ދުނިޔޭގެ ކަނޑުތަކާއި ބޯފެނުގެ ވަސީލަތްތަކުގައި މައިކްރޯޕްލާސްޓިކް ނުވަތަ ޕްލާސްޓިކްގެ ކުދި އެތިކޮޅުތައް އިތުރުވަމުންދާ ދިއުމަކީ ތިމާވެށީގެ ބޮޑު ކަންބޮޑުވުމަކަށް ވެފައިވާ މި ދަނޑިވަޅުގައި، މުރަނގަ އޮށަކީ މައިކްރޯޕްލާސްޓިކް ފުރޭނުމަށް ބޭނުންކުރެވިދާނެ ވަރަށް ވަރުގަދަ ވަސީލަތެއްކަން އާ ދިރާސާއަކުން ހާމަވެއްޖެ އެވެ.
އިނގިރޭސިވިލާތާއި ބްރެޒިލްގެ ސައިންސްވެރިންގެ ޓީމަކުން މި މަހު އާންމުކުރިދިރާސާއެއްގައިވާގޮތުގައި، "މިރަކަލް ޓްރީ"ގެ ގޮތުގައި މަޝްހޫރުވެފައިވާ މުރަނގަ ގަހުގެ އޮށުން ތައްޔާރުކުރާ ޕްރޮޓީންއެއް ބޭނުންކޮށްގެން ފެނުގައި ހުންނަ މައިކްރޯޕްލާސްޓިކްގެ 99 ޕަސެންޓާ ގާތްކުރާ މިންވަރަކަށް މަދުކުރެވޭނެ ނުވަތަ ފުރާނާލެވޭނެ އެވެ.
މިއީ، މިހާރު ފެން ސާފުކުރުމަށް ބޭނުންކުރާ އަގުބޮޑު އަދި ކެމިކަލް ގިނަ ގޮތްތަކާ އަޅާބަލާއިރު ވަރަށް އަގުހެޔޮ އަދި ތިމާވެއްޓާ ރައްޓެހި ގޮތެކެވެ.
މުރަނގަ އޮށް: މުރަނގަ އޮށުން ފެނުގައި ހުންނަ މައިކްރޯޕްލާސްޓިކް ސާފުކުރެވޭކަން ވަނީ ހާމަވެފައި.
އެ ދިރާސާގައި ބުނެފައިވާ ގޮތުގައި، މުރަނގަ އޮށުގައި ހުންނަ ޕްރޮޓީންއަކީ "ޕޮޒިޓިވް ޗާޖު" ހުންނަ އެއްޗެކެވެ. މައިކްރޯޕްލާސްޓިކްގެ ގިނަ އެތިކޮޅުތަކުގައި ހުންނަނީ "ނެގެޓިވް ޗާޖު" އެވެ. އެހެންވެ، މުރަނގަ އޮށުގެ ޕްރޮޓީން ފެނުގެ ތެރެއަށް އެޅުމުން، މައިކްރޯޕްލާސްޓިކްތައް އެ ޕްރޮޓީންއާ ތަތްވެ، ބޮނޑިވެ އެވެ.
މިހެންވުމުގެ ސަބަބުން ޕްލާސްޓިކް އެތިކޮޅުތައް ފެނުގެ އަޑިއަށް ފެތުރުން ނުވަތަ އާދައިގެ ފުރޭންޏަކުން ފުރޭނުމުން ފަސޭހައިން ވަކިކޮށްލެވެ އެވެ.
މި ދިރާސާގައި ބައިވެރިވި ސައިންސްވެރިންސީއެންއެންއަށް ބުނީ މި ހޯދުމުގެ ސަބަބުން، ތަރައްގީވަމުން އަންނަ ގައުމުތަކުގައި ސާފު ބޯފެން ފޯރުކޮށްދިނުމަށް ބޮޑު އެހީތެރިކަމެއް ލިބޭނެ ކަމަށެވެ.
މުރަނގަ ގަހަކީ، ހާއްސަކޮށް ހޫނުގަދަ ގައުމުތަކުގައި ވަރަށް ފަސޭހައިން ހެދޭ ގަހަކަށް ވެފައި، އޭގެ އޮށަކީ އެއްވެސް ގެއްލުމެއް ނެތް ގުދުރަތީ އެއްޗަކަށް ވުމުން މިއީ ދެމެހެއްޓެނިވި ހައްލެއް ކަމަށް ސައިންސްވެރިން ބުންޏެވެ.
މުރަނގަ އޮށް ހިއްކާފައި: މުރަނގަ އޮށުން ފެނުގައި ހުންނަ މައިކްރޯޕްލާސްޓިކް ސާފުކުރެވޭކަން ވަނީ ހާމަވެފައި.
މުރަނގަ އޮށަކީ ފެނުގައި ހުންނަ ބެކްޓީރިއާ އާއި ނަަޖިސް ސާފުކުރުމަށް އިހުޒަމާނުން ފެށިގެން ވެސް ބޭނުންކުރަމުން އަންނަ އެއްޗެކެވެ. ނަމަވެސް، މި އާ ދިރާސާއިން ކަށަވަރުވީ ޕްލާސްޓިކްގެ ސަބަބުން ކުރިމަތިވެފައިވާ ތިމާވެށީގެ ނުރައްކަލުން ސަލާމަތްވުމަށް ވެސް މި ބޭނުންކުރެވިދާނެ ކަމެވެ.
ސައިންސްވެރިން މިހާރު މަސައްކަތް ކުރަމުން އަންނަނީ މި ނިޒާމު ގޭބިސީތަކުގެ ފެން އިސްކުރުތަކުގައި ބޭނުންކުރެވޭނެ ފަދަ ފަސޭހަ ގޮތްތަކެއް އީޖާދުކުރުމަށެވެ.