އިލެކްޝަން ކޮމިޝަނުން ހުސްވެފައިވާ މެންބަރުގެ މަގާމަށް އެ ކޮމިޝަނުގެ ވަކީލެއްގެ ގޮތުން ކުރިން މަސައްކަތް ކުރެއްވި ރިފްއަތު އަބްދުﷲ އައްޔަންކުރަން ރައްޔިތުންގެ މަޖިލީހުން މިއަދު ފާސްކޮށްފި އެވެ.
އެ ކޮމިޝަނުގެ މެންބަރުކަމަށް ހުޅުވާލީ ކޮމިޝަންގެ މެންބަރުގެ މަގާމުގައި ހުންނެވި ޑރ. މުހައްމަދު ޒާހިރުގެ ދައުރު ހަމަވުމާ ގުޅިގެންނެވެ.
އެކަމަށް ހުޅުވާލި ފުރުސަތުގައި ކުރިމަތިލެއްވި ބޭފުޅުންގެ ތެރެއިން ރައީސް ޑރ. މުހައްމަދު މުއިއްޒު މަޖިލީހަށް ފޮނުވީ ރިފްއަތުގެ ނަމެވެ. މިނިވަން މުއައްސަސާތަކާ ބެހޭ ކޮމިޓީން ރިފްއަތާ އިންޓަވިއުކޮށް، އިއްޔެ ނިންމީ ނަން ފާސްކުރަން ތަޅުމަށް ފޮނުވާށެވެ.
މިއަދު މަޖިލީހުގައި ނެގި ވޯޓުގައި އިލެކްޝަން ކޮމިޝަންގެ މެންބަރުކަމަށް ރިފްއަތު އައްޔަން ކުރަން ފެންނަ ކަމަށް 58 މެންބަރުން ވޯޓު ދެއްވި އެވެ.
މިހާރު ނޭޝަނަލް އިންޓަގްރިޓީ ކޮމިޝަންގެ ޑިރެކްޓަރެއްގެ މަގާމުގައި މަސައްކަތް ކުރައްވާ ރިފްއަތަކީ އިލެކްޝަން ކޮމިޝަނާ ދެކޮޅަށް ހުށަހެޅި ބޮޑެތި މައްސަލަތަކެއްގައި ކޯޓުގައި އެ ކޮމިޝަންގެ ދިފާއުގައި ވަކާލާތު ކުރެއްވި ބޭފުޅެކެވެ.
އެގޮތުން 2016 އަދި 2017 ވަނަ އަހަރު މަޖިލީހުގެ 13 މެންބަރެއްގެ ގޮނޑިއާ ގުޅޭ މައްސަލައިގައި ސުޕްރީމް ކޯޓުގައި ވެސް އޭނާ އެ ކޮމިޝަން ތަމްސީލު ކުރެއްވި އެވެ. އަދި 2018 ވަނަ އަހަރު ރިޔާސީ އިންތިހާބު ބާތިލްކުރަން ހުށަހެޅި މައްސަލައިގައި ވެސް ކޮމިޝަނުގެ ވަކީލެއްގެ ގޮތުގައި ހަރަކާތްތެރިވި އެވެ.
އިލެކްޝަން ކޮމިޝަންގައި މިހާރު ތިއްބަވަނީ އެ ކޮމިޝަނުގެ ރައީސް މުހައްމަދު ޒާހިދާއި މެންބަރު އަބްދުއްރަހުމާން ސޮލާހު ރަޝީދާއި ހަަސަން ޒަކަރިއްޔާ އަދި އަބްދުލްހަސީބު އިސްމާއީލެވެ. މީގެތެރެއިން ހަސަން ޒަކަރިއްޔާއަކީ ވެސް މީގެކުރިން ކޮމިޝަންގެ ގާނޫނީ ޓީމުގައި ހިމެނުނު ބޭފުޅެކެވެ.