18 ޖޫން 2016 - 08:09
ބާޒާރުމަތީގައި އާންމު ކާބޯތަކެތި ވިއްކާ ތަންތަނުގެ ދޮރުމަތިން އިންޑިއާގެ ހައިދަރްއާބާދުގައި ރޯދަ މަހު ދަރު އުނދުން ފެނުމަކީ އާންމު ކަމެކެވެ. އެހެން ވަނީ ހައިދަރްއާބާދުގައި އެންމެ މަގުބޫލު ކެއުމަކީ ބިރިޔާނީ ކަމަށް ވިޔަސް ރޯދަމަހާ އެކު ބިރިޔާނީ ވެސް ފަހަތަށް ޖައްސާލާފައި ކުރިއަށް އަރަނީ ހަލީމް ކަމަށް ވާތީ އެވެ.
މި ހަލީމަކީ މީހެއް ނޫނެވެ. ހައިދަރްއާބާދަށް ހާއްސަ ކެއުމެކެވެ. ދަރު އުނދުގައި، މަޑު ގިނީގައި ކައްކާ ސަގާފީ އެއްޗެކެވެ. މިއީ ކައްކަން ފަސޭހަ އެއްޗެއް ނޫނެވެ.
ރޯދަމަހަށް ހާއްސަކޮށް ހަދާ މި ޑިޝް ތައްޔާރުކުރުމަށް ކައްކާއިންނާއި އެ މީހުންގެ އެހީތެރިން ބިޔަ ތެލިތައް އުދައިގެން މަގުމަތީގައި ތިބެ އެވެ. ހަލީމަކީ ކުޑަ އެތިކޮޅުކޮޅުން ކައްކައިގެން ކެވޭ ވަރު އެއްޗެއް ނޫނެވެ. އުނދުންމަތީގައި 10-12 ގަޑިއިރު ބަހައްޓަން ޖެހެ އެވެ. މިއީ އެއްގަމު މަހާއި މުގާއި ހަވާދުގެ ބާވަތްތައް އަޅައިގެން ހަދާ އެއްޗެކެވެ.
ބުނެވޭ ގޮތުގައި މިއީ އިންޑިއާގައި މޫގަލް އެމްޕަޔާގެ ނުފޫޒު އޮތް އިރު އަރަބިންގެ ފަރާތުން ނުވަތަ އީރާނާއި އަފްޣާނިސްތާނުން އިންޑިއާ އަށް ތައާރަފްވި އެއްޗެކެވެ. ހަލީމްގެ އަސްލު ގުޅެނީ އަރަބިންނާ އެވެ. އެކަމަކު އިންޑިއާގައި މި ކާނާ ތައްޔާރުކުރަނީ އިންޑިއާގެ ރަހަތަށް އިތުރުކޮށްގެންނެވެ، އިންޑިއާގައި ހެދޭ ހަވާދުގެ ބާވަތްތަކާއި ގިތެޔޮ ފަދަ އެއްޗެހި ވެސް އަޅައިގެންނެވެ. މިރުހާއި ގޮދަނާއި ލޮނުމެދާއި ހިކި މޭވާގެ އެކި ބާވަތްތަކެވެ. ގެރިމަހުގެ ބަދަލުގައި ކުކުޅު ނުވަތަ މަސް އަޅައިގެން ނުވަތަ ހަމަ އެކަނި ތަރުކާރީގެ ބާވަތްތައް އަޅައިގެން ވެސް ހަދަ އެވެ.
މުސްލިމުންގެ މެދުގައި ހަލީމަށް އޮންނަ ޑިމާންޑް ބޮޑުކަމުން ހައިދަރްއާބާދުގެ އެންމެ އާދައިގެ ތަންތަނުންނާއި މަތީ ފެންވަރުގެ ހޮޓާތަކުން ވެސް ރޯދަ މަހު ހަލީމް ތައްޔާރުކުރެ އެވެ. މިއަށް އަޅާ ބާވަތްތަކަކީ މަތީ ދަރަޖައަކަށް ހަކަތަ ލިއްބައިދޭ ބާވަތްތަކަށް ވާތީ ރޯދަ ވީއްލާ ވަގުތުގަ އާއި ހާރުދަމު ވެސް ކައި އުޅެ އެވެ. މިއީ ތަތްކޮށް ހުންނަ އެއްޗެކެވެ.
ރޯދާ ވީއްލާ ވަގުތަށް ހަލީމް ތައްޔާރުވާނީ އެ ކެއްކުމުގެ މަސައްކަތް ވަރަށް ހެނދުނާ ފަށައިގެންނެވެ. ބެންގަލޫރާއި ޗެއްނާއީ ހިސާބުގައި ވެސް ރޯދަމަހަށް ހަލީމްގެ ޑިމާންޑް ބޮޑުވެ އެވެ. ޕާކިސްތާނުގައި ވެސް ހަލީމަކީ ރޯދަޔަށް ހާއްސަ އެއްޗެކެވެ.