ރާއްޖޭގެ އެންމެ ބޮޑު އެއް ގޭމިން ޕްލެޓްފޯމް، ދިރާގު ގޭމާސް ގިލްޑް (ޑީޖީޖީ)އިން ކުރިއަށް ގެންދާ "ރޯދަ ކުއެސްޓް" ކާމިޔާބުކަމާ އެކު ފަށައިފި އެވެ.
އަންނަ ހޯމަ ދުވަހުގެ ނިޔަލަށް، ކުރިއަށް ގެންދާ މި ހަރަކާތަކީ ގޭމިން ކޮމިއުނިޓީ އަށް އަމާޒު ކޮށްގެން ތަފާތު ގޭމިން ތަޖުރިބާތަކެއް ފޯރުކޮށްދިނުމަށް ބާއްވާ ހަރަކާތެކެވެ. މި ފޯރިގަދަ މުބާރާތުގައި މިހާތަނަށް 200 އަށް ވުރެ ގިނަ ކުޅުންތެރިން ވަނީ ބައިވެރިވެފަ އެވެ.
މި މުބާރާތުގެ ކުޅޭ މަގުބޫލު ގޭމްތަކަކުގެ ތެރޭގައި ބްރޯލްހާލާ، މޮބައިލް ލެޖެންޑްސް: ބޭންގް ބޭންގް، އީއޭއެފްސީ 26 އަދި ޓެކެން 8 ފަދަ ގޭމްތައް ހިމެނެ އެވެ. މި ހަރަކާތް ފަރުމާކޮށްފައިވަނީ ހުރިހާ ފެންވަރެއްގެ ގޭމަރުންނަށް ބައިވެރިވެވޭ ފަދަ ގޮތަކަށެވެ.
ދިރާގުން ބުނީ ކޮންމެ ރެއަކު ވެސް ރޭގަނޑު 9 އިން މެންދަމު 12 އަށް ކުރިއަށް ގެންދާ މި ހަރަކާތަކީ، ގޭމް ކުޅުމަށް ޝައުގުވެރިވާ މީހުން އެއްތަނަކަށް ޖަމާވެ، ވާދަވެރި މާހައުލެއްގައި ހުނަރު ދައްކާލުމަށާއި އިޖުތިމާއީ ގުޅުން ބަދަހިކުރުމަށް ހުޅުވާލާފައިވާ ފުރުސަތެއް ކަމަށެވެ.
މިއީ ރާއްޖޭގެ ފުޅާވަމުން އަންނަ އީ-ސްޕޯޓްސް ގެ ސަގާފަތް ތަޖުރިބާ ކުރުމަށް ލިބޭނެ ރަނުގެ ފުރުސަތެއް ކަމަށް ވެސް އެ ކުންފުނިން ބުންޏެވެ.
މި އިވެންޓުގެ ބައިވެރިންނަށް، އިވެންޓުގެ ޕާޓްނަރުން ކަމަށްވާ މިނިސޯ، ޝީޝާ، މެގަޗިޕް އަދި ވިލާމާޓުން ހުށަހަޅާފައިވާ ހާއްސަ އިނާމުތަކެއް ހޯދުމުގެ ފުރުސަތު ލިބޭނެ އެވެ.
އިވެންޓަށް ޒިޔާރަތްކުރާ މީހުންނަށް ހާއްސަ ކޮށްގެން ކުރިއަށް ގެންދާ އެކި ހަރަކާތްތަކުގައި ބައިވެރިވެގެން ވެސް އަގުހުރި އިނާމުތަކެއް ހޯދުމުގެ ފުރުސަތު ވަނީ ހުޅުވާލައިފަ އެވެ.
މި މުބާރާތްތަކުގައި ބައިވެރިވާން ބޭނުންވާ ފަރާތްތަކަށް ޑީޖީޖީ.އެމްވީ މެދުވެރިކޮށް ރަޖިސްޓަރީ ކުރެވޭނެ އެވެ. އަދި އިވެންޓަށް ޒިޔާރަތްކުރާ މީހުންނަށް އެ ތަނުގައި ތައްޔާރު ކޮށްފައިވާ ގޭމް ސްޓޭޝަންތަކުގައި ހިލޭ ގޭމް ކުޅުމުގެ ފުރުސަތު ވެސް ލިބޭނެ ކަމަށް ދިރާގުން ބުންޏެވެ.
ރާއްޖޭގެ އެންމެ ބޮޑު އެއް ގޭމިން ޕްލެޓްފޯމް، ޑީޖީޖީ އިން އަންނަނީ އެކި ކަންކޮޅުތަކުގައި އީ-ސްޕޯޓްސް ކުރިއެރުވުމަށް ގިނަ މަސައްކަތްތަކެއްކޮށް، ކުރިމަގުގެ އޮތް ޖީލުތަކުގެ ގޭމިން ހުނަރުތައް އިތުރުކުރުމަށް މުހިންމު މަސައްކަތްތަކެއް ކުރަމުންނެވެ.
ޑީޖީޖީ އިން ކުރިއަށް ގެންދާ ހަރަކާތްތަކުގެ އެންމެ ފަހުގެ މައުލޫމާތުތައް އެ ޕްލެޓްފޯމުގެ ވެބްސައިޓު މެދުވެރިކޮށް ލިބޭނެ އެވެ.