09 އެޕްރީލް 2017 - 15:24
ސިޔާސީ ގޮތުން ހިނގާ ކަމެއްގެ ޚަބަރު ފެތުރުމާ އެކު ސޯޝަލް މީޑިއާގެ ވިސްނުންތެރިން އެކި ގޮތްގޮތަށް އެކަން ތަރުޖަމާކޮށް، އެކި ސިފަސިފައިގައި އާންމުންނަށް ދައްކާލަ އެވެ. މިފަހަރު ސޯޝަލް މީޑިއާގެ ތެރެއިން އެންމެ ބޮޑަށް ޖޯކު ޖެހީ މ. ކުނޫޒް ކުރިމަތިން، ފަނޑިޔާރު މަގު، ހަމަ ކުއްލިއަކަށް މަގު ހަދަން ފެށުމުން އެކަމަށެވެ.
ސަރުކާރާ ދެކޮޅު ފަރާތްތަކުގެ މައި ޖަގަހަ ކަމަށްވާ ކުނޫޒް ކުރިމައްޗަށް ހައުސިން މިނިސްޓްރީގެ ބުލްޑޯޒަރު ވައްޓާލީ، ޖޭޕީގެ ލީޑަރު ގާސިމް އިބްރާހިމްގެ ބަންދުގެ މުއްދަތު އިތުރުކުރަން ކޯޓަށް ހާޒިރުކުރުމާ ދިމާކޮށް އެތަަނުގައި ހަރަކާތްތައް ހިންގަމުން ދިޔަ ދަނޑިވަޅުގަ އެވެ.
ރީތިކޮށް އޮތް މަގެއް، ރަސްމީ ބަންދު ދުވަހެއްގެ ރޭގަނޑު ކުއްލިއަކަށް، ހަލާކުކޮށްލައި، ގާތައް ނަގަން ފެށީ ސިިޔާސީ ކަމަކަށް އަމާޒުކޮށްގެން ނޫން ކަމަށް ދޭހަވާ ގޮތަށް ސަރުކާރުން ވާހަކަ ދައްކަ އެވެ. އާންމުންގެ ޚިިޔާލު ވަރަށް ތަފާތެވެ.
އާންމުންގެ މަޖާ ޚިޔާލުތަކުގައި ދައްކައިދެނީ އެ މަގުގައި އެއާޕޯޓާއި ބިޔަ ބަނދަރުތަކާއި ޕާކްތަކާއި ސްވިމިން ޕޫލް ފަދަ ތަންތަން ތަރައްގީކޮށްފައިވާ ތަނެވެ.
މަގު ހެދުމުގެ މަސައްކަތް އެއް ބަޔަކު ސިފަކުރަނީ ސިޔާސީ ގޮތުން ކުރި ތާކުންތާކު ނުޖެހޭ ކަމެއްގެ ގޮތުގަ އެވެ. ހަމަ މިފަދަ ކަމެއް، ކުރީގެ ރައީސް މުހައްމަދު ނަޝީދުގެ ވެރިކަމުގައި ވެސް ފެނުނެވެ. އޭރު ސަރުކާރާ ދެކޮޅަށް ކުރި ސިލްސިލާ މުޒާހަރާތަކުގައި އެމްއެމްއޭ ކަންމައްޗަށް ކޮންމެ ރެޔަކު އެއްވާތީ އެތަނުގައި ޓިނު ޖަހައި ބަންދުކުރުމަށް ފަހު ބުނީ އެތަން ތަރައްގީކުރަން ފެށީ ކަމަށެވެ. އެކަމަކު އެއީ ވެސް ސިޔާސީ ގޮތުން ކުރި ޖެއްސުމެއްކަން އެންމެންނަށް ވެސް އެނގެ އެވެ.
ކުނޫޒް ކައިރި އެހާ "ކުއްލި ގޮތަކަށް" ހަދަނީ "ތަރައްގީގެ ބޮޑު މަޝްރޫއެއް"ގެ ގޮތުގައި ސިފަކޮށްފައިވާ ފޮޓޯތައް ސޯޝަލް މީޑިއާގައި މިހާރު އަންނަނީ ދައުރުވަމުންނެވެ. އެއް ފޮޓޯއަކުން ފެންނަނީ ވަރަށް ރީއްޗަށް ހަދާފައިވާ ޕާކެކެވެ. ރީއްޗަށް ގަސް ހައްދައި ކުޑަކުދިން ކުޅޭ އެއްޗެހި ވެސް ބަހައްޓާފައިވެ އެވެ.
އެއާކްރާފްޓް ކެރިއަރަށް ވަދެވޭ ވަރުގެ ބިޔަ ބަނދަރަކަށް ވެސް ކުނޫޒް ދޮރުމަތި ބަދަލުކޮށްލާފައިވެ އެވެ. ފެންނަނީ އެއާކްރާފްޓް ކެރިއަރެއް ވަދެގެން އަންނައިރު އެހެން މަނަވަރެއް ވެސް އޭގެ ފަހަތުގައި އޮއްވަ އެވެ. މަގުގެ ދެ ފަރާތު ދުވާރުމަތިން މީހުން ހިނގާލާފައި އުޅޭތީ ފެނެ އެވެ.
ކުނޫޒް ކުރިމަތީ އޮތް މަގަށް، ބިޔަ މަތިންދާބޯޓަކަށް ނުޖެއްސޭނެ އެވެ. އެކަމަކު އެއް ބަޔަކު އެތަން ސިފަކުރަނީ ބޮއިން މަރުކާގެ ބިޔަ މަތިންދާބޯޓުތައް ޖެއްސޭ އެއާޕޯޓެއްގެ ގޮތުގަ އެވެ. ބޯޅަދަނޑާއި ސްވިމިންޕޫލް ފަދަ ތަންތަން ވެސް ހަދާފައި އެބަ ހުއްޓެވެ.
އެތަނުން ތެޔޮވަޅެއް ވެސް ފެނިއްޖެ އެވެ. މަގުން ނެގި ގާތަށް ޑޮލަރު ބޮނޑިތަކުގެ ގޮތުގައި ވެސް ސިފަކޮށްފައިވެ އެވެ. އައިސް ސްކޭޓް ވެސް ކުރަނީ އެވެ.
ސަރުކާރުން ތަރައްގީގެ އެކި މަޝްރޫއުތައް އެބަ ހިންގަ އެވެ. ކުނޫޒު ދޮރު މައްޗަށް ވެއްދި ބުލްޑޯޒަރާ އެކު، ތަރައްގީގެ މަޝްރޫއުތައް ސޯޝަލް މީޑިއާގެ ހަރަކާތްތެރިން ދައްކާލި ގޮތުން އެތައް ބަޔަކު ދަނީ ހެމުންނެވެ.