18 އެޕްރީލް 2017 - 10:43
ޔުނައިޓެޑް ނޭޝަންސް (އެޕްރީލް 18) - އެމެރިކާ އިން އުނދަގޫ ކުރުމުގެ ގޮތުން ފިޔަވަޅުތައް އަޅަމުންދާ ނަމަ ނިއުކްލިއާ ހަނގުރާމައެއް ފެށިދާނެ ކަމުގެ އިންޒާރު ނޯތު ކޮރެއާ އިން ދީފި އެވެ.
އދ.ގައި ހުންނަ ނޯތު ކޮރެއާގެ މަންދޫބުގެ ނައިބް ކިމް އިން ރިއޯން ނޫސްވެރިންނާ ވާހަކަ ދައްކަވަމުން ވިދާޅުވީ ކޮރެއާ ޕެނިންސުލާ ސަރަހައްދުގައި އެމެރިކާ އިން އަސްކަރީ ގޮތުން ބާރުގަދަ ކުރަމުންދާ ނަމަ ނުރައްކާތެރި ހާލަތަކަށް ދާނެ ކަމަށާއި ކޮންމެ ވަގުތަކު ވެސް ނިއުކްލިއާ ހަނގުރާމައެއް ފަށަން ޖެހިދާނެ ކަމަށެވެ. އަދި އެފަދަ ކަމެއް ދިމާވެއްޖެ ނަމަ ދުނިޔޭގެ ހަމަޖެހުމާއި ސުލްހަ ގެއްލިގެންދާނެ ކަމަށް ވެސް އޭނާ ވިދާޅުވި އެވެ.
ނޯތު ކޮރެއާ އިން އިންޒާރު ދިން އިރު އެމެރިކާގެ ނައިބް ރައީސް މައިކް ޕެންސް ވަނީ ސައުތު ކޮރެއާ އަށް ވަޑައިގެންފަ އެވެ. އަދި އެމެރިކާގެ އަސްކަރީ ބާރު ހުރި މިންވަރު ޓެސްޓް ކުރުމުގެ ފުރުސަތު ނުދިނުމަށް ނޯތު ކޮރެއާ އަށް ވަނީ އިންޒާރު ދެއްވައިފަ އެވެ.
ނޯތު ކޮރެއާ ސަފީރު ވިދާޅުވީ އެމެރިކާ އިން އުޅެނީ ދުނިޔޭގެ ސުލްހަ އާއި ހަމަޖެހުން ނަގާލަން ކަމަށެވެ. އަދި މިނިވަން ގައުމަކަށް އަރައިގަތުމަށް އެމެރިކާ އިން މަސައްކަތް ކުރަމުންދާ ކަމަށް ވަނީ ތުހުމަތުކޮށްފަ އެވެ.
"އެމެރިކާއާ އެކު ކޮންމެ ބާވަތެއްގެ ހަނގުރާމައެއް ކުރަން ޖެހުނަސް ނޯތު ކޮރެއާ އޮތީ ތައްޔާރަށް. އެމެރިކާ އިން ނިއުކްލިއާ ހަމަލާއެއް ދީފި ނަމަ ރައްދުގައި ނިއުކްލިއާ ހަމަލާ ދޭނަން،" ނޯތު ކޮރެއާ ސަފީރު ވިދާޅުވި އެވެ.
އެމެރިކާގެ މަތިންދާ ބޯޓު އުފުލާ މަނަވަރު ކާލް ވިންސަން ސްޓްރައިކް ގްރޫޕް މިހާރު ވަނީ ކޮރެއާ ޕެނިންސުލާ އަށް ފޮނުވައިފަ އެވެ. ނޯތު ކޮރެއާ ސަފީރު ކިމް ވިދާޅުވީ އެމެރިކާ އިން ކުރަން އުޅޭ މޮޔަކަންތައް މިހާރު މާ ސީރިއަސް ލެވެލްއަކަށް ހިނގައްޖެ ކަމަށެވެ.
އދ.ގެ ތަރުޖަމާން ސްޓެފަން ޑުޖާރިޗް ވިދާޅުވީ ކޮރެއަން ޕެނިންސުލާގެ މަޝްރަހު ހޫނުވަމުންދާތީ ކަންބޮޑުވާ ކަމަށެވެ.