24 އެޕްރީލް 2017 - 23:51
މައްޗަންގޮޅީ ޕީޓްރަލް ހޮޓާ ހިމެނޭ ސަރަހައްދުގެ ތިން ތަނެއް ފުލުހުން މިރޭ ފާސްކޮށް ބަޔަކު ހައްޔަރުކޮށްފި އެވެ.
ކޯޓު އަމުރެއްގެ ދަށުން ފުލުހުން ފާސްކުރީ މއ. ކިނާރާ ހައުސް އަދި އެނބޫގޯޅީގައި ހުންނަ އޮފީހަކާއި މއ. ނަމޫނާގެ އެވެ. މީގެ ތެރެއިން މީހުން ހައްޔަރުކުރި ކަމަށް ވަނީ ކިނާރާ ހައުސް އާއި އޮފީހުންނެވެ.
މި އޮޕަރޭޝަންގައި ހައްޔަރުކުރީ ތިން މީހަކު ކަމަށް އެނގިފައިވެ އެވެ.
މި ތިން ތަން ފާސްކުރާއިރު، މޫނު ނިވާކޮށްގެން ތިބި އެސްއޯ ފުލުހުން ވެސް މައްޗަންގޮޅީ ސަރަހާ ކައިރީގައި ހަރަކާތްތެރިވި މަންޒަރު ވަނީ ފެނިފަ އެވެ.
ފުލުހުން ބައެއް ގެތައް ފާސްކުރަނީ ކީއްވެ ކަމެއް އަދި ސާފެއް ނުވެ އެވެ.
ނަމަވެސް ސޯޝަލް މީޑިއާ އެކްޓިވިސްޓް އަދި ބްލޮގާ ޔާމީން ރަޝީދު މިދިޔަ ހޮނިހިރުދުވަހުގެ ރޭ ދަންވަރު ރަހުމް ކުޑަގޮތަކަށް މަރާލާފައިވާއިރު، މާލެތެރެ ބެލެހެއްޓުމަށް އިތުރު ފުލުހުން މިރެއިން ފެށިގެން ވަނީ ނެރެފަ އެވެ.
ފުލުހުން ބުނީ މި އޮޕަރޭޝަންގައި، މީހުންނާ ސުވާލުކޮށް ބަލައި ފާސްކޮށް އަދި ސާމްޕަލް ނަގާނެ ކަމަށެވެ.
މާލެތެރޭގެ ސަލާމަތީ ކަންކަން ބެލެހެއްޓުމަށް އިތުރު ފުލުހުން ނެރުނުއިރު، އެކި ސަރަހައްދުތަކުގައި ފުލުހުން ފައިމަގުގައި ފޯރިމަރަމުން އެބަދެ އެވެ.
ޔާމީންގެ މަރާ ގުޅިގެން މުޅި މާލެ އަށް ބޮޑު ސިހުމެއް އައިސްފައިވާއިރު، މިހާތަނަށް މި މައްސަލާގައި މީހަކު ހައްޔަރުކުރި ކަމެއް ނޭނގެ އެވެ. މިރޭ ހައްޔަރުކުރި މީހުންނާ ޔާމީންގެ މަރާ ގުޅުމެއް ވާ ކަމެއް ނުވަތަ ނޫން ކަމެއް ވެސް ފުލުހުން އަދި ނުބުނެ އެވެ.