18 މެއި 2017 - 11:22
ބޮލީވުޑްގެ މަޝްހޫރު ދެ ތަރިން ކަމަށްވާ އަޖޭ ދޭވްގަން އާއި އަންހެނުން ކާޖޮލް ފަހަކަށް އައިސް އުޅެނީ އެމީހުން ކުޅޭ ފިލްމުތަކުގެ މަސައްކަތުގައި ވަރަށް ބުރަކޮށެވެ. އެހެންވެ ވަރުބަލި ފިލުވާލައި އާއިލާއާ އެކު ޗުއްޓީ ހޭދަކޮށްލުމަށް މި ދެމަފިރިން އާއިލާގެ ބައެއް މެމްބަރުންނާ އެކު ވަރަށް އަވަހަށް ރާއްޖެ ޒިޔާރަތްކުރަން ހަމަޖެހިފައިވާ ކަމަށް ޓައިމްސް އޮފް އިންޑިޔާ އިން ބުނެފި އެވެ.
ނޫހަށް މައުލޫމާތު ދިން މީހަކު ބުނެފައިވަނީ އާ އަހަރު ފާހަގަކުރުމަށް އަޖޭ އޭނާގެ އާއިލާ ގޮވައިގެން ލަންޑަނަށް ދިޔަ ފަހުން އޭނާއަށް އުޅެން ޖެހިފައި ވަނީ "ބާދްޝާހޯ" އާއި "ގޯލްމާލް އެގެއިން"ގެ ޝޫޓިންގައި ވަރަށް ބުރަކޮށެވެ. ނަމަވެސް "ގޯލްމާލް އެގެއިން"ގެ ޑައިރެކްޓަރު ރޯހިތު ޝެޓީ އޭނާ ހޯސްޓްކުރާ ރިއަލިޓީ ޝޯ "ޚަތުރޯންކީ ކިލާޅީ"ގެ ޝޫޓިންއަށް ސްޕެއިނަށް ފުރާތީ އަޖޭ އަށް ކުޑަ ދުވަސްކޮޅެއް ހުހަށް ލިބޭ ގޮތް ވަނީ ވެފަ އެވެ. އެހެންވެ އެ ދުވަސްކޮޅު އާއިލާއާ އެކު ހޭދަކޮށްލުމުގެ ބޭނުމުގައި އަޖޭ ރާއްޖެއަށް ދަތުރެއް ކުރަން ނިންމީ ކަމަށްވެ އެވެ. މި ވަގުތަކީ ކާޖޮލް ވެސް ކުޅެމުން ދިޔަ "ވީއައިޕީ 2" ކިޔާ ތަމަޅަ ފިލްމު ނިމި އޭނާ ވެސް މުޅިން ހުހަށް ހުރި ދުވަސްވަރަކަށް ވުމުން ދެ މީހުންނަށް ވެސް ޗުއްޓީ ނަގަން ވަނީ ފަސޭހަ ވެފަ އެވެ.
ރިޕޯޓްތައް ބުނާ ގޮތުގައި އަޖޭ އާއި އާއިލާ ރާއްޖެ އަންނާނީ މޭ 28 ވަނަ ދުވަހު އެވެ. އަދި ރާއްޖޭގައި 10-12 ދުވަސް ހޭދަކުރާނެ ކަމަށްވެ އެވެ. މި ދަތުރުގައި އަޖޭ އާއި ކާޖޮލްގެ އިތުރުން އެމީހުންގެ ދެ ދަރިން ކަމަށްވާ ނައިސާ އާއި ޔުގް އަދި އަޖޭގެ ދެ ކޮއްކޮއެއް ބައިވެރިވާނެ އެވެ.
އިންޑިޔާގެ ފިލްމީ ތަރިންގެ އެންމެ މަގުބޫލު އެއް މަންޒިލަށް މިހާރު ރާއްޖެ ވަނީ ވެފަ އެވެ. ދާދިފަހުން ސަލްމާން ޚާނާއި އޭނާގެ އާއިލާގެ ގިނަ ބަޔަކު ރާއްޖޭގައި ޗުއްޓީ ހޭދަ ކޮށްފައިވެ އެވެ. އަދި ބޮލީވުޑް މަޝްހޫރު ޑައިރެކްޓަރު ފަރަހަ ޚާން ވެސް ވަނީ އާއިލާ ގޮވައިގެން ރާއްޖެ އައިސްފަ އެވެ. އޭގެ ކުރިން އާލިއާ ބަޓް ވެސް އޭނާގެ މަންމަ އާއި ބައްޕަ އަދި ދައްތައާ އެކު ރާއްޖޭގައި ޗުއްޓީ ހޭދަކުރި އެވެ.