27 އެޕްރީލް 2017 - 17:07
މެންޗެސްޓާ (އޭޕްރިލް 27) - ކޯޗިން ކެރިއަރުގައި ފުރަތަމަ ފަހަރަށް ހުސްއަތާ ސީޒަނެއް ނިންމާލަން ޖެހުމުން މާޔޫސްނުވާ ކަމަށާއި އެ ޓީމުގައި އޭނާ ފެއިލްނުވާނެ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ބާސެލޯނާ އާއި ބަޔާން މިއުނިކަށް ފާއިތުވި އަށް ވަރަކަށް އަހަރު ގާޑިއޯލާ ވަނީ ގިނަ ކާމިޔާބީތަކެއް ހޯދައިދީފަ އެވެ. މި ސީޒަނުގައި ސިޓީއާ ހަވާލުވުމަށް ފަހު ގާޑިއޯލާ އެ ޓީމށ އެކު ވެސް ކާމިޔާބީ ހޯދާނެ ކަމަށް ބެލެވުނެވެ. އެކަމަކު އެއް ފެންވަރެއްގައި ގިނަ މެޗުތަކެއްގައި ނުކުޅެވި ގިނަ މެޗުތަކަކުން ބަލިވުމުން ސިޓީ އަށް ސީޒަނުގައި ތަށްޓެއް ލިބުމުގެ ހުރިހާ ދޮރެއް ވަނީ ބަންދުވެފަ އެވެ.
"އަހަރެންގެ ކޯޗިން ކެރިއަރުގެ ނުވަ އަހަރު ތެރޭގައި ތަށްޓެއް ނުހޯދައި މިއީ ފުރަތަމަ ސީޒަން. މިއީ ކޮންމެވެސް ދުވަހެއްގައި ވާނެ ކަމެއްކަން އަހަންނަށް އެނގޭ. ސިޓީގައި ފުރަތަމަ އަހަރު އަހަންނަށް ކާމިޔާބީ ނުހޯދުނަސް އުއްމީދު ދޫކޮށެއް ނުލަން. މި ޓީމުގައި ވެސް އަހަރެން ކާމިޔާބު ހޯދާނަން،" ގާޑިއޯލާ ބުންޏެވެ.
ލީގުގައި މިރޭ ސިޓީ އަމިއްލަ ދަނޑުގައި ނުކުންނާނީ ވާދަވެރި މެންޗެސްޓާ ޔުނައިޓެޑާ ދެކޮޅަށެވެ. މި ދެ ޓީމު ޔުނައިޓެޑް ދަނޑުގައި ކުޅުނު މެޗުން ސިޓީ ވަނީ 2-1 އިން މޮޅުވެފަ އެވެ.
ޔުނައިޓެޑްގެ ކޯޗު ހޯސޭ މޮރީނިއޯ އާއި ސިޓީގެ ކޯޗު ގާޑިއޯލާ އަކީ ފުޓްބޯޅައިގެ އެންމެ ވާދަވެރި ދެ ކޯޗުންނެވެ.
"މޮރީނިއޯއާ އަހަންނަކީ އަވައްޓެރިން. އަހަރެމެންގެ މެދުގައި އޮންނަނީ ހަމައެކަނި ފުޓްބޯޅައިގެ ވާދަވެރިކަން. ދެ ކޯޗުން ވެސް މަސައްކަތްކުރަނީ އަމިއްލަ ޓީމު މޮޅުކުރަން. އެކަން ހާސިލްކުރުމުގައި ޖަޒުބާތީ ކަންތައްތަކެއް ހިނގާފައި ހުުރުމަކީ ޒާތީ ކަމެއް އޮތުމެއް ނޫން،" މޮރީނިއޯއާ ގުޅޭގޮތުން ގާޑިއޯލާ ބުންޏެވެ.
މިރޭގެ މެޗަކީ ލީގުގެ ތިން ވަނަ އަށް ޖެހިލަން ސިޓީ އަށް ވަރަށް މުހިއްމު މެޗެކެވެ. މި ވަގުތު ލީގުގެ ތިން ވަނައިގައި އޮތް ލިވަޕޫލަށް ލިބިފައިވަނީ 34 މެޗުން 66 ޕޮއިންޓެވެ. ސިޓީ ހަތަރު ވަނައިގައި އޮތީ 32 މެޗުން 64 ޕޮއިންޓް ހޯދައިގެންނެވެ.
ސިޓީ މިރޭގެ މެޗަށް ނުކުންނައިރު އެ ޓީމަށް އޮތް އެންމެ ބޮޑު ކަންބޮޑުވުމަކީ މިދިޔަ އާދިއްތަ ދުވަހު އެފްއޭ ކަޕް ސެމީ ފައިނަލްގައި ޑޭވިޑް ސިލްވާ އަށް ލިބުނު އަނިޔާއާ ގުޅިގެން މިރޭގެ މެޗުގައި ނުކުޅެވުމެވެ. އެހެން ނަމަވެސް ސާޖިއޯ އަގުއޭރޯ އާއި މިދިޔަ ޖެނުއަރީ މަހު އަނިޔާވެގެން ކުޅުމާ ދުރަށްދާން ޖެހުނު ބްރެޒިލްގެ ފޯވާޑް ގަބްރިއެލް ޖީސެސް އަށް މިރޭ ކުޅެވޭނެ ކަމަށް ސިޓީން ބުނެ އެވެ.
ސިޓީ އާއި ޔުނައިޓެޑް ބައްދަލުކުރާ މެޗު ފަށާނީ މިރޭ ރާއްޖެ ގަޑިން 12 ޖަހާއިރު އެވެ.