއާގެ ފިކުރީ މުދަލުން އެޕަލް ވައްކަންކުރި ކަމަށް ބުނެ ކޯޓަށް މައްސަލަ ހުށަހެޅި ހިސާބުން، މަސްރަހު އެހެން ގޮތަކަށް ބަދަލުވެއްޖެ އެވެ. އެޕަލް ބޭނުންވަނީ ކޯޓުން ބޭރުގައި މައްސަލަ ހައްލުކޮށް، ދެ ކުންފުނިި ކޮނޑަށް އަތްލުމަށެވެ.
ނޮކިއާ ބުނީ ކޮނޑަށް ވެސް އަތްލެވިދާނެ ކަމަށެވެ. އެކަމަކު ވިޔަފާރި ފައިދާއިން ހިތްހަމަޖެހޭ ނަމަ އެވެ. އެއްބަސްވުމުގައި ދެން ހުރި ބައިތައް ވަނީ ސިއްރުކޮށްފަ އެވެ. އެކަމަކު ވެސް ދެ ކުންފުނި ގުޅިގެން މަސައްކަތްކުރާ ގޮތަށް ހަމަޖެހިއްޖެ އެވެ.
އެޕަލް އާއި ނޮކިއާ ގުޅިންގެން ސިއްހީ އިލެކްޓްރޯނިކްސް އުފައްދާނެ އެވެ. "ސްމާޓް ހޯމް" އިލެކްޓްރޯނިކް ވެސް އުފައްދާނެ އެވެ. ނޮކިއާގެ ޓެކްނޮލޮޖީ އެޕަލްގެ ޑިވައިސްތަކުގައި ހިމަނައި، އެޕަލް ސްޓޯރުތަކުގައި ވިއްކާނެ އެވެ. އެއްބަސްވެވޭ ގޮތަކަށް ފައިދާ ބަހާ ގޮތަށެވެ.