26 މެއި 2017 - 07:11
ކަރަން ޖޯހަރްގެ "އޭ ދިލް ހެ މުޝްކިލް" ގައި އައިޝްވަރިޔާ ރާއީ އަދާ ކުރި ރޯލަށް ގިނަ ބައެއްގެ ތައުރީފު އޮހުނެވެ. ފިލްމު ބެލި މީހުން އައިޝްވަރިޔާ އެ ފިލްމުގައި ދައްކައިދިން އެކްޓިން އަށް ވަރަށް ތާއީދުކޮށް އަލުން އޭނާ ފިލްމަކުން ފެންނާނެ ދުވަހަކަށް އިންތިޒާރު ކުރަމުން ދިޔަ އެވެ.
އައިޝްވަރިޔާ ކުޅެން ސޮއި ކުރި ފިލްމާ ބެހޭ ގޮތުން މާ ބޮޑު މައުލޫމާތެއް ނުލިބުނަސް އޭނާ އާއި ގާތް މީހަކު އިންޑިއާގެ ނޫސްތަކަށް ބުނެފައި ވަނީ ޑައިރެކްޓަރު މަނީ ރަތުނަމް އަލަށް ފަށާ ރޮމެންޓިކް ޑްރާމާ ކުޅެން އައިޝްވަރިޔާ ސޮއިކޮށްފައިވާ ކަމަށެވެ.
މި ޚަބަރަކީ ތެދެއް ނަމަ މި ފިލްމު ވާނީ މަނީ ރަތުނަމްއާ އެކު އައިޝްވަރިޔާ ކުޅޭ ހަތަރު ވަނަ ފިލްމަށެވެ. މީގެ ކުރިން އޭނާ ވަނީ މަނީ ރަތުނަމް އުފެއްދި ތަމަޅަ ފިލްމު "އިރުވަރު"ގެ އިތުރުން "ގުރޫ" އާއި "ރާވަން" ކުޅެފަ އެވެ.
ދާދިފަހުން ކޭންސް ފިލްމު ފެސްޓިވަލަށް ގޮސް ހުރެ ނޫސްވެރިންނާ ވާހަކަ ދައްކަމުން އައިޝްވަރިޔާ ބުނީ އޭނާ ފަސް ވަރަކަށް މަސް ދުވަހަކަށް ޗުއްޓީއެއް ނަގައިގެން ހުރެފައި މިހާރު މަސައްކަތް އަލުން ފަށާފައިވާ ކަމަށެވެ. އައިޝްވަރިޔާ މި ބުނި ޗުއްޓީ އަކީ އޭނާ ބައްޕަ ބަލިވެގެން ފިލްމީ މަސައްކަތާ ދުރުގައި އުޅުނު ދުވަސްތަކުގެ ވާހަކަ ކަމަށް ބެލެވެ އެވެ. ޖެނުއަރީ މަހުން ފެށިގެން ވަރަށް ބަލިވެ އުޅުމަށްފަހު އައިޝްވަރިޔާގެ ބައްޕަ ވަނީ ދާދިފަހުން މަރުވެފަ އެވެ.
ކުޅެން ނިންމާފައިވާ ފިލްމުތަކާ ބެހޭ ގޮތުން ވާހަކަ ދައްކަމުން އޭނާ ބުނީ ދެ ޕްރޮޖެކްޓެއް އޭނާއަށް މިހާރުވެސް ކަމުގޮސް އެ ދެ ފިލްމު ކުޅެން އެއްބަސްވެފައިވާ ކަމަށެވެ. ނަމަވެސް އެ ފިލްމުތަކާ ބެހޭ މައުލޫމާތު އަދި ހާމަކުރެވެން ނެތް ކަމަށް އޭނާ އޭރު އޮތީ ބުނެފަ އެވެ.