އަންނަ އޭޕްރިލް މަހު ބާއްވާ ކައުންސިލް އިންތިހާބުގައި އަމިއްލަގޮތުން ވާދަކުރާ އެއްވެސް ކެންޑިޑޭޓަކަށް ޕީއެންސީން ތާއީދު ނުކުރާނެ ކަމަށް އެ ޕާޓީގެ ޕީޖީ ލީޑަރު އަދި ކެމްޕޭން މެނޭޖަރު އިބްރާހިމް ފަލާހު ވިދާޅުވެއްޖެ އެވެ.
މާފަންނުގެ ކެމްޕެއިން އިފްތިތާހު ކުރުމަށް ރޭ ބޭއްވި ޖަލްސާގައި ފަލާހު ވިދާޅުވީ އިންތިހާބަށް ކުރިމަތިލާފައި ވަނީ "ދެ ޕާޓީއަކުން" ކަމަށެވެ. އަޑުގަދަކޮށް އުޅުނު ޕާޓީތަކުން ވެސް ކެންޑިޑޭޓުން ނުނެރޭ ކަމަށް އޭނާ ވިދާޅުވި އެވެ.
ބައެއް ޕާޓީތަކުން ހަތަރު ކެންޑިޑޭޓުން ވެސް ކުރިމަތިލާފައިވާކަން ފާހަގަކުރައްވައި ފަލާހު ވިދާޅުވީ ވަރަށް ގިނަ އަމިއްލަ ކެންޑިޑޭޓުން ވެސް މިފަހަރުގެ އިންތިހާބުގައި ވާދަކުރާ ކަމަށެވެ. އަދި މިނިވަން ކެންޑިޑޭޓުންގެ ތެރޭގައި ސަރުކާރުގެ ކެންޑިޑޭޓުން ތިބި ކަމަށް އަޑުފެތުރެމުން ދިޔަ ނަމަވެސް އެއީ ހަގީގަތެއް ނޫން ކަމަށް ވިދާޅުވި އެވެ.
ޕީއެންސީގެ ރޭގެ ބައްދަލުވުމުގައި ނައިބު ރައީސް ހުސައިން މުހައްމަދު ލަތީފާއި އެ ޕާޓީގެ ކެމްޕެއިން މެނޭޖަރު ފަލާހާއި އެހެން ބައެއް ކެންޑިޑޭޓުން ބައިވެރިވެވަޑައިގަންނަވަނީ.
ފަލާހު ވިދާޅުވީ އަމިއްލަ މަންފާއެއް ހޯދުމަށް އަމިއްލަ ގޮތުން އިންތިހާބުގައި ވާދަކޮށް ގޮނޑި ކާމިޔާބު ކުރެވިދާނެ ކަމަށް ބައެއް ކެންޑިޑޭޓުން ގަބޫލުކުރައްވާ ކަމަށެވެ.
ގޮނޑި ކާމިޔާބުވުމުން ސިޔާސީ ކޮންމެވެސް ޕާޓީއަކަށް ސޮއިކޮށްގެން ނުވަތަ އެނޫން ވެސް އެހެން ގޮތަކަށް މަންފާއެއް ލިބިދާނެ ކަމަށް ވެސް ބައެއް ކެންޑިޑޭޓުން އަމިއްލަ ގޮތުން ވާދަކުރައްވާ ކަމަށާއި ނަމަވެސް މި ސަރުކާރުން ތާއީދުކުރާނީ ޕީއެންސީގެ ޓިކެޓްގައި ތިބި ކެންޑިޑޭޓުންނަށް އެކަނި ކަމަށް އޭނާ ވިދާޅުވި އެވެ.
"މިނިވަން އެއްވެސް ކެންޑިޑޭޓެއް ޕީއެންސީން ތާއީދުކުރާ އެއްވެސް ކެންޑިޑޭޓެއް ނުހުންނާނެ. ޕީއެންސީގެ ކެންޑިޑޭޓުންނަކީ ޕީއެންސީން ޓިކެޓު ދީގެން ކުރިމަތިލައްވާފައި ތިބި ކެންޑިޑޭޓުން. މިއީ ދިވެހިރާއްޖޭގެ ހުރިހާ ރަށަކަށް އަޅުގަނޑު ދަންނަވާ ވާހަކައެއް،" ފަލާހު ވިދާޅުވި އެވެ.
އޭނާ ވިދާޅުވީ ރައީސް ޑރ. މުހައްމަދު މުއިއްޒަށާއި ޕީއެންސީއަށް ވެސް އެންމެ މުހިއްމީ އެ ޕާޓީގެ ޓިކެޓުގައި ވާދަކުރާ ކެންޑިޑޭޓުންނަށް އިންތިހާބު ކާމިޔާބުކޮށްދިނުން ކަމަށެވެ.
އަންނަ އެޕްރީލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލް އިންތިހާބާއި އަންހެނުންގެ ކޮމިޓީތަކުގެ އިންތިހާބުގައި، އެކި ޕާޓީތަކާއި އަމިއްލަ ގޮތުން ވާދަކުރާ މީހުންނާ އެކު، ޖުމްލަ 2،994 ކެންޑިޑޭޓުން ވާދަކުރެ އެވެ.
ކައުންސިލްތަކުގެ އިންތިހާބުގައި ސިޔާސީ ޕާޓީތަކުން ވާދަކުރާ ކެންޑިޑޭޓުންގެ އަދަދު
- ޕީއެންސީން 665 ކެންޑިޑޭޓުން
- އެމްޑީޕީން 495 ކެންޑިޑޭޓުން
- ޖުމްހޫރީ ޕާޓީން 8 ކެންޑިޑޭޓުން
- އެމްޑީއޭ އިން 31 ކެންޑިޑޭޓުން
- ދަ ޑިމޮކްރެޓްސް އިން 8 ކެންޑިޑޭޓުން
- އަދާލަތު ޕާޓީން 3 ކެންޑިޑޭޓުން
ލޯކަލް ކައުންސިލް އިންތިހާބުގައި ހޮވާނީ 678 މީހުންނެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 678 މީހުންނެވެ. އެހެންވެ މި ދެ އިންތިހާބުގައި 1356 މީހަކު އިންތިހާބުކުރާނެ އެވެ.