އީރާނަށް ހަމަލާ ދިނުމުގައި ސައޫދީ އަރަބިއްޔާގެ ސަރަހައްދު ބޭނުންކުރުމުގެ ހުއްދަ ނުދޭތީ އެކަމަށް އީރާނުން ޝުކުރު އަދާކޮށްފި އެވެ.
ސައޫދީއަށް އީރާނުން ކަނޑައަޅާފައި ހުންނަވާ ސަފީރު އަލީރިޒާ އިނާޔަތީ މިކަން ފާހަގަކުރައްވައި ޝުކުރު އަދާކުރެއްވީ އޭއެފްޕީއަށް ދެއްވި އިންޓަވިއުއެއްގަ އެވެ.
އެމެރިކާ އާއި އިޒްރޭލުން އީރާނަށް ދެމުން ގެންދާ ހަމަލާތަކުގެ ރައްދުގައި އީރާނުން ގަލްފު ގައުމުތަކުގައިވާ އެމެރިކާގެ ތަންތަނަށް ހަމަލާ ދެމުން ގެންދާއިރު އީރާނާ މެދު އެ ގައުމުތަކުގެ ނުރުހުން ވަނީ ބޮޑުވެފަ އެވެ.
މި އިންޓަވިއުގައި ސަފީރު ވިދާޅުވީ ސައޫދީ އަރަބިއްޔާގެ ވެރިރަށް ރިޔާޟްގައި ހުންނަ އެމެރިކާ އެމްބަސީއަށް ދިން ހަމަލާ އަކީ އީރާންގެ ހަމަލާއެއް ކަމަށް ބުންޏަސް އެއީ ތެދެއް ނޫން ކަމަށެވެ.
"ރިޔާޟްގައި ހުންނަ އެމެރިކާ އެމްބަސީއަށް ހަމަލާ ދިނުމުގައި އީރާންގެ ބައިވެރިވުމެއް ނެތްކަމުގެ ޔަގީންކަންދެން،" ހަމަލާގެ ތުހުމަތު ސައޫދީން އީރާނަށް ކޮށްފައިވަނިކޮށް ސަފީރު ވިދާޅުވި އެވެ.
އޭނާ ވިދާޅުވީ އީރާން ސިފައިން ތަނަކަށް ހަމަލާއެއް ދީފި ނަމަ އެ ހަމަލާއެއްގެ ޒިންމާ އީރާނުން ނަގާނެ ކަމަށާއި އެކަމަކު ރިޔާޟްގައި ހުންނަ އެމެރިކާ އެމްބަސީއަށް ހަމަލާ ދީފައި ނުވާނެ ކަމަށެވެ.
ސަފީރު މިހެން ވިދާޅުވެފައި ވާއިރު ރިޔާޟަށް ދިން ހަމަލާ އައީ އީރާނުން ނޫން ކަމަށް މީގެ ކުރިން ވެސް ބައެއް ރިޕޯޓްތައް ބުނެފައިވެ އެވެ.
އީރާނަށް އެމެރިކާ އާއި އިޒްރޭލުން ހަމަލާ ދެމުން ދާއިރު އީރާންގެ ރައްދު ވެސް ހުއްޓުމެއް ނެތި ދަނީ ކުރިއަށެވެ.
މިދިޔަ ހޮނިހިރު ދުވަހު ހަނގުރާމަ ފެށުނު ފަހުން ގަލްފުގެ ގައުމުތަކުން 13 މީހަކު މަރުވެފައި ވާއިރު އޭގެ ތެރެއިން 11 މީހުންނަކީ އާންމުންނެވެ.
އެމެރިކާގެ ޕެންޓަގަން އިން ވަނީ އެ ގައުމުގެ ސިފައިންގެ ތެރެއިން ހަ
މީހަކު މަރުވެފައި ވާއިރު އޭގެ ތެރެއިން ހަތަރު މީހަކު މަރުވީ ކުވައިތުގައި
ކަމަށް ބުނެފަ އެވެ.
ޔުނައިޓެޑް އަރަބި އެމިރޭޓްސް އާއި ގަތަރުން ބުނެފައިވާ ގޮތުގައި އެ
ގައުމުތަކުން ވަނީ އޮއްސަމުންދާ ޑްރޯނާއި މިސައިލްގެ އެތައް ހަމަލާއެއް
އިންޓަސެޕްޓުކޮށްފަ އެވެ. ޔޫއޭއީން ބުނި ގޮތުގައި މިހާތަނަށް ތިން
ބެލަސްޓިކް މިސައިލެއް އިންޓަސެޕްޓުކޮށްފައި ވާއިރު 129 ޑްރޯންގެ ތެރެއިން
121 ޑްރޯން އިންޓަސެޕްޓުކުރެވިފައިވެ އެވެ. ގަތަރުން ބުނި ގޮތުގައި 10
ޑްރޯން އިންޓަސެޕްޓުކޮށް ދެ ކްރޫޒް މިސައިލް ވެސް އިންޓަސެޕްޓްކޮށްފައިވެ
އެވެ.
ސައުދީ އަރަބިއްޔާގެ ޑިފެންސް މިނިސްޓްރީން ބުނީ ވެރިރަށް ރިޔާޟްގެ
ދެކުނުގައި އޮންނަ ސަރަހައްދަކަށް ދެ ކްރޫޒް މިސައިލް ހަމަލާ ދީފައިވާ
ކަމަށެވެ. އެއީ ޕްރިންސް ސުލްތާން އެއާ ބޭސް ހުންނަ ހިސާބެވެ. މީގެ
އިތުރުން ގަލްފުގެ އައްސޭރިފަށުގައި ހުންނަ ރަސް ތަނޫރާ ރިފައިނަރީއަށް
އަމާޒުކޮށް ފޮނުވި ޑްރޯނެއް ހުއްޓުވާފައިވާ ކަމަށް ވެސް ބުންޏެވެ.