އައްޑޫ ފޭދޫ ބަނދަރު ބޭރުގައި އަޅާފައި އޮއްވާ މިއަދު ރޯވި ޑައިވިން ދޯނި ފެތިއްޖެ އެވެ.
އެމްއެންޑީއެފުން މިރޭ ބުނީ، މައިނާ ސަފާރީގެ ޑައިވިން ދޯނީގައި ރޯވިކަމުގެ ރިޕޯޓް މިއަދު މެންދުރު ފަހު ލިބުމާ އެކު، އަލިފާން ނިއްވުމުގައި ސަދަން އޭރިއާ ކޮމާންޑު، އައްޑޫ ހިތަދޫ ފަޔާ ސްޓޭޝަންގެ ފަޔާފައިޓަރުން ހަރަކާތްތެރިވި ކަމަށެވެ.
އަލިފާން ނިއްވުމުގެ މަސައްކަތް ކުރަމުން ދަނިކޮށް މެންދުރު ފަހު 3:30 ހާއިރު އެ ދޯނި ކަނޑ އަޑިއަށް ގޮސްފައިވާ ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނީ އެ ހާދިސާގައި އެކެއްގެ ފައި ފިހިގެން ފޭދޫ ސިއްހީ މަރުކަޒުގައި ފަރުވާ ދިނުމަށް ފަހު، މިހާރު ދޫކޮށްލާފައިވާ ކަމަށެވެ.
ޑައިވިން ދޯނީގައި އަލިފާން ރޯވުމުން އެ ވަގުތު ދޯނީގައި ތިބި މީހުން އެރީ އެ ދޯނި ކައިރީގައި އޮތް ސަފާރީއަކަށް ކަމަށް އެމްއެންޑީއެފުން ބުންޏެވެ.
ރަށުތެރޭގައި ދެއްކެވޭ ވާހަކަތަކާ ހަވާލާދީ، ފޭދޫ ކައުންސިލަރަކު "މިހާރު" އަށް ވިދާޅުވި ގޮތުގައި ޑައިވިން ދޯނީގައި އަލިފާންގަނޑު އިތުރަށް ފެތުރުނީ ގޭސް ފުޅިއެއް ގޮވައިގެންނެވެ. އެ ހާދިސާގައި އެ ދޯނި ވަނީ ބޭނުން ނުކުރެވޭ ވަރަށް އަނދައިފަ އެވެ.