03 މެއި 2017 - 11:30
ބާސެލޯނާ (މެއި 3) - ހާލުގައިޖެހިިފައިވާ ސީރިއާ ކުދިންނަށް ބާސެލޯނާގެ ތަރި ލިއޮނަލް މެސީގެ ފަރާތުން 20 ކްލާސްރޫމް ހަދިޔާކޮށްފި އެވެ.
ލިއޮނަލް މެސީ ފައުންޑޭޝަން މެދުވެރިކޮށް މެސީ ސީރިއާ ކުދިންނަށް ހަދިޔާ ކޮށްފައިވަނީ 1600 ކުދިންނަށް ކިޔެވޭ ގޮތަށް 20 ކްލާސްރޫމް ހެދުމަށް ބޭނުންވާ ފަންޑެވެ. ރިޕޯޓްތައް ބުނާގޮތުން މެސީ ފައުންޑޭޝަނުން ވަނީ ފާއިތުވި އަހަރެއްހާ ދުވަހުގެ ތެރޭގައި ޗެރިޓީގެ ގޮތުގައި 10 މިލިއަން ޔޫރޯ ހަރަދުކޮށްފަ އެވެ.
ހަނގުރާމައިގެ ސަބަބުން ސުންނާފަތި ވަމުން އަންނަ ސީރިއާގެ ކުޑަކުދިންނަށް މެސީ ވަނީ މީގެ ކުރިން ވެސް އެކި ގޮތްގޮތުން އެހީތެރިކަން ފޯރުކޮށްދީފަ އެވެ.
އުމުރުން 29 އަހަރުގެ މެސީ އަކީ 2010 ވަަނަ އަހަރުން ފެށިގެން ޔުނިސެފްގެ ގުޑްވިލް ސެމްބަސަޑަރެކެވެ. ޔުނިސެފުން ދުނިޔޭގެ އެކި ގައުމުތަކުގައި ހިންގާ ކެމްޕެއިންތަކުގައި މެސީ އަންނަނީ ބައިވެރިވަމުންނެވެ.
މެސީ ފައުންޑޭޝަން ވުޖޫދަށް އައީ 2007 ވަނަ އަހަރު އެވެ. ބާސެލޯނާގެ އެހީތެރިކަމާ އެކު ފެށި މި ފައުންޑޭޝަންގެ އަމާޒަކީ ކުޑަކުދިންނަށް ހަމަހަމަ ކަމާ އެކު އެއް ފެންވަރެއްގެ ވަސީލަތްތަކެއް އެކި ގޮތްގޮތުން ފޯރުކޮށްދިނުމެވެ.
އެގޮތުން މެސީ ފައުންޑޭޝަނުން ވަނީ މީގެ ކުރިން އާޖެންޓީނާގެ ކުޑަކުދިން ޓާފް ދަނޑުގެ އިތުރުން ސްކޫލެއް ވެސް އަޅައިފަ އެވެ. އަދި އެފްރިކާގެ ބައެއް ގައުމުތަކަށް އަހަރެއްގެ ތެރޭގައި މެސީ ފައުންޑޭޝަން މެދުވެރިކޮށް ކުޑަކުދިންނަށް ބޭނުންވާ ގިނަ ބޭސްތަކެއް ފޯރުކޮށްދޭ ކަމަށް ރިޕޯޓްތައް ބުނެ އެވެ.