22 އެޕްރީލް 2017 - 00:33
ރައްޔިތުންގެ މަޖިލީހުގެ ރައީސް އަބްދުﷲ މަސީހު މަގާމުން ވަކިކުރެވެން އޮތީ 42 މެމްބަރުންގެ ސޮއި ހޯދައިގެން ކަމަށް ވުމުން، އެ އަދަދާ ގާތްވާ ވަރަކަށް ހައްޔަރުކުރާ މެމްބަރުން ގިނަވާނެ ކަމަށް ދިއްގަރު ދާއިރާގެ މެމްބަރު ފާރިސް މައުމޫން މިރޭ، ކުނޫޒުގެ ޖަލްސާގައި، ވިދާޅުވެއްޖެ އެވެ.
ހައްޔަރުކޮށް މިހާރު 15 ދުވަހަށް ބަންދުގެ މުއްދަތު ޖަހާފައިވާ ޖޭޕީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމް "ކިތައްމެ ކުޑަ ގޮޅިއެއްގައި" ބެހެއްޓިޔަސް އިދިކޮޅު ހަރަކާތާއި ދިވެހި ރައްޔިތުން ތިބީ އޭނާގެ ފަހަތްޕުޅުގައި ކަމަށް ވިދާޅުވެ، ވާހަކަ ދައްކަވަމުން ފާރިސް ފުރަތަމަ ވެސް ނުސީދާކޮށް މެސެޖް ދޫކުރެއްވީ، ބޮޑުބޭބޭފުޅު ރައީސް އަބްދުﷲ ޔާމީނަށެވެ.
މިރޭ ކުނޫޒަށް ވަޑައިގެން، ކުނޫޒުގެ ޕޯޑިއަމްގައި ވާހަކަ ދައްކަވަން ނިންމެވީ، އެތަނުގައި ދައްކާ ވާހަކައެއް "މެސެޖް ދޭން ބޭނުންވާ ފަރާތަށް، ވަރަށް ސާފުކޮށް، ސާދާ އިބާރާތުން" އިވިވަޑައިގަންނަވާކަން އެނގިވަޑައިގަންނަވާތީ ކަމަށް ފާރިސް ވިދާޅުވި އެވެ. އެހެންކަމުން އޭނާ ގޮވާލެއްވީ "ވީ އެންމެ އަވަހަކަށް، އޮނަރަބްލް ގާސިމް އިބްރާހިމް މިނިވަންކޮށްދިނުމަށެ"ވެ.
"އަޅުގަނޑު ގާސިމްގެ ހިތްވަރަށް ޝުކުރު އަދާކުރަން. [ހައްޔަރުކުރުމުން] ވަރަށް އުނދަގޫ ތަހައްމަލު ކުރުމަށް ފަހު ދެ ވަނަ ފަހަރަށް ވެސް އެކަން ތަހައްމަލު ކުރަން ޖެހިދާނެކަން އެނގިވަޑައިގެން މި މަސައްކަތުގައި އެ އުޅުއްވީ،" ގާސިމް މިނިވަންކުރުމުގެ މަސައްކަތް ހުއްޓާނުލައްވާނެކަމުގެ ޔަގީންކަމާ އެކު، ފާރިސް ވިދާޅުވި އެވެ.
"އަޅުގަނޑު އެމަނިކުފާނަށް ކަށަވަރުކޮށް އަރުވަނީ ފެޔަކަށް ޖެހޭކަން ވެސް ނެތީމޭ، މިނިވަންކުރުމުގެ މަސައްކަތް ވެސް ކުރާނަމޭ އަދި އިސްލާހީ މަސައްކަތް ވެސް ކުރިއަށް ގެންދާނަމޭ."
އޭނާ ވިދާޅުވި ގޮތުގައި "42 ވަރަށް ނުރައްކާތެރި އަދަދަކަށް ވެއްޖެ" އެވެ. އެ އަދަދާ ގާތްވި ވަރަކަށް އަދި އެއަށް ވުރެ އިތުރުވާ ވަރަކަށް ހައްޔަރުކުރާ މެމްބަރުންނާއި އެކި ތަހުގީގުތަކާ ކުރިމަތިލާން ޖެހޭ މެމްބަރުން ގިނަވާ މަންޒަރު ފެންނަ ކަމަށް ވިދާޅުވި އެވެ. ފާރިސް ލަފާކުރައްވާ ގޮތުގައި ހައެއްކަ މެމްބަރުން ހައްޔަރުކުރާނެ އެވެ.
"އެކަމަކު މި މަސައްކަތް ނުހުއްޓުވޭނެ، މި މަސައްކަތް މަދެއް ވެސް ނުވާނެ،" އޭނާ ވިދާޅުވި އެވެ.
އަޅުގަނޑުމެންގެ "މަގުސަދު ހާސިލްވާން ވަރަށް ކައިރި ވެއްޖެ. ހަމަ ކުޑަ ހިތްވަރެއް އިތުރަށް ކުރަން ޖެހެނީ."
ފާރިސް ވިދާޅުވި ގޮތުގައި މަޖިލިހުގެ ވޯޓަކާ ކައިރިވާ ވަރަކަށް އިސްކޮށް އުޅޭ ބައެއް މެމްބަރުންގެ މައްސަލަތައް "24 ގަޑިއިރު، 18 ގަޑިއިރު، 12 ގަޑިއިރު ތެރޭގައި" ދަނީ ބަލަމުންނެވެ. އެހެންކަމުން މިނިވަން މުއައްސަސާތައް މަސައްކަތް ކުރަނީ ކިހިނެއްކަން އެނގިވަޑައިނުގަންނަވާ ކަމަށް ވިދާޅުވި އެވެ. އަދި ސަރުކާރުން އެހެން ކަންތައް ކުރި ވަރަކަށް "އަޅުގަނޑުމެންނަށް ކާމިޔާބާ ގާތްވާ" ކަމާއި އިދިކޮޅު ހަރަކާތުގައި "ބައިވެރިވާ މީހުން ވެސް އިތުރު ވަމުން" އަންނަކަން ފާރިސް ފާހަގަކުރެއްވި އެވެ.
ގާސިމް ހައްޔަރުކުރުމުގެ އިތުރުން އޭނާގެ މައްޗަށް ތިން ދައުވާއެއް އުފުލައި، އެ ޝަރީއަތް ދަނީ ކުރިއަށެވެ. އަދި ޖޭޕީގެ ޑެޕިއުޓީ ލީޑަރު ކިނބިދޫ ދާއިރާގެ އަބްދުﷲ ރިޔާޒުގެ ޝަރީއަތް ވެސް ވަނީ ފަށައިފަ އެވެ. ފާރިސްގެ މައްޗަށް ދައުވާއެއް އުފުލަން ފުލުހުން މިހާރު ވަނީ ޕްރޮސެކިއުޓަ ޖެނެރަލްގެ އޮފީހަށް ފޮނުވައިފަ އެވެ.
ފާރިސް ވިދާޅުވި ގޮތުގައި އިސްލާހީ މަސައްކަތުގައި ގާސިމް ބައިވެރިވެވަޑައިގަތީ ކުރީގެ ރައީސް މައުމޫން އަބްދުލްގައްޔޫމާއި އެމްޑީޕީގެ އިސް ވެރިންގެ އިތުރުން އެމްޑީޕީގެ މަޖިލިހުގެ މެމްބަރުން ވެސް ގިނަ މަސައްކަތްތަކެއް ކޮށްގެންނެވެ. އެ ހަރަކާތަށް ބޮޑު ދިރުމެއް އައީ ގާސިމް ނުކުމެވަޑައިގެން "ލީޑަޝިޕްގައި ހިއްޕެވި ހިސާބުން" ކަމަށް ވެސް ވިދާޅުވި އެވެ.