އީރާނަށް އެމެރިކާ އާއި އިޒްރޭލުން ދެމުން ގެންދާ ހަމަލާތަކުގެ ރައްދުގައި، އަވަށްޓެރި ގައުމުތަކުގައި ހުރި އެމެރިކާގެ ތަންތަނަށް އީރާނުން ދިން ހަމަލާތައް ހުއްޓާލީ ކަމުގެ އިޝާރާތެއް މިއަދު ދިން ނަމަވެސް ޔޫއޭއީ އާއި ގަތަރާއި ބަހްރެއިނަށް މިރޭ ވެސް ހަމަލާތަކެއް ދީފި އެވެ.
ޔޫއޭއީން ބުނީ އީރާންގެ ޑްރޯން އަދި މިސައިލް ހަމަލާތަކެއް އައި ކަމަށާއި އެ ހުރިހާ ހަމަލާއެއް ވެސް އިންޓަސެޕްޓުކޮށް ނާކާމިޔާބުކޮށްލާފައިވާ ކަމަށެވެ.
ގަތަރުގެ ވެރިރަށް ދޯހާގައި ތިބި އޭއެފްޕީގެ ނޫސްވެރިން ބުނީ ގޮވުންތަކެއްގެ އަޑު އިވިފައިވާ ކަމަށާއި އަދި ދޯހާގެ މެދުތެރެއިން ސައިރެންގެ އަޑު ވެސް އިވުނު ކަމަށެވެ.
މީގެ އިތުރުން ބަހްރެއިންގެ މަނާމާއިން ވެސް ވަނީ ބާރުގަދަ ގޮވުންތަކެއްގެ އަޑު އިވިފަ އެވެ.
މި ހަމަލާތަކަށް ފަހު އީރާނުން ބުނީ އެ ގައުމުން ހަމަލާ ދެނީ ދުޝްމަނުންގެ މަގާމުތަކަށް ކަމަށެވެ. އަދި އަވަށްޓެރި ބައެއް ގައުމުތައް ތިބީ ދުޝްމަނުންގެ ދަށުވެފައި ކަމަށް ބުންޏެވެ. އަދި ކުރިއަށް އޮތް ތަނުގައި ވެސް، އީރާނަށް ހަމަލާދޭން ބޭނުންކުރާ ތަންތަނަށް ހަމަލާ ދެމުން ގެންދާނެ ކަމަށް ބުންޏެވެ.
އީރާންގެ ރައީސް މަސްއޫދު ޕެޒެޝްކިއަން މިއަދު ދެއްވި ބަޔާނެއްގައި ވަނީ އީރާނަށް ހަމަލާދޭން ގައުމުގެ ސަރަހައްދު ބޭނުން ނުކުރާ ނަމަ އީރާނުން އަވަށްޓެރި ގައުމަކަށް ދެން ހަމަލާ ނުދޭނެ ކަމަށެވެ. އަދި މިހާތަނަށް ދީފައިވާ ހަމަލާތަކާ ގުޅިގެން ވަނީ މާފަށް ވެސް އެދިވަޑައިގެންފަ އެވެ.