ބޭންކް އޮފް މޯލްޑިވްސްގެ މުވައްޒަފުންނަށް، ބައިނަލްއަގުވާމީ ފެންވަރުގައި ބަލައިގަންނަ ފަންނީ ތަމްރީނުތައް ހޯދައިދިނުމަށް ބީއެމްއެލް
އެކަޑަމީން އިންސެފް ޔުނިވާސިޓީއާ އެކު ސްޓްރެޓެޖިކް ޕާޓްނާޝިޕެއް ހަދައިފި އެވެ.
މި އެއްބަސްވުމުގެ ދަށުން، އިސްލާމިކް
ފައިނޭންސްގެ ދާއިރާއިން އިންސެފް ޔުނިވާސިޓީން ހިންގާ ބައިނަލްއަގުވާމީ ފެންވަރުގެ
ޕްރޮގްރާމްތަކާއި، އެގްޒެކެޓިވް އެޑިއުކޭޝަން، ޕްރޮފެޝަނަލް ސެޓިފިކޭޝަން އަދި ހާއްސަ
ތަމްރީނުތައް ބޭންކުގެ މުވައްޒަފުންނަށް ލިބޭނެ އެވެ. އަދި މާލީ ދާއިރާގެ
ކުރިއެރުމަށް ބޭނުންވާ މައުލޫމާތު ހިއްސާކުރުމާއި، ލީޑަޝިޕް ތަރައްގީކުރުމާއި، ސިނާއީ
ގުޅުންތައް ބަދަހިކުރުމުގެ ފުރުސަތުތައް ވެސް މި އެއްބަސްވުމުގެ ދަށުން ފަހިކޮށްދޭނެ އެވެ.
ބީއެމްއެލް އެކެޑަމީ އަކީ ބައިނަލްއަގުވާމީ
ފެންވަރުގައި ބަލައިގަންނަ ތައުލީމާއި ތަމްރީނު މެދުވެރިކޮށް، ބޭންކިން ދާއިރާގެ ފަންނީ
މީހުން ތަރައްގީކުރުމަށް ބޭންކުން ގާއިމުކޮށްފައިވާ އެކަޑަމީއެކެވެ. މީގެ ކުރިން ވެސް
މި އެކެޑަމީން ވަނީ މުވައްޒަފުންނަށް އަމާޒުކޮށްގެން ތަމްރީނު ޕްރޮގްރާމްތައް
ހިންގުމަށް އޭޝިއަން އިންސްޓިޓިއުޓް އޮފް ޗާޓަޑް ބޭންކާސް، ސިންގަޕޯ މެނޭޖްމަންޓް
ޔުނިވާސިޓީއާ އެކު އެއްބަސްވުންތައް ގާއިމުކޮށްފަ އެވެ.
ރާއްޖޭގެ ބޭންކިން އަދި މާލީ
ހިދުމަތްތަކުގެ ދާއިރާ ކުރިއެރުވުމަށް އެހީތެރިވެދޭނެ ފެންވަރު ރަނގަޅު އުނގެނުމުގެ
ފުރުސަތުތައް ފުޅާކުރުމަށްޓަކައި، ބީއެމްއެލް އެކަޑަމީން ދަނީ ދުނިޔޭގެ ކުރިއަރާފައިވާ
މުއައްސަސާތަކާ އެކު މަސައްކަތްކުރަމުންނެވެ.