17 މެއި 2017 - 07:36
ޑިސެމްބަރު 25 ވަނަ ދުވަހު ބަންގްލަދޭޝްގައި ފަށަން ތާވަލްކޮށްފައިވާ ސާފް ޗެމްޕިއަންޝިޕް ފުޓްބޯޅަ މުބާރާތް ފަސްކުރަން އިންޑިއާ އިން އެދިއްޖެ އެވެ.
ސައުތު އޭޝިއަން ފުޓްބޯލް ފެޑެރޭޝަން (ސާފް) ގެ ސެކްރެޓަރީ ޖެނެރަލް އަންވަރުލް ހައްގާ ހަވާލާދީ އިންޑޯ އޭޝިއަން ނިއުސް ސާވިސް (އައިއޭއެންއެސް) އިން ބުނެފައިވާ ގޮތުގައި އިންޑިއާ އިން މުބާރާތް ފަސްކުރަން އެދުނީ، އިންޑިއަން ސުޕަ ލީގާ ދިމާވާތީ އެވެ.
ކުރިން ރާވާފައިވާ ގޮތުން ސުޕަ ލީގުގެ ކުޅުން އެހާތަނަށް ނިމޭނެ އެވެ. އެކަމަކު އޮގަސްޓް މަހު އިންޑިއާގައި 17 އަހަރުން ދަށުގެ ފީފާ ވޯލްޑް ކަޕް ބާއްވާތީ، ސުޕަ ލީގު ފަސްކުރުމުން، ސާފް ޗެމްޕިއަންޝިޕާ ފުށުއަރާގޮތްވީ އެވެ. މީގެ އިތުރުން ސުޕަ ލީގާއި އައި-ލީގު އެއްކޮށްލުމުގެ ވިސްނުމެއް ގެންއުޅޭތީ ސުޕަ ލީގު އިތުރަށް ދިގުލައިގެން ދިއުމުގެ ފުރުސަތު އެބައޮތެވެ.
"މުބާރާތް (ސާފް ޗެމްޕިއަންޝިޕް) ޑިސެމްބަރު 25 ގައި ފަށައި ޖެނުއަރީ 5 ނުވަތަ 6 ގައި ނިންމާލާ ގޮތަށް އޮތީ. އިންޑިއާ އިން ބޭނުންވަނީ މޭ މަހަށް މުބާރާތް ފަސްކުރަން. އިންޑިއާ އިން ބުނަނީ (17 އަހަރުން ދަށުގެ) ވޯލްޑް ކަޕާ ގުޅިގެން ޝެޑިއުލަށް ބަދަލު ގެންނަން ޖެހުނީ ކަމަށް،" އަންވަރުލް ހައްގު ވިދާޅުވި އެވެ.
އޭނާ ވިދާޅުވީ މުބާރާތް ފަސްކުރުމަށް ސްޕޮންސަރުން އެއްބަސްތޯ ނުވަތަ ނޫންތޯ ބެލުމަށް އެ ފަރާތްތަކާ ވާހަކަދައްކާނެ ކަމަށެވެ.
މުބާރާތް މިހާތަނަށް ބާއްވާ ތާރީހު ކަނޑައެޅުމުގައި އިންޑިއާގެ ދައުރު ވަރަށް ބޮޑެވެ. އަދި ސްޕޮންސަރުންގެ އެދުމާ އެކު މުބާރާތް ކޮންމެ ދެ ފަހަރަކު އެއް ފަހަރު ބާއްވަނީ ވެސް، މިހާތަނަށް ބޭއްވި ނުވަ މުބާރާތުގެ ތެރެއިން ހަ މުބާރާތް ކާމިޔާބުކޮށްފައިވާ އިންޑިއާގަ އެވެ. އެހެންކަމުން އިންޑިއާ އަށް ބައިވެރިނުވެވޭ ގޮތަކަށް މުބާރާތް ބޭއްވުމުގެ ފުރުސަތު ކުޑަ އެވެ.
އިންޑިއާ އިން މުބާރާތް ފަސްކޮށްދޭން އެދުނުއިރު ބެލެވިފައި އޮތީ އިންޑިއާ މުބާރާތަށް ފޮނުވާނީ 23 އަހަރުން ދަށުގެ ޓީމު ކަމަށެވެ. އެކަމަކު އެކަމާ ބެހޭގޮތުން އިންޑިއާ އިން އަދި ރަސްމީކޮށް އެއްޗެއް ނުބުނެ އެވެ.
މީގެ 20 އަހަރު ކުރިން 1997 ވަނަ އަހަރު ބާއްވަން ފެށި ސާފް ޗެމްޕިއަންޝިޕް 2008 ވަނަ އަހަރުން ފެށިގެން އަންނަނީ ކަނޑައަޅާ ތާރީހަށް އާއްމުކޮށް ބާއްވަމުންނެވެ.