މިދިޔަ އަހަރަކީ ބީއެމްއެލް އަށް ރެކޯޑު މާލީ ނަތީޖާއެއް ލިބުނު އަހަރެއް ކަމަށާއި އެ ކުރިއެރުން ލިބުނީ އެޅި ހަރުދަނާ ފިޔަވަޅުތަކުގެ ސަބަބުން ކަމަށް އެ ބޭންކުން މިއަދު ބުނެފި އެވެ.
ބީއެމްއެލް އިން ބުނީ، ހިދުމަތް ފުޅާކުރުމަށް މިދިޔަ އަހަރު މުހިއްމު މަސައްކަތްތަކެއް ކޮށްފައިވާނެ ކަމަށެވެ.
މިދިޔަ އަހަރު ބީއެމްއެލްއަށް ސާފު ފައިދާގެ ގޮތުގައި 2.5 ބިލިއަން ރުފިޔާ ވަނީ ލިބިފަ އެވެ.
ބީއެމްއެލް އިން ބުނި ގޮތުގައި މިއީ އޭގެ ކުރީ އަހަރަށް ވުރެ 9.8 ޕަސެންޓް އިތުރު އަދަދެކެވެ. ބީއެމްއެލްގެ ޖުމްލަ އެސެޓް ވަނީ 56 ބިލިއަން ރުފިޔާ އިތުރުވެފަ އެވެ.
ބީއެމްއެލްއަށް 2024 ވަނަ އަހަރު ފައިދާގެ ގޮތުގައި ލިބުނީ 2.2 ބިލިއަން ރުފިޔާ އެވެ. އެހެންވެ، މިދިޔަ އަހަރު ބޭންކުގެ ފައިދާ ވަނީ ގާތްގަނޑަކަށް 300 މިލިއަން ރުފިޔާ އިތުރުވެފަ އެވެ.
މިދިޔަ އަހަރު އެ ބޭންކަށް އާމްދަނީގެ ގޮތުގައި 5.7 ބިލިއަން ރުފިޔާ ލިބުނެވެ. އެއީ އޭގެ ކުރީ އަހަރަށް ވުރެ 900 މިލިއަން ރުފިޔާ އިތުރު އަދަދެކެވެ. އާމްދަނީ އިތުރުވި އިރު އެ ބޭންކުގެ ހަރަދު ވެސް މިދިޔަ އަހަރު އިތުރެވެ. މިދިޔަ އަހަރު ހިންގުމުގެ ހަރަދަށް އެބޭންކުން އެއް ބިލިއަން ރުފިޔާ ހޭދަކޮށްފައިވެ އެވެ. އެ ބޭންކުން އޭގެ ކުރީ އަހަރު ހިންގުމުގެ ހަރަދަށް ހޭދަކުރީ 764 މިލިއަން ރުފިޔާ އެވެ.
ފުވައްމުލަކުގައި ޑޮލަރު އޭޓީއެމްގެ ހިދުމަތް ގާއިމްކޮށްފައިވާ އިމާރާތް.---ފޮޓޯ: ބީއެމްއެލް
އަމިއްލަ ފަރާތްތަކާއި ކުދި އަދި މެދުފަންތީގެ ވިޔަފާރި އާއި ކޯޕަރޭޓް ކަސްޓަމަރުންގެ ވިޔަފާރިތަކާއި އިގްތިސާދުގެ މުހިންމު ސިނާއަތްތައް ފުޅާކޮށް ތަރައްގީ ކުރުމަށް، ލޯނާއި ފައިނޭންސިންގެ ގޮތުގައި މިދިޔަ އަހަރު ބޭންކުން ވަނީ އަލަށް 10 ބިލިއަން ރުފިޔާ ދޫކޮށްފަ އެވެ. މިއީ ބޭންކުގެ ތާރީހުގައި ވެސް އެއް އަހަރު ތެރޭގައި އެންމެ ގިނަ އަދަދެއްގެ ލޯނު ދޫކުރި އަހަރެވެ.
މިދިޔަ އަހަރު 30,000 އަށްވުރެ ގިނަ އާ ކަސްޓަމަރުން ބޭންކާ ގުޅި، އަދި ކަސްޓަމަރުންގެ ޑިޕޮސިޓް 2024 ވަނަ އަހަރަށްވުރެ 16 ޕަސެންޓް އިތުރުވި އެވެ.
ބީއެމްއެލްގެ ސީއީއޯ އަދި މެނޭޖިން ޑައިރެކްޓަރު މުހައްމަދު ޝަރީފް ވިދާޅުވީ، މިދިޔަ އަހަރަކީ އެ ބޭންކަށް ވަރަށް މުހިންމު އަހަރެއް ކަމަށެވެ. ގައުމީ ބޭންކަކީ މާލީ ގޮތުން އެންމެ ރަނގަޅު
ނަތީޖާ ހޯދުމާ އެކު، އިޖުތިމާއީ ގޮތުން ވެސް މުޅި ގައުމަށް ހެޔޮ ބަދަލެއް ގެނެސްދެވޭނެ
މުއައްސަސާއެއްކަން މިދިޔަ އަހަރު ކުރި މަސައްކަތްތަކުން ސާބިތުކޮށްދެވުނު ކަމަށް އޭނާ ވިދާޅުވި އެވެ.
ކުޑަހުވަދޫ ބީއެމްއެލްގެ އާ ބްރާންޗު އިމާރާތް. ބީއެމްއެލް އިން ވަނީ ރާއްޖޭގެ ވަރަށް ގިނަ ރަށްތަކުގައި ހިދުމަތް ދޭނެ އާ އިމާރާތްތައް އަޅާފައި.---ފޮޓޯ: ބީއެމްއެލް
"ބޭންކުގެ ވިއުގަ އިތުރަށް ފުޅާކުރުމާ އެކު
ޑިޖިޓަލް ވަސީލަތްތައް ތައާރަފްކޮށް އިތުރަށް ތަރައްގީކުރުމަށް ކުރަމުންދާ
މަސައްކަތުން ރަމްޒުކޮށްދެނީ، ކޮންމެ ދިވެއްސަކަށްވެސް، އެމީހަކު ހުރި ތަނަކުން ބޭނުންވާ
މާލީ ޚިދުމަތްތައް ފޯރުކޮށްދިނުމަށް އަޅުގަނޑުމެން މެދުކެނޑުމެއްނެތި ކުރާ ބުރަ
މަސައްކަތް. އަޅުގަނޑުމެން މި ބިނާކުރަނީ މިއަދާއި މާދަމާގެ ޖީލުތަކަށްޓަކައި ބިނާކުރާ
އެންމެހާ ދިވެހީންގެ ބޭންކެއް." އޭނާ ވިދާޅުވި އެވެ.
މިދިޔަ އަހަރުގެ ބީއެމްއެލް އިން ވަނީ ރާއްޖޭގެ މީހުން ދިރިއުޅޭ ހުރިހާ
ރަށެއްގައި ސެލްފް ސާވިސް ބޭންކިންގެ ހިދުމަތް ދީފަ އެވެ. އެ މަޝްރޫއަށް ރާއްޖެއާއި
ބައިނަލްއަގުވާމީ ފެންވަރުގައި ހާއްސަ ސަމާލުކަމެއް ލިބުނު ކަމަށް ބީއެމްއެލް އިން ބުންޏެވެ.
ހިދުމަތްތައް
ފުޅާކުރުމުގެ މަސައްކަތާ އެކު ބޭންކުން ވަނީ ޑިޖިޓަލް ހިދުމަތްތަކަށް ބަދަލުތައް ގެނައުމުގެ
މަސައްކަތް ވެސް ހަލުވިކޮށްފަ އެވެ. އެގޮތުން އެކައުންޓް ހުޅުވުމާއި ލޯނަށް އެދި ހުށަހެޅުން
ފަދަ ހުރިހާ ހިދުމަތްތަކެއް އިންޓަނެޓް ބޭންކިން އަދި މޮބައިލް ބޭންކިން އެޕް މެދުވެރިކޮށް
މިހާރު ކުރެވޭނެ އެވެ. .