މަޝްއަރު ގްރޫޕުގެ ހަވާލުގައި އުމްރާ އަށް ދިޔަ ބައެއް މީހުންގެ ޓިކެޓްތަކަށް ފައިސާ ދެއްކުމަށް އެ ކުންފުނިން ދިން ޗެކް ބައުންސްވެ، ފައިސާ ނުދެއްކި ޓިކެޓްތައް ކެންސަލްވި މައްސަލާގައި ޖަލަށްލާފައިވާ އެ ކުންފުނީގެ ވެރިޔާ އަލީ ފާރިޝް ގޭބަންދަށް ބަދަލުކޮށްފި އެވެ.
ކަރެކްޝަނަލް ސާވިސްއިން މިއަދު ބުނި ގޮތުގައި ސިއްހީ ހާލަތާ ގުޅިގެން ފާރިޝް ވަނީ ވަގުތީ ގޮތުން ގޭބަންދަށް ބަދަލުކޮށްފަ އެވެ.
ފާރިޝްގެ މައްޗަށް ދައުވާކުރީ ރާއްޖެ އިން އުމްރާ އަށް މީހުން ގެންދަން އޭސް އޭވިއޭޝަން ސާވިސް އާއި އޭސް ޓްރެވެލް މޯލްޑިވްސް މެދުވެރިކޮށް 48 މީހެއްގެ ރިޓާން ޓިކެޓުގެ ބުކިން ހެދުމަށް ފަހު، ފައިސާ ނުދެއްކި މައްސަލައިގަ އެވެ.
އެ ޓިކެޓުތަކަށް ދައްކަންޖެހޭ ފައިސާ ދެއްކުމުގެ ގޮތުން އެ ކުންފުނީގެ ބީއެމްއެލް އެކައުންޓުން 390،126ރ. ނެގޭ ގޮތަށް އޭސް އޭވިއޭޝަން ސާވިސް އަށް ދޫކުރި ޗެކާއި 156،050ރ. ނެގޭ ގޮތަށް ދޫކުރި ޗެކްތައް ބޭންކަށް ހުށަހެޅުމުން އެކައުންޓުގައި ފައިސާ ނެތި ޗެކްތައް ބައުންސްވީ އެވެ.
އެ ފައިސާ ދައްކަން ހަތް ދުވަހުގެ މުއްދަތެއް ފާރިޝް އަށް ދިނުމުން ވެސް އެ ފައިސާ ދައްކާފައި ނުވާތީ މަކަރާއި ހީލަތް ހެދުމުގެ ކުށުގެ ދައުވާކޮށް އެ ފައިސާ އޭނާގެ އަތުން ނަގައި ދިނުމަށް ދައުވާގައި އެދުނެވެ.
އެ މައްސަލާގައި ކޯޓުން ކުރި ހުކުމްގައި ބުނީ، ފާރިޝްގެ މައްޗަށް ހުށަހަޅާފައިވާ މަކަރާއި ހީލަތް ހެދުމުގެ ކުށުގެ ދައުވާ އަށް ފާރިޝް އިންކާރުކުރި ނަމަވެސް ހެކިތަކަށް ރިއާޔަތްކޮށް، އެ ދައުވާ އަކީ ގާނޫނުއަސާސީގެ 51 ވަނަ މާއްދާގައި ބަޔާންކުރާ، އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާ ކަމަށެވެ.
އެ ކުށުގެ އަދަބެއްގެ ގޮތުން ތިން އަހަރާއި ދެ މަސް ދުވަހާއި 12 ދުވަހަށް ޖަލަށް ލުމަށް ވެސް ހުކުމްގައިވެ އެވެ. އަދި ދައުވާގައި ބަޔާންކުރާ މުއާމަލާތާ ގުޅިގެން އޭސް އޭވިއޭޝަނާއި އޭސް ޓްރެވެލަށް ލިބުނު ގެއްލުމުގެ ބަދަލުގެ ގޮތުގައި 26،350.32 ޑޮލަރު ނުވަތަ 406،321ރ. އެ ކުންފުންޏަށް ދައްކަންޖެހޭ ކަމަށާއި އެ ފައިސާ ދެ އަހަރުގެ ތެރޭގައި ދެއްކުމަށް އެ ހުކުމްގައި އަމުރު ކޮށްފައިވެ އެވެ.
އުމްރާ އަށް މީހުން ގެންގޮސް ގިނަ ބަޔަކު ސައުދީއަރަބިއްޔާގައި ތާށިވި މައްސަލައާ ގުޅިގެން އޭރު އެ ގްރޫޕުގެ މައްސަލަ ފުލުހުންނަށް ހުށަހެޅީ އިސްލާމިކް މިނިސްޓްރީންނެވެ.