ހަނގުރާމަ ނިމުމަކަށް ގެނައުމަށް ޖޫން މަހު ހެދި އެއްބަސްވުމަށް އެމެރިކާއިން އަލުން އަމަލުކުރަން ފަށައިފި ނަމަ، އީރާނުން ވެސް "ވަގުތުން" އެއަށް އަމަލުކުރަން ފަށާނެ ކަމަށް އީރާނުގެ ރައީސް މައްސޫދު ޕެޒެޝްކިއަން އަންގާރަ ދުވަހު ވިދާޅުވެއްޖެ އެވެ.
"އަޅުގަނޑު ސާފުކޮށް މި ދަންނަވަނީ، އެމެރިކާއިން އެ އެމްއޯޔޫގެ ދަށުން އަދާކުރަންޖެހޭ ޒިންމާތަކަށް އަމަލުކުރަން ފަށައިފި ނަމަ، އީރާނުން ވެސް ވަގުތުން އެއާ އެއްގޮތަށް އަމަލުކުރަން ފަށާނެ،" ކިރްގިޒިސްތާނުގައި ބޭއްވި ޝަންހާއީ ކޯޕަރޭޝަން އޮގަނައިޒޭޝަން (އެސްސީއޯ) ސަމިޓްގައި ޕެޒެޝްކިއަން ވިދާޅުވި އެވެ.
މި އެއްބަސްވުމަކީ، ފެބްރުއަރީ މަހުގެ ފަހުކޮޅު އެމެރިކާ އާއި އިޒްރޭލުން އީރާނަށް ދިން ހަމަލާތަކުގައި އީރާނުގެ ކުރީގެ ރޫހީ އާޔަތުﷲ އަލީ ޚާމަނައީ އަވަހާރަކޮށްލުމާ ގުޅިގެން، އީރާނާއި އެމެރިކާއާ ދެމެދު ފެށި ހަނގުރާމަ ނިމުމަކަށް ގެނައުމަށް ހެދި އެއްބަސްވުމެކެވެ.
ނަމަވެސް، ދެ ފަރާތުން ވެސް އެއްބަސްވުމުގެ ޝަރުތުތަކާ ހިލާފުވެފައިވާ ކަމަށް އެއްބަޔަކު އަނެއް ބަޔަކަށް ތުހުމަތުކުރުމަށްފަހު، މި އެއްބަސްވުން ވަނީ ރޫޅިފަ އެވެ.
"އިސްލާމްއާބާދު އެމްއޯޔޫގެ ދަށުން އެމެރިކާއިން އަދާކުރަންޖެހޭ އިލްތިޒާމްތަކާ ތަކުރާރުކޮށް ހިލާފުވުމުން އެނގިގެން ދިޔައީ... ތަންފީޒީ ނިޒާމެއްގެ ނެތުމާއި، ފިއްތުންތަކާއި އިންޒާރުދިނުމުގެ ސިޔާސަތަކަށް ރުޖޫއަވުމަކީ ސުލްހައިގެ ވާހަކަތައް މަގުން ކައްސާލާނެ ކަމެއްކަން،" ސަމިޓްގައި ޕެޒެޝްކިއަން ވިދާޅުވި އެވެ.
"އީރާނުން އަބަދުވެސް ދެކެނީ ހިޔާލުތަފާތުވުންތައް ހައްލުކުރުމުގެ މައިގަނޑު މަގަކީ ސުލްހައިގެ ވާހަކަތަކާއި މަޝްވަރާތައް ކަމަށް. ނަމަވެސް، އިހްލާސްތެރިކަމެއް ނެތި، އިލްތިޒާމްތަކަށް ހުރުމަތްތެރިކޮށް ނުހިތައި، އަދި ބާރުގެ ބޭނުންކުރުން ހުއްޓާނުލައި ކުރެވޭ މަޝްވަރާއަކުން ދާއިމީ ސުލްހައެއް ގާއިމެއް ނުކުރެވޭނެ،" އޭނާ ވިދާޅުވި އެވެ.
އޭނާގެ މި ވާހަކަ ދެއްކެވީ، މަސް ދުވަހުގެ މެދުކެނޑުމަކަށް ފަހު ހޯމަ ދުވަހު އަލުން ހަމަލާތައް ބަދަލުކުރަން ފެށުމާ އެކު، ހޮރްމޫޒް ކަނޑުއޮޅީގައި އީރާނާއި އެމެރިކާއާ ދެމެދު ނުތަނަސްކަން ބޮޑުވެފައިވާ ދަނޑިވަޅެއްގަ އެވެ.
އީރާނުން އަންނަނީ އެ ކަނޑުއޮޅި ބަންދުކޮށްފައި އޮންނަ އޮތުން ދަމަހައްޓައިފަ އެވެ. އަދި އެ ކަނޑުއޮޅި އަލުން ހުޅުވާލާނީ، އީރާނުގެ ބަނދަރުތަކަށް އެމެރިކާއިން އަޅާފައިވާ ނޭވަލް ބްލޮކޭޑް އުވާލައި، ތެލުގެ ދަތިކުރުމުގެ ފިޔަވަޅުތައް އުވާލައި، އަދި ބޭރު ގައުމުތަކުގައި ފްރީޒްކޮށްފައިވާ އީރާނުގެ ފައިސާތައް ދޫކޮށްލުމުން ކަމަށް އީރާނުން ބުނެ އެވެ.
ހޯމަ ދުވަހު އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ "އެމެރިކާއިން އެ މީހުންގެ އިލްތިޒާމްތަކަށާއި، އެ މީހުންގެ ރައީސް ސޮއިކުރެއްވި އެއްބަސްވުމަށް އަމަލުކުރަންޖެހޭ" ކަމަށެވެ.
"އެހެންވެއްޖެ ނަމަ، ކަންކަން އަލުން ރަނގަޅު މަގަށް އެޅުވިދާނެ."