03 މެއި 2017 - 06:05
ފުރޮޅީގޮނޑިއެއްގައި އިންނަން ޖެހިފައިވާ، ނުކުޅެންދުންތެރިކަން ހުންނަ މީހަކަށް އޭނާއަށް ހަގީގީ ލޯބި ލިބިދާނެ ކަމަކަށް އުންމީދު ކުރުމަކީ އާންމު ކަމެއް ނޫނެވެ. އަދި އޭނާ ހުވަފެނުން ވެސް ނުދެކޭހާ ރީތި އަންހެނަކާ ކައިވެނި ކުރެވިދާނެ ކަމަކަށް ގަބޫލެއް ނުކުރެވޭނެ އެވެ. ނަމަވެސް ގްރިގޯރީ ޕުރުޓޯވް އަށް ވަނީ މި ހުވަފެން ސީދާ ވެފަ އެވެ.
ރަޝިއާގެ ލަޑިވޮސްޓޮކްގައި ދިރިއުޅޭ ގްރިގޯރީ އާއި އަނާގެ ހަގީގީ ލޯބީގެ ވާހަކަ އަކީ މިއީ މީގެ ހަތަރު ވަރަކަށް އަހަރު ކުރީގެ ހާދިސާއެއް ނަމަވެސް މިއަދާ ހަމައަށް ވެސް ވަރަށް އުފަލުން އެކުގައި އުޅެމުން އަންނަ މި މީހުންގެ ވާހަކަ އަކީ ނަމޫނާއެކެވެ.
ގްރިގޮރީ އުފަންވި އިރު އާދައިގެ އެހެން ކުދިންނެކޭ ތަފާތެއް ނެތެވެ. ނަމަވެސް ހިނގޭ އުމުރަށް ދިޔައިރު ވެސް ހިނގާބިނގާވެ ނޫޅެވޭތީ ކޮންމެވެސް މައްސަލައެއް ދިމާވެފައިވާކަމަށް ގްރެގޮރީގެ މައިންބަފައިންނަށް ޝައްކުވި އެވެ. އޭނާއަށް މަސްކިއުލާ އެޓްރޮފީ ކިޔާ ބައްޔެއް ޖެހިފައިވާކަން ފަހުން އެނގުނެވެ. މި ބަލީގެ ސަބަބުން އޭނާގެ މައިބަދައިގެ މަސްތައް ހަލާކުވެ އަދި ފައިގެ މަސްތައް ވެސް ވަނީ ނެތިގެން ގޮސްފަ އެވެ.
އޭނާ ބަލަން އާއިލާގެ ކޮންމެވެސް މީހަކު އަބަދު ހުންނަން ޖެހުނެވެ. އަދި ޑޮކްޓަރުން ބުނީ ހަތަރު ފަސް އަހަރަށް ވުރެ ގިނަ ދުވަހު ދުނިޔޭގައި ވެސް ނުހުންނާނެ ކަމަށެވެ.
މިއީ އާއިލީ ގޮތުން ވާރުތަވާ ބައްޔެއް ނަމަވެސް ދެ ފަރާތުގެ އާއިލާގެ އިތުރު އެއްވެސް މީހަކަށް މި ބަލި ޖެހިފައެއް ނެތެވެ. މިިއީ ގްރިގޯރީގެ މަންމަ އާއި ބައްޕަގެ ޖީންގައި ހުރި މައްސަލަ ތަކެކެވެ. މި މައްސަލައިގެ އަސަރު ކުރާނީ އެމީހުންނަށް ލިބޭ ފިރިހެން ދަރިންނަށް އެކަނިކަން ފަހުން ޑޮކްޓަރުން ހާމަކުރި އެވެ.
ދުނިޔޭގައި ގިނަ ދުވަހު ހުންނާނެ ކަމުގެ އުންމީދު ޑޮކްޓަރުންނަށް ނެތަސް ގްރެގޮރީ ބޮޑުވެ ޒުވާނަކަށްވި އެވެ. ނަމަވެސް އޭނާއަކީ އަތުންފައިން އެއްވެސް ކަމެއް ނުކުރެވޭ މީހަކަށް ވާތީ ބޮޑުވިއިރު އޭނާ ވަނީ ދުނިޔެ ދެކެ ވަރަށް ބޮޑަށް ފޫހިވެފަ އެވެ. އެކަމަކު އެ މާޔޫސްކަމުން ދުރުވެ، ގޭގައި އިނދެގެން އެކުވެރިން ހޯދުމުގެ ބޭނުމުގައި އޭނާ އޮންލައިންކޮށް މީހުންނާ ވާހަކަ ދައްކަމުން ދިޔަ އެވެ.
އެގޮތުން އޭނާ އޮންލައިންގައި ލިޔުނު އަސަރުގަދަ މެސެޖެއްގައި އޮތީ މިހެންނެވެ.
"އަހަންނަށް ދުނިޔޭގެ ރީތިކަން ތަޖުރިބާކޮށްލެވޭކަށް ނެތެވެ. އަހަންނަށް ނުކުރެވޭނެ ކަންތައްތައް ހިތަށް އަރާފައި ވަރަށް ދެރަވެ އެވެ. ދުނިޔޭގެ ރީތިކަން އަހަންނަށް ތަޖުރިބާއެއް ނުކުރެވޭނެ އެވެ. މޫދުގައި ނުވަތަ ކޯރުގައި ފަތައެއް ނުލެވޭނެ އެވެ. ތަދަކާ ނުލައި ވިނަގަނޑު މަތީ ހިނގާ، ދުވެ ނޫޅެވޭނެ އެވެ. އަހަންނަށް އެކުވެރިންނަށް އެހީތެރިވުމުގެ ގޮތުން އެއްޗެހި އުފުލައި ގެންގޮސްދީއެއް ނުހެދޭނެ އެވެ. އަހަރެން އެންމެ ލޯބިވާ މީހުންނަށް އަޅާލާކަށް އަހަންނަކަށް އެއްވެސް ކަމެއް ނުކޮށްދެވޭނެ އެވެ. އަހަންނަށް އެމީހުން އުފާކޮށެއް ނުދެވޭނެ އެވެ.
"... އަދި ލޯބިވުމުން ކުރެވެނީ ކޮންކަހަލަ އިހްސާސްތަކެއް ކަމެއް ދުވަހަކު ވެސް ނޭނގޭނެ އެވެ. އެހެން މީހަކު ތިމާ ދެކެ ލޯބިވުމުން އެ ކުރެވޭ އިހްސާސްތަކެއް ވެސް ނުކުރެވޭނެ އެވެ. އެހެން މީހަކު ތިމާއާ ހެދި ހަސަދަވެރިވުން ނުވަތަ ފަޚުރުވެރިކަމާ އެކު ތިމާ ތައާރަފް ކޮށްދޭ ތަނެއް ވެސް ނުފެންނާނެ އެވެ. ލޯބިވާ މީހަކާ ބައްދާލުމުން އެ ކުރެވޭ އިހްސާސްތައް ތަޖުރިބާކުރުމަކީ ވެސް ވާނެ ކަމެއް ނޫނެވެ. ލޯބިވެރިޔާ އަށް ރައްކާތެރިކަން ދީ އޭނާއާ އެކު ނަށާލާ ނުވަތަ ހަދިޔާއަކަށް މާބޮނޑިއެއް ދީ ހަދިޔާއެއް ތައްޔާރުކޮށްލުން ފަދަ ކަމެއް ވެސް ނުކޮށްދެވޭނެ އެވެ."
ކަޒަކަސްތާނުގައި ދިރިއުޅޭ އަނާ ކިޔާ ޒުވާން އަންހެނަކަށް ގްރިގޮރީގެ މި މެސެޖު ފެނުނެވެ. އޭނާ ވަގުތުން ގްރިގޮރީ އަށް ގުޅާފައި އޭނާގެ މެސެޖު ކިޔާފައި ވަރަށް ދެރަވި ކަމަށް ބުންޏެވެ. އަނާގެ ފޮޓޯ ފެނިފައި ގްރިގޮރީ އަށް ވަގުތުން އެ ރީތި ޒުވާނާ ދެކެ ލޯބި ވެވުނެވެ. އެހެންވެ ކުޑަކޮށް ޖެހިލުންވެފައި ހުރެ ވެސް އޭގެ ފަހުން އެއް ދުވަހު ގްރިގޮރީ އޭނާގެ ސިފަ އާއި އިން ހާލަތު ބަޔާންކޮށްދޭ ފޮޓޯއެއް ފޮނުވި އެވެ.
މި ފޮޓޯ ފެނިފައި އަނާގެ ހިތަށް ވަރަށް އަސަރުކުރި އެވެ. އަދި 3،000 މޭލުގެ ދުރު ދަތުރެއް ކޮށްފައި ގްރިގޮރީ ކައިރިއަށް ދިޔަ އެވެ. އަނާ ގަބޫލުކުރާ ގޮތުގައި މީހާގެ ބޭރުފުށުން ފެންނަ ސިފަޔަށް ވުރެ އެތެރެފުށް ރީތިވުން އޭނާއަށް މާ މުހިއްމެވެ. އެހެންކަމުން ފުރަތަމަ ނަޒަރުން ވެސް ގްރިގޯރީ ދެކެ އަނާ އަށް ލޯބި ވެވުނީ އެވެ. އަދި މާ ގިނަ ދުވަހެއް ނުވެ ކައިވެނިވެސް ކުރީ އެވެ.
ލޯބީގައި މާޔޫސް ވެފައިވާ މީހުންގެ ހިތަށް ފިނިކަން ލިބުނު މި ވާހަކަ ސޯޝަލް މީޑިއާގައި ވަނީ ވަރަށް މަގުބޫލުވެފަ އެވެ.