30 އެޕްރީލް 2017 - 06:12
މިދިޔަ ހަފުތާގައި މަރުވި މަޝްހޫރު ފިލްމީ ތަރި ވިނޯދް ކަންނާ އާއި މީގެ އެތައް އަހަރެއް ކުރިން މަރުވެފައިވާ އެކްޓަރު ފީރޯޒް ޚާން އަކީ ވަރަށް ގާތް ދެ އެކުވެރިންނެވެ. މި ދެ ތަރިންގެ އެކުވެރިކަން ބަދަހިވެގެން ދިޔައީ އެކުގައި ކުޅުނު ތިން ފިލްމެއްގެ ތެރެއިންނެވެ. އެއިން ކޮންމެ ފިލްމެއްހެން، އެ މީހުންގެ އެކުވެރިކަންހާ ކާމިޔާބެވެ.
ވިނޯދް ފިލްމީ ދުނިޔެއަށް ތައާރަފުވީ 1968 ވަނަ އަހަރު އެވެ. މަރުވީ އޭޕްރީލް 27، 2017 ގައި މުމްބައިގަ އެވެ. ފީރޯޒް ޚާން ފިލްމު އިންޑަސްޓްރީއަށް ވަނީ 1960 ގަ އެވެ. މަރުވީ އޭޕްރީލް 27، 2009 ގައި ބެންގަލޯރުގަ އެވެ. މި ދެ އެކުވެރިން ވަނީ "ގުރުބާނީ" އާއި "ދަޔާވާން" އަދި "ޝަންކަރް ޝަމްބޫ" އެކުގައި ކުޅެފަ އެވެ.
ދެ އެކްޓަރުން ވެސް މަޝްހޫރުވީ ސްކްރީނުން އެމީހުން ފެންނަ ވަރުގަދަ ޝަހުސިއްޔަތުގެ ގޮތުގަ އެވެ. ފީރޯޒަކީ އޭނާގެ ކައުބޯއީ ވައްތަރުގަނޑަށް މަޝްހޫރުވީ ތަރިއަކަށް ވާއިރު ވިނޯދް މަޝްހޫރުވީ ރީތި ބަތަލެއް އަދި ނުބައިބައި ރޯލު ކުޅޭ މީހެއްގެ ގޮތުގަ އެވެ.
ފަހަރެއްގައި މިއީ އިއްތިފާގަކަށް ވެސް ވެދާނެ އެވެ. ނަމަވެސް ދެ އެކުވެރިން ވެސް މަރުވީ ކެންސަރު ބަލީގަ އެވެ. ފީރޯޒަށް ޖެހުނީ ފުއްޕާމޭގެ ކެންސަރެވެ. ވިނޯދަށް ބްލެޑާ ކެންސަރެވެ. އެ ދެ މީހުން ވެސް މަރުވެފައި ވަނީ އޭޕްރީލް މަހެއްގެ 27 ވަނަ ދުވަހު އެވެ. އަދި ކޮންމެ މީހަކުވެސް މަރުވިއިރު އުމުރުން 70 އަހަރެވެ.