09 މެއި 2017 - 14:37
ވޭތުވެ ދިޔަ ހަ އަހަރުގެ ތެރޭގައި މަހަކު އެއް ފަހަރު ގޮތަކަށް ސަންދިޔާ އެކްނަލިގޮޑާ، ސްރީލަންކާގެ ކޯޓުތަކަށް ދެ އެވެ. ފިރިމީހާ ހޯދުމަށް، ކޯޓުތަކުން ފެށިގެން ޖެނީވާގައި ހުންނަ އދ.ގެ ހިއުމަން ރައިޓްސް ކައުންސިލަށް ވެސް އޭނާ ހިނގައްޖެ އެވެ. ލަންކާގެ ނޫހެއްގައި މަސައްކަތް ކުރާ ކާޓޫނިސްޓް އަދި ނޫސްވެރިޔާ ޕްރަގީތު އެކްނަލިގޮޑާ މީގެ ހަ އަހަރު ކުރިން ގެއްލުނު ފަހުން، އެންމެ ދުވަހެއް ވެސް ވައްޓާ ނުލައި އޭނާ އަންނަނީ ފިރިމީހާ ހޯދުމަށް އަތްފުނާ އަޅަމުންނެވެ.
އެކަމަކު އިއްޔެ ސަންދިޔާ ފެނުނީ، ރަހުމު ކުޑަގޮތަކަށް މަރާލި ދިވެހި ބްލޮގާ ޔާމީން ރަޝީދުގެ ހަނދާނުގައި އަދި އޭނާ އަށް އިންސާފު ހޯދައިދިނުމަށް ގޮވާލައި ލަންކާގައި ބޭއްވި މުޒާހަރާއެއްގައި އަޑު އުފުލަނިކޮށެވެ.
ސަންދިޔާ ދެކޭގޮތުގައި ފިރިމީހާ ހޯދުމަށް އޭނާ ކުރަމުން އަންނަ މަސައްކަތަކީ ވަގަށް ނަގާފައިވާ ދިވެހި ނޫސްވެރިޔާ އަހުމަދު ރިލްވާން ހޯދުމަށް ޔާމީން ކުރި މަސައްކަތެވެ. ޔާމީން މަސައްކަތް ކުރީ ހައްގާއި އިންސާފު ހޯދުމަށެވެ. އެހެންވެ، އެންމެ ގާތް އެކުވެރިޔާ ވީނުވީއެއް ނޭނގި ގެއްލުމުން ޔާމީން ކުރާނެ އިހުސާސް އެންމެ ރަނގަޅަށް ވަޒަން ކުރެވޭނެ އެކަކަށް ސަންދިޔާ ވާނެ އެވެ.
އުމުރުން 50 އަހަރުގެ ސަންދިޔާގެ ފިރިމީހާ ގެއްލުނީ 2010 ވަނަ އަހަރު ޖެނުއަރީ މަހު އައި، ގޮތްނޭނގޭ ފޯނު ކޯލަކާއި އެއާ ގުޅިގެން ބޭއްވި ގޮތް ނޭނގޭ ބައްދަލުވުމަކަށް ފަހު އެވެ. އާއިލާއިންނާއި ވަކީލުން ގަބޫލު ކުރާ ގޮތުގައި ނޫސްވެރިޔާ ވަގަށް ނެގީ، ލަންކާގެ އޭރުގެ ރިޔާސީ އިންތިހާބުގައި ވާދަކުރި އިދިކޮޅު ކެންޑިޑޭޓު ސަރަތު ފޮންސެކާއަށް ކެމްޕޭނު ކުރުމަށް އޭނާ ހިންގި ހަރަކާތްތަކާ ހެދި އެވެ.
އޭރު އޭނާ ދިޔައީ ރާޖަޕަކްސާގެ ސަރުކާރުގައި އާއިލީ ގުޅުން ހުންނަ މީހުންނަށް މަގާމުތައް ދިނުމާ ގުޅޭގޮތުން ފޮތެއް ތައްޔާރުކުރުމުގެ މަސައްކަތް ކުރަމުންނެވެ. އެ ފޮތާއި އެކަމާ ގުޅޭގޮތުން ކުރަހާފައި ހުރި އެހެން ކާޓޫނުތަކެއް ރައްކާކޮށްފައި ހުރި ޔޫއެސްބީ ޑްރައިވްއެއް އޭރު ވަނީ ގެއްލިފަ އެވެ.
މީހުން ވަގަށް ނެގުމާއި ގެއްލުމަކީ ލަންކާގައި އާ ކަމަކަށް ނުވިޔަސް މި ވާހަކަ ހާއްސަ ވަނީ އެ ނޫސްވެރިޔާ ހޯދުމަށް އޭނާގެ އަނބިމީހާ ކުރަމުން އަންނަ މަސައްކަތުގެ ސަބަބުންނެވެ. ހަ އަހަރު ދުވަހުގެ މަސައްކަތުން ވެސް ފިރިމީހާގެ ހިލަމެއް ވެފައި ނުވި ނަމަވެސް، އޭނާ މިހާރު ވެފައިވަނީ މި ފަދަ ހައްގުތަކަށް މަސައްކަތް ކުރާ މީހުންގެ ހިތްވަރަކަށެވެ.
"އަހަރެން މިތާ މިހުރީ، ގެއްލިފައިވާ ނޫސްވެރިއެއްގެ އަތްބެއްގެ ހައިސިއްޔަތުން، އެ ފަދަ ގޮތަކަށް މީހަކު ގެއްލުނީމައި އަޅާނެ ވޭނާއި ހިތާމަ އެނގޭތީ،" ޔާމީންގެ ބައެއް އެކުވެރިންނާއި ސްރީލަންކާގެ ނޫސްވެރިންނާއި އެކްޓިވިސްޓުން އިސްނަގައިގެން ބޭއްވި މުޒާހަރާގައި ވާހަކަ ދައްކަމުން ސަންދިޔާ ބުންޏެވެ.
އޭނާގެ ފިރިމީހާ "ގެއްލުވާލި" ބަޔަކު އަދިވެސް ނުހޯދެ އެވެ. އެކަމަކު ސަންދިޔާ ބުނިގޮތުގައި ދިވެހި ނޫސްވެރިޔާ މަރާލި މީހުން ފުލުހުން ހޯދައި، އެކަން ކުރި ބަޔަކު ވީއެންމެ އަވަހަކަށް އިންސާފުގެ ކުރިމައްޗަށް ގެންނަން ޖެހޭނެ އެވެ. އިއްޔެގެ މުޒާހަރާގައި އޭނާ އެންމެ ބޮޑަށް އަޑުއުފުލީ ވެސް އެކަމަށެވެ.
"ދެން ދުނިޔޭގައި ތިބި ބަޔަކަށް ޔާމީން މަރާލި މީހުން އެނގެން ޖެހޭ. އޭނާ މަރާލި ސަބަބު އެނގެން ޖެހޭ،" ސަންދިޔާ ބުންޏެވެ.
އެހެން ނޫހަކަށް ސަންދިޔާ ދިން އިންޓަވިއުއެއްގައި ބުނިގޮތުގައި އޭނާ އެކްޓިވިސްޓަކަށް ވީ ފިރިމީހާ ހޯދުމަށް ކުރި މަސައްކަތުގެ ސަބަބުން ނަމަވެސް، މިހާރު އޭނާ މަސައްކަތް ކުރަމުން އަންނަނީ ހަމައެކަނި ފިރިމީހާ އެކަންޏަކަށް ނޫނެވެ. އެކަމަކު ގެއްލިފައިވާ އެ ފަދަ އެންމެންގެ ހައްގުގައި މަސައްކަތް ކުރާނެ ކަމަށް ބުންޏެވެ.
ސަންދިޔާ ބުނީ ފިރިމީހާ ކުރަމުން ދިޔައީ ނުރައްކާތެރި މަސައްކަތެއްކަން އެނގޭ ކަމަށާއި އެކަމަކު އެކަން އޭނާ ނުހުއްޓުވީ ސްރީލަންކާ އަށް އަމާން ކަމާއި އިންސާފު ބޭނުންވާކަން އެނގޭތީ ކަމަށެވެ. އެހެންވެ، ހައްގާއި އިންސާފަށްޓަކައި ފިރިމީހާ ކުރަމުން ދިޔަ މަސައްކަތް އޭރު އޭނާއަށް ނުހުއްޓުވުނީތީ މިއަދު އޭނާ ހިތާމައެއް ނުކުރެ އެވެ.
އެކަމަކު ސަންދިޔާ ބުނިގޮތުގައި ފިރިމީހާ އަށް ވީގޮތް ނުހޯދައި، ކިތަންމެ ގިނަ ދުވަހެއް ވިޔަސް އޭނާގެ މަސައްކަތެއް ހުއްޓައެއް ނުލާނެ އެވެ. އޭނާގެ މި ހިތްވަރު ފާހަގަކޮށް، އެމެރިކާގެ ސަރުކާރުން މިއަހަރު އޭނާއަށް ވަނީ ހާއްސަ އެވޯޑެއް ވެސް ދީފަ އެވެ.
"ތެދު ހާމަކުރުމަކީ ކުށެއް ނޫން. ކުށަކީ ޖަރީމާތައް ހިންގާ މީހުން ހިމާޔަތް ކުރުން،" ސަންދިޔާ އޭނާގެ މަސައްކަތާ ގުޅޭގޮތުން ބުނެފައި ވެ އެވެ.