29 އެޕްރީލް 2017 - 11:13
ލަންޑަން (29 އޭޕްރިލް) - އިނގިރޭސި ޕްރިމިއާ ލީގުގެ ބާކީ އޮތް ހަފްތާތަކުގައި ޗެލްސީ އާއި ޓޮޓެންހަމް ހޮޓްސްޕާސް ކުޅެން ޖެހޭ މެޗުތައް ކުޅުވަންވީ އެއް ވަގުތެއްގައި ކަމަށް ޗެލްސީގެ ކޯޗު އެންޓޯނިއޯ ކޮންޓޭ ބުނެފި އެވެ.
ޗެލްސީ އާއި ޓޮޓެންހަމަކީ ލީގަށް ވާދަކުރަމުން އަންނަ ދެ ޓީމެވެ. ޗެލްސީ އެއް ވަނައިގައި އޮތީ 33 މެޗުން 78 ޕޮއިންޓާ އެކު އެވެ. ދެ ވަނައިގައި އޮތް ޓޮޓެންހަމަށް ލިބިފައިވަނީ 33 މެޗުން 74 ޕޮއިންޓެވެ. ލީގުގައި މި ދެ ޓީމަށް ވެސް ބާކީ ފަސް މެޗު އެބައޮތެވެ.
ޗެލްސީގެ ކޯޗު ކޮންޓޭ ބުނީ ލީގުގައި ބާކީ އޮންނަ މެޗުތަކަށް ނުކުންނައިރު މެޗުތައް ރޭވިފައި އޮތް ގޮތުން އެއްވެސް ޓީމަކަށް އެޑްވާންޓޭޖް ލިބިގެން ނުވާނެ ކަމަށެވެ.
"ޗެލްސީ އާއި ޓޮޓެންހަމް މެޗުތައް ކުޅެންވީ އެއް ވަގުތެއްގައި. އެއްވަރަކަށް އަރާމްކުރަން ވަގުތު ވެސް ދޭންވީ. އެއީ އިންސާފުވެރި ގޮތަކީ. އެއްވެސް ޓީމަކަށް އެޑްވާންޓޭޖް އޮތުމަކީ ރަނގަޅު ގޮތެއް ކަމަށް ނުދެކެން،" ކޮންޓޭ ބުންޏެވެ.
ޕްރިިމިއާ ލީގުގައި އާންމުގޮތެއްގައި ހުރިހާ ޓީމެއް އެއް ވަގުތެއްގައި މެޗުތައް ކުޅެނީ ލީގުގެ ފަހު ދެ ހަފްތާގަ އެވެ. އެއީ ޓީވީ ރައިޓްސް ކޮންޓްރެކްޓްގެ ދަށުން އެއްބަސްވެފައިވާ ގޮތް ކަމަށް ރިޕޯޓްތައް ބުނެ އެވެ.
ލީގުގައި މާދަމާ ޗެލްސީ އާއި އެވަޓަން ބައްދަލުކުރާ މެޗު އޮންނާނީ އާސެނަލާއި ޓޮޓެންހަމް ބައްދަލުކުރާ މެޗުގެ ކުރިންނެވެ. އެވަޓަން އަތުން މޮޅުވެ ވަގުތީގޮތުން ލީގުގެ އެއް ވަނައިގައި ހަތް ޕޮއިންޓުގެ ލީޑެއް ނެގުމުގެ ފުރުސަތު ޗެލްސީ އަށް އެބައޮތެވެ.
ކޮންޓޭ ބުނީ ޗެލްސީ މި ވަގުތު ކުރީގައި އޮތް ނަމަވެސް އެންމެ މެޗަކުން ވެސް ލީގު ބަދަލުވުމުގެ ފުރުސަތު އެބައޮތް ކަމަށެވެ.
"އެންމެ މެޗަކުން ބަލިވެއްޖެނަމަ ވެސް ލީގު ގެއްލުމުގެ ފުރުސަތު އެބައޮތް. އެއީ ޓީމުގެ ފޯމަށް އަސަރުކޮށް އޭގެއިން އަރައިނުގަނެވިފައި ވެސް އެބަހުރި މާޒީގައި. އެ ހުރިހާ ކަމަކަށް ތައްޔާރުވެގެން ފަހު މެޗުތަކަށް ނުކުންނާނީ،" ކުރިން ޔުވެންޓަސް އަށް ކޯޗުކޮށްދިން ކޮންޓޭ ބުންޏެވެ.
ލީގުގެ ކުރީގައި އޮތް ޗެލްސީ ވަނީ އެފްއޭ ކަޕްގެ ފައިނަލުން ވެސް ޖާގަ ހޯދައިފަ އެވެ. ކޮންޓޭ ބުނީ ދެ މުބާރާތް ކާމިޔާބު ކުރުމަކީ ވެސް ޓާގެޓެއް ކަމަށެވެ.