މޮންޒާ އަތުން 4-1 އިން މޮޅުވެ އެންމެ ފަހުގެ ޗެމްޕިއަން
އިންޓަ މިލާނުން އާ ސީޒަނުގެ އިޓާލިއަން ލީގު ކާމިޔާބުކަމާ އެކު ފަށައިފި އެވެ.
އިންޓަ އިން އާ ސީޒަނަށް ނުކުތީ އާ ކުޅުންތެރިންނާ އެކު
ޓީމު އިތުރަށް ވަރުގަދަކޮށްގެންނެވެ. އެކަމަކު ފުރަތަމަ އެގާރައިގައި އާ އެއްވެސް
ކުޅުންތެރިޔަކު ނުހިމެނެ އެވެ.
ސެން ސީރޯގައި ކުޅުނު މި މެޗުގެ ހަ ވަނަ މިނެޓުގައި ހަކާން
ޗަނަގްއޮލޫ އިންޓަ އަށް ކުރި ހޯދައިދިނެވެ. އެކަމަކު އަލަށް ޕްރޮމޯޓްވި މޮންޒާ
އިން ގުސްޓާވޯ ވަރޭލާގެ ގޯލުން 29 ވަނަ މިނެޓުގައި އެއްވަރުކުރި އެވެ. ދެ ވަނަ
ހާފުގައި އިންޓަ މޮޅުވީ ޕިއޮޓްރޭ ޒިއެލިންސްކީ، ޕިއޯ އެސްޕޮސިޓޯ، އަދި ޔާން ބިސެކް
ޖަހައިދިން ގޯލުތަކުންނެވެ.
އިންޓައާ އަލަށް ގުޅުނު އިނގިރޭސި ޑިފެންޑަރު ޖޯން
ސްޓޯންސް ދެ ވަނަ ހާފުގައި ކުޅެން އެރި އެވެ. އެކަމަކު އިނގިރޭސި އަނެއް ދެ
ކުޅުންތެރިން ކަމަށްވާ ފުލްބެކް ޑްރެޑް ސްޕެންސް އާއި ކާޓިސް ޖޯންސް ނުކުޅެ އެވެ.
އިންޓަގެ ކޯޗު ކްރިސްޓިއަން ކީވޫ ބުނީ ފުރަތަމަ ހާފުގައި ޓީމު
އޮތީ ބުރަހެލިކޮށް ކަމަށާއި، އެކަމަކު ދެ ވަނަ ހާފުގައި ވަރަށް ރަނގަޅުކުރި
ކަމަށެވެ.
މިދިޔަ ސީޒަނުގެ ރަނަރަޕް ނަޕޯލީ ވަނީ ފުރަތަމަ މެޗުގައި
ރޭ ޖެނޯއާ އަތުން 2-0 އިން މޮޅުވެފަ އެވެ. އެ ޓީމުގެ ގޯލުތައް މެޗުގެ ފަހުކޮޅު
ޖަހައިދިނީ ކެވިން ޑިބްރޭނާ އާއި އެންޓޯނިއޯ ވެރްގާރާ އެވެ. ނަޕޯލީ މި ސީޒަނާ
ކުރިމަތިލީ މިދިޔަ ސީޒަނުގައި އޭސީ މިލާނުން ވަކިކުރި މަސިމިލިއާނޯ އެލެގްރީގެ
ކޯޗުކަމުގަ އެވެ.
ގިނަ ބަޔަކު ހައިރާންކޮށްލުމަށް ފަހު މިދިޔަ ސީޒަނުގައި
ގަދަ ހަތަރަކުން ފުރުސަތު ހޯދި ކޯމޯ ވަނީ ފުރަތަމަ މެޗުގައި އުދިނޭޒީއާ 1-1 އިން
އެއްވަރުވެފަ އެވެ. ސެސް ފެބްރިގާސް ކޯޗުކޮށްދޭ ކޯމޯ އަކީ މި ސީޒަނުގެ ލީގުގެ
ފޭވަރިޓެކެވެ.