މާލެ ކައިރިން ދެ ލޯންޗެއް ޖެހި މިއަދު ބޮޑު އެކްސިޑެންޓެއް ހިނގައި، ދެ މީހަކަށް ބޮޑެތި އަނިތާކެއް ވެއްޖެ އެވެ.
އެމްއެންޑީއެފުން ބުނީ ދެ މީހުންނާ އެކު، ދަތުރުކުރަމުން އައި "ޓުއާ ގާޑް" ނަމަކަށް ކިޔާ ލޯންޗެއް އެކްސިޑެންޓު ވެގެން އެހީތެރިކަން ފޯރުކޮށްދެމުން އަންނަ ކަމަށެވެ.
އެކްސިޑެންޓުވީ ވިލިނގިލިން ގިރިލަންކަންފުއްޓަށް ދަތުރުކުރަމުން ދިޔަ ލޯންޗެއް ކަަމަށާއި ލޯންޗު އެކްސިޑެންޓުވީ ވިލިނގިއްޔާ ވަރަށް ކައިރީގައި އޮއްވާ ކަމަށް އެމްއެންޑީއެފުން ބުންޏެެވެ.
އެކްސިޑެންޓުވި ލޯންޗުގެ ކުރީކޮޅު ފުނޑިފައި-- ފޮޓޯ: ފަޔާޒު މޫސާ | މިހާރު
އެމްއެންޑީއެފުން ބުނި ގޮތުގައި އެ ހާދިސާ ހިނގި ވަގުތު ލޯންޗުގައި ތިބީ ދެ ފަޅުވެރިންނެވެ. އެ ދެ މީހުންނަށް ބޮޑެތި އަނިޔާތަކެއް ވެގެން އައިޖީއެމްއެޗްގައި ފަރުވާދެމުން އަންނަ ކަމަށް ކަމަށް ވެސް އެމްއެންޑީއެފުން ބުންޏެވެ.
އައިޖީއެމްއެޗުގެ މީޑިއާ އޮފިޝަލް ވިދާޅުވީ އެކްސިޑެންޓުވެގެން ފަރުވާއަށް ހޮސްޕިޓަލަށް ގެންދިޔައީ 38 އަހަރުގެ ދިވެހި ފިރިހެނަކާއި 30 އަހަރުގެ ބިދޭސީ ފިރިހެނެއް ކަމަށެވެ. އެ ދެ މީހުންނަށް ވެސް ފަރުވާދެމުން އަންނަނީ އިމަޖަންސީ ރޫމުގައި ކަމަށް އޮފިޝަލް ވިދާޅުވި އެވެ.
އެކަމަކު އެމީހުންނަށް ލިބުނު އަނިޔާގެ ތަފްސީލެއް ވިދާޅެއް ނުވެ އެވެ.
އެކްސިޑެންޓުވި ލޯންޗަށް ގެއްލުންވެފައި: އޭގައި ތިބި ދެ މީހަކަށް އަނިޔާވެގެން ދަނީ ފަރުވާދެމުން-- ފޮޓޯ: ފަޔާޒު މޫސާ | މިހާރު
އެކްސިޑެންޓުގައި އެއް ލޯންޗު ވަނީ ވަރަށް ބޮޑަށް ހަލާކުވެފަ އެވެ. އެ ލޯންޗުގެ ކުރީކޮޅު އެއްކޮށް ވަނީ "ފުނޑުފުނޑުވެފަ" އެވެ.