12 އެޕްރީލް 2017 - 10:13
ވޮޝިންޓަން (އެޕްރީލް 12) - އެމެރިކާގެ ޔުނައިޓެޑް އެއާލައިންސްގެ ބޯޓަކުން ގަދަބާރުން ޕަސިންޖަރަކު ބޭލި މައްސަލައިގައި އެ އެއާލައިނުން މައާފަށް އެދިއްޖެ އެވެ.
އެއާލައިނުގެ ސީއީއޯ އޮސްކާ މުނޯޒް ވިދާޅުވީ ބޯޓުން ގަދަބާރުން ޕަސިންޖަރަކު ބާލަން އުޅުމުގެ ތެރޭގައި އޭނާ އަށް އަނިޔާ ލިބުމަކީ އުނދަގޫވި ހާދިސާއެއް ކަމަށެވެ. އަދި ސޯޝަލް މީޑިއާގައި އެ މަންޒަރުތައް ފެތުރިގެން ދިއުމާ އެކު ކުންފުންޏަށް ލިބުނު ހުތުރު ނަމުން ސަލާމަތްކޮށް، ދެން އެފަދަ ކަމެއް ނުހިނގާނެ ގޮތަށް ކަންކަން އިންތިޒާމް ކުރާނެ ކަމަށް ސީއީއޯ ވިދާޅުވި އެވެ.
ޝިކާގޯ އިން ކެންޓަކީ އަށް އާދިއްތަ ދުވަހު ހަވީރު ފުރަން އޮތް އޯވަބުކްވެފައިވާ ފްލައިޓުން ހަތަރު ޕަސިންޖަރަަކު އަމިއްލަ ރުހުމުގައި ފޭބުމަށް އެންގި އެވެ. ބޯޓުން ފައިބަން އެންގި ހަތަރު މީހުންގެ ތެރޭން ތިން މީހަކު ވޮލަންޓިއާ ކުރި ނަމަވެސް ޗައިނީޒް ދަރިކޮޅުގެ ޑޮކްޓަރެއް ކަމަށްވާ ޑޭވިޑް ޑާއޯ ބުނީ ޖެހިގެން އަންނަ ދުވަހު ހޮސްޕިޓަލުގެ ޑިއުޓީ އަށް ނުކުންނަން ޖެހޭތީ ބޯޓުން ފޭބެން ނެތް ކަމަށެވެ. ކުޑަ ވަގުތު ކޮޅެއްގެ ތެރޭގައި ސެކިއުރިޓީން ވަނީ ޑާއޯ ގަދަބާރުން ސީޓުން ނެގުމަށް ފަހު ދަމާފައި ބޯޓުން ބާލައިފަ އެވެ. އޭނާގެ މޫނުމަތިން ވަނީ ލޭ ފައިބައިފަ އެވެ.
ޑާއޯގެ އާއިލާ އިން ނެރުނު ބަޔާނެއްގައި ވަނީ އެއާލައިނުން ގަދަބާރުން ބޭލުމާ އެކު އާއްމުންގެ ފަރާތުން ލިބުނު ހަމްދަރުދީ އަށް ޝުކުރު އަދާކޮށްފަ އެވެ. ޑާއޯ އަށް މިހާރު ދަނީ ޝިކާގޯ ހޮސްޕިޓަލުގައި ފަރުވާ ދެމުންނެވެ.
މުނޯޒް ކުރިން ނެރުއްވި ބަޔާނެއްގައި ވަނީ އެއާލައިނުގެ މުވައްޒަފުން ދިފާއު ކުރައްވައިފަ އެވެ. އަދި ޕަސިންޖަރަކު ގަދަބާރުން ބޯޓުން ބާލަން ޖެހުނީ އޭނާ ގަދަ ދެއްކުމުން ކަމަށް ވަނީ ވިދާޅުވެފަ އެވެ. އެހެންވެ ޝިކާގޯ އޭވިއޭޝަން ސެކިއުރީ އޮފިސަރުން ބޯޓަށް އަރުވައިގެން ޕަސިންޖަރު ބޭލުން ނޫން ގޮތެއް ނެތް ކަމަށް ވެސް މުނޯޒް ވިދާޅުވި އެވެ. ޑާއޯ ބޯޓުން ބޭލުމުގައި ހަރަކާތްތެރިވި އެއް ސިކިއުރިޓީ އޮފިސަރަކު މިހާރު ވަނީ ސަސްޕެންޑްކޮށްފަ އެވެ.