28 މެއި 2017 - 10:53
މެންޗެސްޓާ ޔުނައިޓެޑާ އެކު ކާމިޔާބު ސީޒަނެއް ނިންމާލުމަށް ފަހު ދުނިޔޭގެ އެންމެ އަގުބޮޑު ފުޓްބޯޅަ ކުޅުންތެރިއާ ފްރާންސުގެ ޕައުލް ޕޮގްބާ، ރޯދަމަހުގެ ފުރަތަމަ ދުވަހާ ދިމާކޮށް އިއްޔެ އުމްރާ ވުމަށް މައްކާ އަށް ހިނގައްޖެ އެވެ.
މިއަދު ހެނދުނު އޭނާ ވަނީ އިހުރާމް ހެދުމުގައި ގެފުޅު ކައިރީ ނަގާފައިވާ ވީޑިއޯއެއް އިންސްޓްގްރަމުގައި ޕޯސްޓްކޮށް ރޯދަމަހުގެ ތަހުނިޔާ ފޮނުވައިފަ އެވެ.
އޭގެ ކުރިން އިއްޔެ އޭނާ ވަނީ މެންޗެސްޓާގައި ހުންނަ އޭނާގެ ގޭގެ ދޮރުމަތީގައި ލަގެޖް ހިފައިގެން ހުރެ ނަގާފައިވާ ވީޑިއޯއެއް ޕޯސްޓްކޮށްފަ އެވެ. ކެޕްޝަނުގައި ޖަހާފައިވަނީ "މި ސީޒަނުގެ ކާމިޔާބަށް ޝުކުރުއަދާކުރަން ދިއުމުގެ މަގުމަތީގައި" ކަމަށެވެ.
އާއްމުކޮށް ކޮންމެ މެޗަކަށް ތަފާތު ގޮތަކަށް އިސްތަށިގަނޑަށް ބަދަލު ގެންނަ ޕޮގްބާ މައްކާގައި ނަގާފައިވާ ވީޑިއޯގައި ހުރީ އާދައިގެ ގޮތަކަށް ބޯކޮށައި ކަޅުކުލަ ޖައްސައިފަ އެވެ.
ޔުވެންޓަސް އިން މި ސީޒަނުގައި 105 މިލިއަން ޔޫރޯ ނުވަތަ ގާތްގަނޑަކަށް 18 ބިލިއަން ރުފިޔާ އަށް ޔުނައިޓެޑަށް ބަދަލުވި ޕޮގްބާ ވަނީ އެ ޓީމާ އެކު ޗެރިޓީ ޝީލްޑާއި ލީގު ކަޕް އަދި ޔުރޮޕާ ލީގު ކާމިޔާބުކޮށްފަ އެވެ. މިދިޔަ ބުދަ ދުވަހުގެރޭ ނެދަލެންޑްސްގެ އަޔަކްސް އަތުން 2-0 އިން ޔުނައިޓެޑް މޮޅުވެ ޔުރޮޕާ ލީގު ކާމިޔާބުކުރިއިރު ޕޮގްބާ ވަނީ ލަނޑު ޖަހައިފަ އެވެ.
ގިނީގެ ދެމަފިރިއަކަށް ފްރާންސުގައި 1993 ވަނަ އަހަރު އުފަންވި ޕޮގްބާ އަންނަނީ 2013 ވަނަ އަހަރުން ފެށިގެން ފްރާންސް ގައުމީ ޓީމަށް ކުޅެމުންނެވެ. އުމްރާ އަށް ފަހު ދެން އޭނާ ގުޅޭނީ އަންނަ މަހުގެ ފްރާންސް ކުޅޭ ތިން މެޗަކަށް ތައްޔާރުވުމަށް ފްރާންސުގެ ކޭމްޕާ އެވެ.