12 އެޕްރީލް 2017 - 16:07
ރައްޔިތުންގެ މަޖިލިހުގެ ކުއްލި ޖަލްސާއެއް މިރޭ ބާއްވަން ނިންމައިފި އެވެ.
މިއަދުގެ ޖަލްސާ ނިންމަވާލައްވަމުން މަޖިލިހުގެ ރައީސް އަބްދުﷲ މަސީހު ވިދާޅުވީ މިރޭ ނުވައެއް ޖަހާއިރު ޖަލްސާއެއް އޮންނާނެ ކަމަށެވެ.
ނަމަވެސް މި ޖަލްސާގެ އެޖެންޑާ އަދި އިއުލާން ނުކުރާތީ މިރޭ ކުރިއަށް ގެންދާނެ ކަންކަމާ ގުޅޭ ގޮތުން އަދި މައުލޫމާތެއް ނޭނގެ އެވެ. މިކަމާ ގުޅިގެން މަޖިލިހުގެ އިދާރާގެ ބަހެއް ވެސް ވަނީ ލިބޭ ގޮތް ނުވެފަ އެވެ.
އާންމުކޮށް މަޖިލިހުގެ ޖަލްސާތައް ރޭގަނޑު ބާއްވަނީ ވަަރަށް މުހިންމު ކަންކަން ނިންމުމަށެވެ. އެންމެ ފަހުން ވެސް ރޭގަނޑު ޖަލްސާއެއް ބޭއްވީ ވެލާނާ އިންޓަނޭޝަނަލް އެއާޕޯޓުން ފުރާ ފަސިންޖަރުންގެ އަތުން އެެއާޕޯޓް ޑިވެލޮޕްމަންޓް ޗާޖް (އޭޑީސީ) ނެގުމުގެ ބިލް ފާސްކުރުމަށެވެ.
އިދިކޮޅު ބައެއް މެމްބަރުން ވިދާޅުވި ގޮތުގައި މަޖިލިހުގެ ޖަލްސާއެއް މިރޭ ކުއްލިގޮތަކަށް ބާއްވަނީ، އިމާރާތް ކުރުމުގެ ގަވާއިދުތަކާ ހިލާފުވާ ފަރާތްތައް ބޮޑެތި އަދަދުތަކުން ޖޫރިމަނާ ކުރެވޭ ގޮތަށް ސަރުކާރުގެ ފަރާތުން ތިނަދޫ އުތުރު ދާއިރާގެ ޕީޕީއެމް މެމްބަރު ސައުދުﷲ ހިލްމީ މަޖިލިހަށް ހުށަހެޅުއްވި ބިލު ފާސް ކުރުމަށެވެ.
މި ބިލު ވަނީ މަޖިލިހަށް މިއަދު ބަލައިގަނެ، އިތުރަށް ދިރާސާ ކުރަން ގައުމީ ތަރައްގީގެ ކޮމެޓީ އަށް ފޮނުވައިފަ އެވެ.