19 އެޕްރީލް 2017 - 05:59
ދެބެންގެ ދެދަރި ދައްތަ އަދި މަޝްހޫރު ބަތަލާ ޕްރިޔަންކާ ޗޯޕްޅާގެ ފިޔަވަޅު މަތިން، ބަތަލާ ޕަރިނީތީ ޗޯޕްޅާ ހިނގުމަކުން އެއްވެސް މައްސަލައެއް ނެތެވެ.
ޕްރިޔަންކާ ގޮތަށް ފިލްމް ކުޅެ، ލަވަ ކިޔައި އެންމެ ފަހުން މިހާރު ޕަރިނިތީ އަމާޒު ހިފާފައި ވަނީ ޕްރިޔަންކާ ގޮތަށް ފިލްމް ވެސް ޕްރޮޑިއުސް ކުރާށެވެ.
ޕަރިނީތީ ބުނީ ފިލްމް އުފެއްދުމުގެ މަސައްކަތަކަކީ އަބަދު ވެސް ވަރަށް ޝައުގުވެރިވާ ކަމެއް ކަމަށެވެ. އަދި އޭނާއަކީ ބޭންކިން ދާއިރާ އިން ކިޔަވައި، އެ ދާއިރާގައި ގިނަ ދުވަހު މަސައްކަތް ވެސް ކޮށްފައިވާ މީހަކަށްވާތީ، ސިކުނޑި އަބަދު ވެސް ވިޔަފާރި އަށް ހުޅުވިފައިވާ ކަމަށް ބުންޏެވެ.
"އެހެންވެ މިހާރު ވަރަށް ބޭނުން އަމިއްލަ އަށް ފިލްމް ޕްރޮޑިއުސް ކުރަން. މި ޕްރޮސެސްއަކީ އަހަރެން އަސްލު ވަރަށް ގަޔާވާ ކަމެއް،" 2011 ވަނަ އަހަރު ޔާޝްރާޖް ފިލްމްސް (ވައިއާރްއެފް) ގެ "ލޭޑީސް ވާސަސް ރިކީ ބަލް" އިން ފިލްމީ ދާއިރާ އަށް ނިކުތުމުގެ ކުރިން އެ ސްޓޫޑިއޯގެ މާކެޓިން ޑިޕާޓްމަންޓްގައި މަސައްކަތް ކުރި ޕަރިނީތީ، 28، ބުންޏެވެ.
އޭނާ ބުނީ ފިލްމީ މަސައްކަތުގެ ތެރޭގައި މިހާރު އުޅެވުމަކީ، ފިލްމްތައް ޕްރޮޑިއުސް ކުރަން ލިބޭނެ ތަޖުރިބާއެއް ކަމަށެވެ. އެހެންވެ މާ ދުރު ނޫސް މުސްތަގުބަލެއްގައި ފިލްމްތައް ޕްރޮޑިއުސް ކުރަން ފަށާނެ ކަމަށް ބުންޏެވެ.
ބޭނުން ވަނީ ކޮން ކަހަލަ ޖޯންރާތަކެއްގެ ފިލްމްތައް ބެލުންތެރިންނާ ހަމައަށް ގެނެސް ދޭންތޯ ނޫސްވެރިން ސުވާލު ކުރުމުން، ޕަރިނީތީ ބުނީ މުހިއްމީ ވަކި ޖޯންރާއެއް ނޫން ކަމަށެވެ.
"މުހިއްމު ރަނގަޅު ސްކްރިޕްޓެއް. އަހަރެން ހިތްހަމަޖެހޭ ކަހަލަ ކޮންމެ ޖޯންރާއެއްގެ ފިލްމެއް ވެސް ޕްރޮޑިއުސް ކުރާނަން." އޭނާ ބުންޏެވެ.
ޕަރިނީތީ ދެން އެންމެ އަވަހަށް ފެނިގެން ދާނީ އަންނަ މަހު 12 ގައި ރިލީޒް ކުރާ ވައިއާރްއެފްގެ "މޭރީ ޕިޔާރީ ބިންދޫ" އިންނެވެ. މިއީ 2014 ވަނަ އަހަރު ރިލީޒް ކުރި "ކިލް ދިލް" އަށް ފަހު ރިލީޒްވާ ޕަރިނީތީގެ ފުރަތަމަ ފިލްމެވެ.
ފަލަކަމުން ގިނަ ބައެއްގެ ފާޑު ކިޔުންތައް އަމާޒުވެގެން، ޕަރިނީތީ ހިކެން ވަރަށް ބޮޑަށް މަސައްކަތްކޮށް، ނަތީޖާ ވެސް ވަނީ ދައްކާފަ އެވެ. އޭނާ މިހާރު ހުރީ ވަރަށް ލޫޅާފަތިކޮށެވެ.
ހަށިގަނޑަށް ގެނައި ބަދަލާ އެކު ޕަރިނީތީ ވަނީ މިދިޔަ އަހަރު ރިލީޒް ކުރި ފިލްމް "ޑިޝޫމް" ގެ ހާއްސަ ލަވައަކުން ފެނިފަ އެވެ. އެ ލަވައަކީ ވަރުން ދަވަންއާ އެކު އޭނާ ފެނިގެން ދިޔަ "ޖަނެމަން އާ" އެވެ.
ޕަރިނީތީ މިހާރު އަންނަނީ ރޯހިތު ޝެޓީގެ "ގޯލްމާލް އެގެއިން" ގައި ވެސް މަސައްކަތް ކުރަމުންނެވެ.