އީރާނަށް އެމެރިކާ އާއި އިޒްރޭލުން ދިން ހަމަލާތަކުގެ ރައްދުގައި އީރާނުން ދެމުން ގެންދާ ހަމަލާތަކުގައި އިޒްރޭލަށް މިއަދު ދިން ހަމަލާއެއްގައި އަށް މީހަކު މަރުވެފައިވާ ކަމަށް ބުނެފި އެވެ.
މިއީ މިފަހަރު ހަނގުރާމަ ފެށުނު ފަހުން އީރާންގެ ހަމަލާއެއްގައި އެންމެ ގިނަ މީހުން މަރުވި ހަމަލާ އެވެ.
އިޒްރޭލުގެ މެގަން ޑޭވިޑް އެޑޮމް އިމަޖެންސީ ސާވިސްއިން ބުނީ ބެއިތު ޝެމޭޝް ސަރަހައްދުގައި އެމްޑީއޭގެ އީއެމްޓީ އާއި ޕެރަމެޑިކުން ވަނީ 8 މީހެއްގެ މަރު ސާބިތުކޮށްފައި ކަމަށެވެ. އަދި އިތުރު 28 މީހުން ޒަހަމްވެފައިވާ ކަމަށް ބުންޏެވެ.
އިޒްރޭލު ފުލުހުން ބުނި ގޮތުގައި މިއީ އީރާންގެ މިސައިލް ހަމަލާއެއް އިމާރާތަކަށް އަމާޒުވި ހާދިސާއެއްގައި މަރުވި މީހުން ކަމަށެވެ.
ބެއިތު ޝެމޭޝްއަށް އަމާޒުވި އީރާންގެ ހަމަލާގައި އިމާރާތްތަކެއް ބިމާ ހަމަވެފައި: މި ސަރަހައްދުން މިހާތަނަށް ވަނީ އަށް މީހަކު މަރުވެފައި.
މިއީ އީރާނުން މިއަދު މެންދުރު ފަހު ފޮނުވާލި އެތައް ބައިވަރު މިސައިލްތަކުގެ ތެރެއިން އިޒްރޭލުގެ މެދުތެރޭ ސަރަހައްދެއް ކަމަށްވާ ބެއިތު ޝެމޭޝް އަށް އަމާޒުވި މި މިސައިލެކެވެ.
ހޮނިހިރު ދުވަހު އިޒްރޭލާއި އެމެރިކާއިން އީރާނަށް ހަމަލާދީ އެ ގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ އާއި ގައުމުގެ އިސް އެތައް ބަޔަކު އަވަހާރަކޮށްލުމާ އެކު އީރާނުން ރައްދުގައި ދަނީ އިޒްރޭލާއި އެމެރިކާ އަދި އެމެރިކާގެ މަސްލަހަތު ހިމެނޭ ކޮންމެ ތަނަކަށް ހަމަލާ ދެމުންނެވެ.
ބެއިތު ޝެމޭޝްއަށް އަމާޒުވި އީރާންގެ ހަމަލާގައި އިމާރާތްތަކެއް ބިމާ ހަމަވެފައި: މި ސަރަހައްދުން މިހާތަނަށް ވަނީ އަށް މީހަކު މަރުވެފައި.
ގަލްފުގެ ގައުމުތަކުގެ ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް އެތައް ހަމަލާއެއް ދީފައި ވާއިރު އާންމުން އުޅޭ ހިސާބުތަކާއި އެއާޕޯޓްތަކަށް ވެސް ދަނީ މިސައިލާއި ޑްރޯން ހަމަލާއަށް އަމާޒުކުރަމުންނެވެ. މި ހަމަލާތަކުގައި ކުވައިތުން އަދި ޔޫއޭއީން ވަނީ މީހަކު މަރުވެފަ އެވެ. ޔޫއޭއީން ހަމަލާތަކުގައި 60 މީހަކު ޒަހަމްވެފައި ވާއިރު ގަތަރާއި ސައޫދީއަށް ވެސް ބައެއް ހަމަލާ ދީފައިވެ އެވެ.
އީރާނުން ބުނެފައިވާ ގޮތުގައި އެ ގައުމަށް ދިން ހަމަލާތަކުގައި މަރުވި މީހުންގެ އަދަދު ވަނީ 200 އަށް ވުރެ މައްޗަށް ގޮސްފަ އެވެ.