ޖަލުގައި ހުކުމް ތަންޒީޒު ކުރަމުން ދަނިކޮށް ނިޔާވި ދެ ގައިދީންގެ އޮޓޯޕްސީ ހެދުމަށް އެ މީހުންގެ ހަށިގަނޑު އިންޑިއާއަށް ފޮނުވައިފި އެވެ.
މިމަހުގެ ދެވަނަ ދުވަހު ޖަލުގައި ނިޔާވީ ހުޅުމާލޭ ޖަލުގައި ދިގު ހުކުމެއް ތަންފީޒުކުރަމުން އައި ސ. ހިތަދޫ، ދިއްގާގަސްދޮށުގޭ، ހަސަން ނިޔާޒް އާއި ދަފްތަރު ނަމްބަރު 439، އިބްރާހީމް ސުހައިލް އެވެ.
ފުލުހުން ބުނީ އެމީހުންގެ އޮޓޯޕްސީ ހެދުމަށް އެ މީހުންގެ ހަށިގަނޑު އިންޑިއާއަށް ފޮނުވީ އިއްޔެގެ ވަގުތެއްގައި ކަމަށެވެ.
މޯލްޑިވްސް ކަރެކްޝަންސް އިން ކުރިން ބުނެފައިވާ ގޮތުގައި އޭގެ ތެރެއިން ސުހައިލް މަރުވީ ނިއުމޯނިއާ ޖެހިގެން ސިއްހީ ހާލު ދެރަވެ، އައިޖީއެމްއެޗުގައި އެޑްމިޓްކޮށްގެން ފަރުވާދެމުން އަންނަތާ ހަފްތާއެއް ފަހުންނެވެ.
ދެން ނިޔާވި ނިޔާޒަކީ މިދިޔަ މަހުގެ 30 ގައި ޑްރަގްގެ މައްސަލައެއްގައި 25 އަހަރުގެ ޖަލު ހުކުމެއް އިއްވި މީހެކެވެ. ނަމަވެސް ޖަލަށްލިތާ ދެތިން ދުވަސް ފަހުން އޭނާ ނިޔާވީ ކުއްލި މެޑިކަލް އިމަޖެންސީއެއް ދިމާވެ، ހުޅުމާލޭ ހޮސްޕިޓަލުގައި އަވަސް ފަރުވާދެމުން ދަނިކޮށެވެ.
އޭނާގެ ކަރާއި މޭމައްޗަށް "އަނިޔާތަކެއް" ލިބިފައިވާ ކަމަށް ބުނެ ސޯޝަލް މީޑިއާގައި ތުހުމަތުކޮށްފައިވެ އެވެ. އަދި ޖަލުގައި އަނިޔާކުރީ ކަމަށް ބުނެ ފެތުރުނު ޚަބަރާ ގުޅިގެން އޭރު ކަރެކްޝަންސް އިން ބުނެފައި ވަނީ ޖަލުގައި ގައިދީންނަށް އަނިޔާ ނުކުރާނެ ކަމަށާއި އެފަދަ ކަންކަން ހަރުކަށިކޮށް ބަލާ ކަމަށް ކަރެކްޝަންސްއިން ބުނެފައިވެ އެވެ.
ކަރެކްޝަންސް އިން ބުނިގޮތުގައި ގައިދީއަކު މަރުވުމާ އެކު އެ ސާވިސް އިން ވަގުތުން އެކަން ފުލުހުންނާއި އެ މީހެއްގެ އާއިލާ އާއި އިންސްޕެކްޓާ އޮފް ކަރެކްޝަނަލް ސާވިސް އާއި އެޗްއާރުސީއެމް އަދި އިންޓެގްރިޓީ ކޮމިޝަނަށް އަންގަ އެވެ. އަދި އެފަދަ ތުހުމަތުތަކެއް ކުރެވޭނަމަ އެކަން އެ އިދާރާތަކުން ބަލާނެ ކަމަށް ކަރެކްޝަންސް އިން ބުންޏެވެ.