26 މެއި 2017 - 17:57
ކޮލަމްބޯ (މެއި 26) - ލަންކާ އަށް މިހާރު ކުރަމުންދާ ބޯ ވިއްސާރައިގައި ކޮލަމްބޯގެ ދެކުނުން އޮންނަ ކަލުތަރަ ޑިސްޓްރިކްޓުގައި ފެންބޮޑުވެ، ބިންގަނޑު ފޭބުމުގެ ސަބަބުން 25 މީހުން މަރުވެއްޖެ އެވެ.
މެދުނުކެނޑި ތިން ދުވަސްވަން ދެން ވެހުނު ވާރޭގެ ސަބަބުން ލިބުނު ގެއްލުންތަކުގައި މިލިއަނެއްހާ މީހުން ހާލުގައި ޖެހިފައިވާ ކަމަށް ޑިޒާސްޓާ މެނޭޖްމަންޓް ސެންޓަރުން ބުންޏެވެ. ކަލުތަރަ ޑިސްޓްރިކްޓުގެ ސެކްރެޓަރީ ވިދާޅުވީ މަގުތަކުގައި ފެންބޮޑުވުމުގެ ސަބަބުން ހާލުގައި ޖެހިފައިވާ މީހުންނަށް އެހީ ފޯރުވުމަށް ވެސް ދަތިވެފައިވާ ކަމަށެވެ.
ނޭޝަނަލް ބިލްޑިން ރިސާޗް އޮގަނައިޒޭޝަން (އެންބީއާރުއޯ) އިން މިހާރު ވަނީ ގޯލް، ކިގާލީ، ރަތުނަޕޫރާ، މާތަރާ އަދި ހަމްބަންޓޯޓާ ފަދަ ޑިސްޓްރިކްޓްތަކުން ވެސް ބިންގަނޑު ފައިބައިފާނެ ކަމަށް ބުނެ އާއްމުން ސަމާލުވެ ތިބުމަށް އިލްތިމާސްކޮށްފަ އެވެ.
އިރިގޭޗޝަން ޑިޕާޓްމަންޓުން ވަނީ ކަލޫ ގަންގާ، ގިން ގަންގާ އަދި ނިލްވާލާ ގަންގާ ކޯރު ބަންޑުން ވެދާނެކަމުގެ އިންޒާރު ދީފަ އެވެ. ޑިޒާސްޓާ މެނޭޖްމަންޓް ސެންޓަރުން ވެސް ވަނީ އިތުރު ހިސާބުތަކުގައި ފެންބޮޑުވެދާނެތީ ރައްކާތެރިވެ ތިބުމަށް އިލްތިމާސްކޮށްފަ އެވެ. ހޮނު އަޅާ އިރު ރައްތެރިވުމަށާއި ގަދަ ވައިގައި ގަސްތައް ވެސް ވެއްޓިދާނެތީ ސަމާލުވުމަށް ވެސް ވަނީ އަންގައިފަ އެވެ.
ހޯމް މިނިސްޓަރު ވަޖީރާ އަބޭވަރްދަނާ ވިދާޅުވީ ގައުމުގެ ހުރިހާ ހިސާބެއްގައި ވެސް ފެންބޮޑުވެފައިވާ ކަމަށާއި މަރުވި މީހުންގެ އިތުރުން ބައެއް މީހުން ގެއްލިފައިވާ ކަމަށެވެ.
މިދިޔަ އަހަރު މެއި މަހު ލަންކާ އަށް ކުރި ވިއްސާރައިގައި މެދުތެރޭގެ ހިސާބުތަކުން ވަނީ 100 އަށް ވުރެ ގިނަ މީހުން މަރުވެފަ އެވެ.