އެމެރިކާ އާއި އިޒްރޭލު ގުޅިގެން އީރާނަށް ހަމަލާދޭން ފެށުމާ އެކު އީރާނުން ރައްދު ހަމަލާތައް ފަށައިފި އެވެ.
އިޒްރޭލުން ވަނީ އީރާނުން މިސައިލް ލޯންޗްކޮށްފައިވާ ކަމަށެވެ. އެކަމަކު ފޮނުވާލާފައި ވަނީ ކިތައް މިސައިލް ކަމެއް ނުބުނެ އެވެ.
އީރާނުން މިސައިލްތަކެއް ފޮނުވާލާފައިވާ ކަމަށް އިޒްރޭލުގެ އަސްކަރިއްޔާއިން ބުނިތާ އިރުކޮޅެއް ފަހުން އިޒްރޭލުގެ އުތުރު ސަރަހައްދުން ގޮވުމެއްގެ އަޑު އިވިފައިވެ އެވެ. އަދި އޭގެ އިރުކޮޅެއް ފަހުން އީރާނުން އިތުރު މިސައިލްތަކެއް ފޮނުވާލާފައިވާ ކަމަށް ވެސް ވަނީ ބުނެފަ އެވެ.
އީރާނަށް ހަމަލާ ދިނުމަށް ފަހު އިޒްރޭލު ކުއްލި ހާލަތަށް ގެނެސްފައި ވާއިރު މިހާރު ވަނީ އިޒްރޭލުގެ އުތުރު ސަރަހައްދުގައި ސައިރަން އަޅައި، އާންމުން ރައްކާތެރިކަން ހޯދަން އަންގައިފަ އެވެ. ބޮމާއި މިސައިލްގެ ހަމަލާތަކުން ސަލާމަތްވުމަށް ހަދާފައިވާ ބަންކަރުތަކަށް އާންމުން ވަންނަން އަންގާފައި ވާއިރު ސްކޫލްތަކާއި އޮފީސްތައް ވަނީ އިރު އޮއްސި 6:00 އާ ހަމައަށް ބަންދުކޮށްފަ އެވެ.
ހަމަލާތަކާ ބެހޭ ގޮތުން އެމެރިކާގެ ރައީސް ޑޮނަލްޑް ޓްރަމްޕު ވިދާޅުވީ މިއީ އީރާންގެ މިސައިލް ޕްރޮގްރާމާއި ކަނޑުގެ ސިފައިންގެ ބާރުތައް ނައްތާލުމަށް ދިން ހަމަލާތަކެއް ކަމަށެވެ. އެކަމަކު އީރާންގެ ވެރިން އުޅުއްވާ ހިސާބުތަކަށް ހަމަލާތައް އަމާޒުކޮށްފައި ވާތީ މިއީ އީރާންގެ ވެރިކަން ބަދަލުކުރުމުގެ ހަނގުރާމައެއް ކަމަށް ވަނީ ބެލެވިފަ އެވެ.
އީރާނަށް ހަމަލާ ދިނުމުގެ ކުރިން އެމެރިކާއިން ވަނީ މެދުއިރުމައްޗަށް
އަސްކަރީ މަނަވަރުތައް ޖަމާކޮށް، މެދުއިރުމަތީގެ ގައުމުތަކުގައިވާ
އެމެރިކާގެ އަސްކަރީ މަރުކަޒުތަކުގެ ސަލާމާތީ ކަންކަން ވަރުގަދަކޮށްފަ
އެވެ. މީގެ އިތުރުން ޖެޓްތަކަށް ތެޔޮ އަޅާ އެއާކްރާފްޓްތައް އިއްޔެ ވަނީ
އިޒްރޭލަށް ގެންގޮސްފަ އެވެ. މީގެ އިތުރުން އިޒްރޭލުގައި ތިބި އެމެރިކާގެ
ޑިޕްލޮމެޓުންގެ އާއިލާތަކުގެ މީހުން އިޒްރޭލުން ފޭބުމަށް ލަފާ ދީފައިވެ
އެވެ.
މިދިޔަ އަހަރުގެ ޖޫން މަހު ވެސް އިޒްރޭލުން އީރާނަށް ހަމަލާ ދިނުމާ އެކު
ހަނގުރާމަ ފެށުނެވެ. އެފަހަރު 12 ދުވަސް ވަންދެން އިޒްރޭލާއި އީރާނުން
މިސައިލާއި ޑްރޯނުން ހަމަލާ ބަދަލުކޮށްފައި ވާއިރު އީރާނުން ގިނަ
އަދަދެއްގެ ބަޔަކު މަރުވެ ބޮޑެތި ގެއްލުންތައްވި އެވެ. އަދި އީރާންގެ
ހަމަލާތަކުގައި އިޒްރޭލުން ވެސް މީހުން މަރުވެ އިމާރާތްތަކަށް ބޮޑެތި
ގެއްލުންތައް ވެފައިވެ އެވެ.