ލޯކަލް ކައުންސިލް އަދި އަންހެނުން ތަރައްގީއަށް މަސައްކަތް ކުރާ ކޮމިޓީގެ އިންތިހާބަކީ އާންމުކޮށް ވަރަށް މަދުން މީހުން ވޯޓުލާން ނުކުންނަ އިންތިހާބެއް ނަމަވެސް، މި ފަހަރުގެ އިންތިހާބުގައި ވީހާ ވެސް ގިނަ ބަޔަކު ވޯޓުލުމަށް ފަސްޓްލޭޑީ ސާޖިދާ މުހައްމަދު އެދިވަޑައިގެންފި އެވެ.
ޕީއެންސީގެ މާފަންނު މެދު ދާއިރާގެ ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަ ދައްކަވަމުން، ކައުންސިލް އިންތިހާބުގައި ވޯޓުލަނީ އާންމުކޮށް ވޯޓުލުމުގެ ހައްގު އޮންނަ މީހުންގެ 30 ޕަސެންޓް މީހުން ކަން ސާޖިދާ ފާހަގަ ކުރެއްވި އެވެ.
އެ އިންތިހާބުގައި ވޯޓުލަނީ ކީއްކުރަންތޯ ވަރަށް ގިނަ މީހުން ސުވާލު އުފައްދާ ކަމަށާއި ކޮންމެ މީހަކު އަޔަސް ވަރިހަމަ ކަމަށް ގިނަ ބަޔަކު ދެކޭ ކަމަށް ސާޖިދާ ވިދާޅުވި އެވެ. ނަމަވެސް، އެއީ ރަނގަޅު ވާހަކައެއް ނޫން ކަމަށް ވިދާޅުވި އެވެ.
"އަޅުގަނޑުމެން މި ކިޔަނީ ތަރައްގީގެ ވާހަކަ. މި ހުރިހާ ކަމެއް ކުރުމަށްޓަކައި އަޅުގަނޑުމެން އެބަ ބޭނުންވޭ އަޅުގަނޑުމެންގެ ސަރުކާރާ އެކު މަސައްކަތް ކުރާނެ ރަނގަޅު ކައުންސިލެއް،" ސާޖިދާ ވިދާޅުވި އެވެ.
އެ ކައުންސިލް ހޮވަން ވޯޓު ދޭންޖެހެނީ އެއީ ރަށުގެ ތަރައްގީ އާއި ދަރިންގެ މުސްތަގުބަލާ ގުޅިފައިވާ ކަމެއް ކަމަށްވާތީ ކަމަށް ވެސް އެކަމަނާ ވިދާޅުވި އެވެ. އެހެންވެ، 30 ޕަސެންޓް ވޯޓް މައްޗަށް ޖައްސައި، މިއީ އެންމެންގެ ޒިންމާއެއް ކަމަށް ބަލައި، ވީހާވެސް ގިނަ ބަޔަކު ވޯޓުލާން ނުކުތުމަށް ގޮވާލައްވާ ކަމަށް ސާޖިދާ ވިދާޅުވި އެވެ.
ސާޖިދާ ވަނީ ސަރުކާރުން ގެންނަ ތަރައްގީ ކަށަވަރު ކުރަން ޕީއެންސީއަށް ނިސްބަތްވާ ކެންޑިޑޭޓުން ކައުންސިލްތަކާއި އަންހެނުން ތަރައްގީއަށް މަސައްކަތް ކުރާ ކޮމިޓީތަކަށް ހޮވައިދިނުމަށް އެދިވަޑައިގެންފަ އެވެ. އަދި އެއަށް ވުރެ ރަނގަޅު ކެންޑިޑޭޓުންނެއް ނުލިބޭނެ ކަމަށް ވެސް އެކަމަނާ ވިދާޅުވި އެވެ.