20 އެޕްރީލް 2017 - 11:09
ޕެރިސް (އޭޕްރިލް 20) - ޗެމްޕިއަންސް ލީގުގެ ސެމީ ފައިނަލުގައި ވަކި ޓީމަކާ ދެކޮޅަށް ކުޅެން ޖެހިލުންނުވާ ކަމަށް މޮނާކޯގެ ކޯޗު ޕޯޗުގަލްގެ ލިއަނާޑޯ ޖާޑިމް ބުނެފި އެވެ.
މޮނާކޯ މުބާރާތުގެ ސެމީ ފައިނަލުން ޖާގަ ހޯދީ ކުއާޓާ ފައިނަލުގައި ޖަރުމަނުގެ ބޮރޫޝިއާ ޑޯޓްމަންޑްގެ މައްޗަށް 6-3 ގެ އެގްރިގޭޓް ނަތީޖާއަކުން ކުރިހޯދައިގެންނެވެ. މިއީ 2004 ވަނަ އަހަރު ޗެމްޕިއަންސް ލީގުގެ ފައިނަލުގައި ކުޅުނު ފަހުން މޮނާކޯ މުބާރާތުގެ ސެމީ ފައިނަލުން ޖާގަ ހޯދި ފުރަތަމަ ފަހަރެވެ.
"އަހަރެމެންނަށް އަދި މާ ބޮޑު ކާމިޔާބެއް ނުހޯދޭ. އެކަމަކު އަހަރެމެން ތާރީހުގެ ތެރެއިން ޖާގަ ހޯދައިފިން،" ރޭގެ މެޗަށް ފަހު ޖާޑިމް ބުންޏެވެ.
މޮނާކޯ އަކީ ޗެމްޕިއަންސް ލީގުގެ ފޯމެޓް ބަދަލުކުރި ފަހުން ތިން ވަަނަ ކޮލިފައިން ބުރުން ފެށިގެން މުބާރާތުގެ ސެމީ ފައިނަލާ ހަމައަށް ދަތުރުކުރި ފުރަތަމަ ޓީމެވެ. މީގެ ކުރިން އެކަން ހާސިލްކުރީ 1999 ގައި ޔޫކްރެއިންގެ ޑިނަމޯ ކިއޭވް އެވެ. އެކަމަކު އޭރު އޮތީ ތަފާތު ފޯމެޓެކެވެ.
ޗެމްޕިއަންސް ލީގުގެ ސެމީ ފައިނަލުން މޮނާކޯގެ އިތުުރުން މި ފަހަރު ޖާގަ ހޯދީ އެތުލެޓިކޯ މެޑްރިޑާއި ރެއާލް މެޑްރިޑްގެ އިތުރުން ޔުވެންޓަސް އެވެ. ޖާޑިމް ބުނީ ވަކި ޓީމަކާ ދެކޮޅަށް ކުޅެން ޖެހިލުންނުވާ ކަމަށެވެ.
"އަހަރެމެން ހަމައެކަނި މި ކުޅެނީ މޮނާކޯގެ ފައިދާއަކަށް ނޫން. މިއީ މި ވަގުތަށް ބަލާއިރު މުޅި ފްރާންސް ތަމްސީލްކުރާ ޓީމު. އެ ވިސްނުމުގައި އަހަރެމެން ނުކުންނައިރު ވަކި ޓީމަކާ ދެކޮޅަށް ކުޅެން ޖެހިލުމެއް ނުވޭ،" ޖާޑިމް ބުންޏެވެ.
ފްރެންޗް ލީގުގެ އެއް ވަނައިގައި ވެސް އޮތް މޮނާކޯ ވަނީ ސީޒަނުގެ މިހާތަނަށް ހުރިހާ މުބާރާތެއްގައި 141 ލަނޑު ކާމިޔާބު ކޮށްފަ އެވެ. ޖާޑިމް ބުނީ އެ ޓީމުގެ އެޓޭކުގައި ތިބި ކުޅުންތެރިންނަކީ ކޮންމެ ޓީމަކާ ދެކޮޅަށް ވެސް ތަފާތު ދެއްކޭނެ ފަދަ ކުޅުންތެރިން ކަމަށެވެ.
ޗެމްޕިއަންސް ލީގުގެ ސެމީ ފައިނަލު ގުރުއަތު ނެގުން އޮންނާނީ މާދަމާ އެވެ.