ބަންގްލަދޭޝްއާ އެކު އޮންނަ ގުޅުން ބަދަހިކުރަން ރާއްޖެއިން މަސައްކަތްކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ބަންގްލަދޭޝްއަށް އަލަށް އިންތިހާބުވެވަޑައިގަތް ބޮޑުވަޒީރު، ތޯރިގު ރަހްމާންގެ މަގާމުގެ ހުވާ ކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް ފަހު ރައީސް މުއިއްޒު ވަނީ ބޮޑުވަޒީރާ ބައްދަލުކުރައްވައިފަ އެވެ.
ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ބޮޑުވަޒީރާ އެކު ކުރިއަށް ދިޔައީ ކާމިޔާބު ބައްދަވުމެއް ކަަމަށެވެ. އަދި އެ ބައްދަލުކުރެއްވުމުގައި އެމަނިކުފާނާއި އާ ސަރުކާރަށް މަރުހަބާ ދެންނެވި ކަމަށް ރައީސް ވިދާޅުވި އެވެ.
ބަންގްލަދޭޝްގެ ބޮޑުވަޒީރު، ތާރިގް ރަހްމާންއާއި ރައީސް ޑރ. މުހައްމަދު މުއިއްޒު ބައްދަލުކުރައްވަނީ.
ރައީސް ވިދާޅުވީ މުސްތަގުބަލުގައި ވެސް ރާއްޖެ އާއި ބަންގްލަދޭޝްއާ ދެމެދެ އޮތް ގާތް އެކުވެރި ގުޅުން އިތުރަށް ބަދަހިކުރެއްވުމުގައި ދެމިހުންނަވާނެ ކަމަށެވެ.
ރައީސް މުއިއްޒު ބަންގްލަދޭޝްއަށް ވަޑައިގަތީ އެ ގައުމުގެ އިންޓަރިމް ސަރުކާރުގެ ޗީފް އެޑްވައިޒަރު، ޑރ. މުހައްމަދު ޔޫނުސްގެ ދައުވަތަކަށް، އެ ގައުމުގެ އާ ސަރުކާރު ހުވާކުރަން ބާއްވާ ރަސްމިއްޔާތުގައި ބައިވެރިވެވަޑައިގަތުމަށެވެ.
ތާރިގް ބޮޑުވަޒީރުކަމުގެ ހުވާ ކުރުމަށް ބާއްވާ އެ ރަސްމިއްޔާތުގައި ރާއްޖޭގެ އިތުރުން 12 ގައުމެއްގެ ވެރިންނަށް ދައުވަތު ފޮނުވި އެވެ.
ބަންގްލާދޭޝްގައި 2024 ވަނަ އަހަރު، ލޭ އޮހޮރުވުންތައް ބޮޑު މުޒާހަރާތަކުން ޝައިހް ހަސީނާގެ ވެރިކަން ވައްޓާލުމަށްފަހު މިދިޔަ ހަފުތާގައި ބޭއްވި ފުރަތަމަ އިންތިހާބު ކާމިޔާބުކުރީ މިދިޔަ އަހަރު އަވަހާރަވި ކުރީގެ ބޮޑުވަޒީރު ޚާލިދާ ޒިއާގެ ބީއެންޕީ އިސްވެ އުފައްދާފައިވާ ކޯލިޝަނުންނެވެ.
ގާނޫނު ހަދާ މަޖިލީހުގެ 299 ގޮނޑީގެ ތެރެއިން 212 ގޮނޑި އެ ކޯލިޝަނުން ވަނީ ކާމިޔާބުކޮށްފަ އެވެ. އެހެންވެ އާ ބޮޑުވަޒީރަކީ އެ ޕާޓީގެ ޗެއާމަން އަދި ޚާލިދާގެ ދަރިކަލުން ތާރިގް ރަހްމާނެވެ.