އޮސްޓްރޭލިއާގައި
ކުޅުނު ޓެސްޓު ކްރިކެޓް މެޗަކުން ފުރަތަމަ ފަހަރަށް މޮޅުވެ، ބަންގްލަދޭޝް އިން ތާރީހީ
ކާމިޔާބީއެއް ހޯދައިފި އެވެ.
ކްރިކެޓުގައި
ދުނިޔޭގެ އެއް ވަނަ ކަމަށްވާ އޮސްޓްރޭލިއާ ޓީމާ ދެކޮޅަށް ބަންގްލަދޭޝް އިން ހުރިހާ
ގޮތަކުން ވެސް ވަރަށް ރަނގަޅަށް ކުޅުނެވެ.
ޑާވިންގައި
ކުޅުނު މެޗުން ބަންގްލަދޭޝް މޮޅުވީ ނުވަ ވިކެޓުންނެވެ. އޮސްޓްރޭލިއާގެ ދެ ވަނަ
އިންނިންގްސްގައި އެ ޓީމަށް ހެދުނީ 284 ލަނޑެވެ. މެޗުން މޮޅުވުމަށް
ބަންގްލަދޭޝްއަށް ބޭނުންވީ އެންމެ 57 ލަނޑެވެ. ބަންގްލަދޭޝުން ވަނީ ފަސޭހަކަމާއެކު
އަމާޒު ހާސިލުކޮށްފަ އެވެ.
ބަންގްލަދޭޝްގެ
ކެޕްޓަން ނަޖްމުލް ހުސައިން ޝާންތޯ ބުނީ މިއީ އެ ގައުމުގެ ކްރިކެޓް ތާރީހުގައި
ހޯދި އެންމެ ބޮޑު ކާމިޔާބީ ކަމަށެވެ.
"ހުރިހާ
ފޯމެޓަކަށް ބެލިޔަސް މިއީ އެންމެ ބޮޑު ކާމިޔާބީ. ދެން ބޭނުންވަނީ މިއަށް ވުރެ
ހާއްސަ ކާމިޔާބެއް ހޯދަން،"
"ވަރަށް
އުފާވެފައި މިތިބީ. ވަރަށް ފަހުރުވެރިވޭ ހުރިހާ ކުޅުންތެރިންނާ މެދު ވެސް."
އޮސްޓްރޭލިއާ
އަށް ފުރަތަމަ އިންނިންގްސްގައި ހެދުނީ އެންމެ 198 ލަނޑެވެ. އެ ހިސާބުން މެޗުން
މޮޅުވުމުގެ ފުރުސަތު ބޮޑަށް ބޮޑުވީ ބަންގްލަދޭޝްއަށެވެ. ހަތަރު ވަނަ ދުވަހު، ކެމަރޮން ގްރީން ވަނީ
އޮސްޓްރޭލިއާއަށް 104 ލަނޑު ހަދައިދީފައެވެ. މިއީ އޭނާގެ ޓެސްޓް ކެރިއަރުގެ ތިން ވަނަ
ސައްތަ އެވެ. ނަމަވެސް، އޮސްޓްރޭލިއާގެ އެހެން ބެޓްސްމަނުންގެ ފަރާތުން އޭނާއަށް
އެކަށީގެންވާ އެއްބާރުލުމެއް ނުލިބުނެވެ.
ނަތީޖާއަކަށްވީ
ބަންގްލަދޭޝުން މުހިންމު ވިކެޓްތައް ނަގަމުން ދިއުމެވެ. އެގޮތުން އެ ޓީމުގެ މަހުދީ
ހަސަން މިރާޒް ވަނީ އުކުމުގައި މޮޅު ކުޅުމެއް ދައްކާފައެވެ. އޭނާ 66 ލަނޑަށް ފަސް
ވިކެޓް ނެގި އެވެ.
އޮސްޓްރޭލިއާގެ
ކެޕްޓަން ޕެޓް ކަމިންސް ވަނީ ބަންގްލަދޭޝްއަށް ތައުރީފުކޮށްފަ އެވެ. އޭނާ ބުނީ އޮސްޓްރޭލިއާ އަށް ދެއްކޭނެ ބަހަނާއެއް ނެތް ކަމަށެވެ.
ބަންގްލަދޭޝް
އިން ޓެސްޓް ކްރިކެޓް ކުޅެން ފެށީ 2000 ވަނަ އަހަރު އެވެ. އެ ހިސާބުން އެ
ގައުމުގައި ކްރިކެޓުގެ މަގުބޫލުކަން ބޮޑުވެ މިހާރު ފުޓްބޯޅަ އަށް ވުރެ ހުރިހާ ގޮތަކުން
ހިނގަނީ ކްރިކެޓެވެ.