17 އެޕްރީލް 2017 - 05:57
ޒަހަމްވުމުން އަޅަންވީ ބޭސް ބުނެދީ އަދި ބޭސް އެޅުމަށް ފަހު ރަނގަޅުވަމުން އަންނަ މިންވަރު ޑޮކްޓަރުންނަށް ވަގުތުން އަންގައިދޭ "ސްމާޓް ބެންޑޭޖް" އެއް ކުރިއަށް އޮތް 12 މަސް ދުވަހުގެ ތެރޭ ބޭނުންކުރަން ފެށިދާނެ ކަމަށް ސައިންސްވެރިން ބުނެފި އެވެ.
ޒަހަމްވެފައިވާ ތަނަށް ބޭނުންވާ ފަރުވާ އާއި ފަރުވާއިން އަންނަ ބަދަލުތައް މި ބެންޑޭޖުން ޑޮކްޓަރުންނަށް ވަގުތުން އަންގައިދޭނީ ފައިވް-ޖީ ޓެކްނޮލޮޖީ ބޭނުންކޮށްގެންނެވެ. މީގެ އިތުރުން ބަލި މީހާގެ ހަރަކާތްތައް ވެސް މިއިން މޮނިޓަކުރާނެ އެވެ.
ސްވަންސީ ޔުނިވަސިޓީގެ އިންސްޓްޓިއުޓް އޮފް ލައިފް ސައިންސް އިން ތަރައްގީކުރާ މި ބެންޑޭޖް، އަޖުމަ ބެލުމުގެ ގޮތުން އަހަރެއްހާ ދުވަހުގެ ތެރޭގައި ބޭނުންކުރަން ފެށޭނެ ކަމަށް އެ މަސައްކަތުގައި ބައިވެރިވާ ސައިންސްވެރިން ބުންޏެވެ.
ސައިންސާއި އާ އީޖާދުތަކުގެ އެންމެ ކުރީ ސަފުން ޖާގަ ހޯދުމަށް އިނގިރޭސި ވިލާތުގެ ސްވަންސީގައި ހިންގާ ސްވަންސީ ބޭ ސިޓީ ޑީލްގެ، 1.3 ބިިލިއަން ޕައުންޑުގެ ފަންޑުން އެހީވާ މި ޕްރޮޖެކްޓާ ބެހޭ ގޮތުން އިންސްޓްޓިއުޓްގެ ޗެއާމަން ޕްރޮފެސަރު މާކް ކްލެމެންޓް ވިދާޅުވީ ފައިވް-ޖީ ޓެކްނޮލޮޖީއަކީ ހުޅުވިފައިވާ ވަރަށް ބޮޑު ފުރުސަތެއް ކަމަށެވެ.
"ސިއްހީ ހިދުމަތްތައް ކުރިއަރުވަން ބަލާއިރު، ފައިވްޖީގެ ވަރުގަދަ ބޭންޑްވިޑްތަކީ ވަރަށް ފަހި ފުރުސަތެއް،" ކްލެމެންޓް ވިދާޅުވި އެވެ.
އޭނާ ސިފަކުރެއްވި ގޮތުގައި މިއީ "އިންޓެލިޖެންޓް" ބޭސްގަނޑެކެވެ. އޭގައި ބޭނުންކޮށްފައިވާ ނެނޯ-ޓެކްނޮލޮޖީން ޒަހަމްގެ ހާލަތު އަބަދު އެނގިއެނގި ހުންނާނެ އެވެ. އަދި އެއާ ގުޅާލާފައިވާ ފައިވްޖީ އިންފްރާސްޓްރަކްޗާއިން މީހާގެ ހަރަކާތްތެރިކަމާއި ހުރި ތަން ފަދަ ކިތަންމެ މައުލޫމާތެއް ފޯނު މެދުވެރިކޮށް އަބަދު ވެސް އަންގައިދޭނެ އެވެ.
ސައިންސްވެރިން ފާހަގަކުރެއްވި ގޮތުގައި މީގެ އެންމެ މުހިންމު ކަމަކަށް ވާނީ، ޒަހަމަށް އަންނަމުންދާ ބަދަލުތަކާ ގުޅޭ ގޮތުން ފަރުވާއަށް ގެންނަންޖެހޭ ބަދަލުތައް ވެސް އެނގުމެވެ.