ހުޅުމާލެ 1 ގައި ހުންނަ މަސްޖިދް ޝައިހް ގާސިމް ބިން އައްތާނީ (ގުއްބު މިސްކިތް) މަރާމާތުކުރުމުގެ މަސައްކަތް ލަސްވީ ކޮންޓްރެކްޓަރު ބައެއް ކަންކަން ކުރުމަށް ފަހު ވަގުތު ދެކޮޅު ހެދުމުން ކަމަށް މާލޭގެ މޭޔަރުގެ އާދަމް އާޒިމް ވިދާޅުވެއްޖެ އެވެ.
ހުޅުމާލޭ 1 ގައި ހުންނަ އެންމެ ދުވަސްވީ އަދި ގިނަ ބަޔަކު އަރާ އެ މިސްކިތް ރޯދަ މަސް ފެށުމުގެ ތިން ހަފްތާއެއްހާ ދުވަސް ކުރިން ވަނީ ބަންދުކޮށްފަ އެވެ. އަދި ރޯދަ މަސް ފެށުނު އިރު ވެސް އެތަަނުގެ މަސައްކަތް ނުނިމޭތީ މީހުންނަށް ވަނީ ވަރަށް ބޮޑަށް ދަތިވެފަ އެވެ.
އެހެންވެ މީގެ ދެތިން ދުވަހެއް ކުރިން އިސްލާމިކް މިނިސްޓަރު އެކްސްގައި ކުރެއްވި ޕޯސްޓެއްގައި ވަނީ އެތަން ރޯދައަށް ނުނިމިދާނެތީ އާންމުންގެ ކަންބޮޑުވުން މިނިސްޓްރީއަށް ލިބިފައިވާ ކަމަށް ވެސް ވިދާޅުވެފަ އެވެ. އެހެންވެ، މާލޭ ސިޓީ ކައުންސިލުގެ ބެލުމުގެ ދަށުގައި ހުރި އެ މިސްކިތުގެ މަރާމާތު ނިންމައި ވީއެންމެ އަވަހަކަށް ނިންމާނެ ކަމަށް އުއްމީދުކުރައްވާ ކަމަށް މިނިސްޓަރު ވިދާޅުވެފައިވެ އެވެ.
އެކަމާ ގުޅިގެން އާޒިމް "މިހާރު" އަށް ވިދާޅުވީ މިސްކިތުގެ މަސައްކަތް ލަސްވީ ކޮންޓްރެކްޓަރު އެންމެ ފަހު ވަގުތު އެތަނުގައި ނޮވިލޯން ނޭޅޭނެ ކަމަށް ބުނުމުން ކަމަށެވެ. އެހެންވެ، އެ މަސައްކަތްކުރާނެ އާ ބަޔަކު ހޯދައިގެން އެ މަސައްކަތް ނިންމާފައިވާ ކަމަށާއި މާދަމާ މެންދުރަށް ނިމެނޭ ކަމަށް އާޒިމް ވިދާޅުވި އެވެ.
ޝައިހް ގާސިމް ބިން އައްސާނީ މިސްކިތުގެ ތިރީ ބައިގެ މުށިތައް ނަގައި އަލުން ޖެހުމަށް ފަހު ނޮވިލޯން އެޅުމުގެ މަސައްކަތް ކުރަނީ. -- ފޮޓޯ: މިހާރު
މިސްކިތުގެ ގްރައުންޑް ފްލޯގެ މުށިތައް ތަޅާލައި އަލުން މުށި ޖަހައި ނޮވިލޯން އެޅުމުގެ މަސައްކަތް އެއްކޮށް ނުނިމުނު ކަމުގައި ވިޔަސް، ރަމަޟާން މަހަށް ހަނދު ބެލި ދުވަހުގެ މަޣްރިބް ނަމާދުން ފެށިގެން އެތަނުގެ މަތީ ބުރީގައި ވަނީ ނަމާދުކުރަން ފަށައިފަ އެވެ. އެކަމަކު އެއީ ކުޑަ ޖާގައަކަށް ވާތީ މިސްކިތުގެ މަރާމާތުކުރަމުން ދާ ބައިގައި ވެސް މީހުން ނަމާދުކުރަން ޖެހެ އެވެ. އަދި ރޭ ތަރާވީހް ނަމާދަށް ބޭނުންކުރީ ވެސް މަރާމާތުގެ މަސައްކަތް ނުނިމި އޮތް ބައިގަ އެވެ. މަތީ ބައި ހާއްސަކުރީ އަންހެނުން ނަމާދުކުރުމަށެވެ.
އާޒިމް ވިދާޅުވީ އެ މިސްކިތުގެ ތަށިމުށިތައް ހަލާކުވެފައި ހުންނަތާ 10 އަހަރުވެފައިވާ ކަމަށެވެ. ނަމަވެސް އެކަމަށް އަޅާލާނެ މިނިސްޓަރަކު ނުވަތަ މޭޔަރު އޭރު ނުވި ކަމަށް އޭނާ ވިދާޅުވި އެވެ. އޭނާ ވިދާޅުވި ގޮތުގައި އެ މިސްކިތުގައި ހޫނު ގަދަ މައްސަލަ ހައްލުކުރުމަށް އޭސީ ކުރީ ވެސް އެތަން ބޭނުންކުރާތާ 25 އަހަރު ފަހުން ކަމަށެވެ. އެއީ މިދިޔަ އަހަރުގެ ރޯދަ މަހަށެވެ.
"އަޅުގަނޑު އައިސް މި ކަންތައްތައް ރަނގަޅު ކުރީ،" އާޒިމް ވިދާޅުވި އެވެ.
މޭޔަރު ވިދާޅުވީ އެންމެ ބޮޑު އިސްކަމެއް ދެއްވަނީ މިސްކިތްތައް ރަނގަޅަށް ބެލެހެއްޓުމަށް ކަމަށާއި އިރާދަކުރެއްވިއްޔާ އެ ކަންކަން ފާހަގަވާނެ ކަމަށެވެ.