ޑެންގީ ޖެހިގެން ހދ. ކުޅުދުއްފުށީ ރީޖަނަލް ހޮސްޕިޓަލުގައި ފަރުވާދެމުން އަންނަ މީހަކަށް އޭބީ ނެގެޓިވް ލޭ ބޭނުންވާތީ އެ ގްރޫޕްގެ ލޭ ހުރި މީހަކު ލިބޭތޯ ފަސް އަތޮޅެއް ބަލައިގެން ވެސް ނުލިބުމުން މާލެއިން އެ ރަށަށް ގޮސްގެން ވެސް ލޭ ދެވިދިދާނެ ހަތަރު މީހަކު ހޯދަން އާންމުންގެ އެހީއަށް އެދެފި އެވެ.
ޑެންގީ ޖެހިގެން ހާލު ބޮޑުވެގެން ފަރުވާދެމުން އަންނަނީ ހދ. ނޮޅިވަރަންފަރުގެ، 43 އަހަރުގެ މީހަކަށެވެ.
އޭނާގެ ކޮއްކޮއަކު "މިހާރު" އަށް ބުނީ ބޭނުންވާ އޭބީ ނެގެޓިވް ލޭ ލިބޭތޯ ހއ. އަތޮޅުން ފެށިގެން ރ. އަތޮޅާ ހަމައަށް ބަލާފައިވާ ކަމަށެވެ. އެ ކުރި މަސައްކަތުން މިހާތަނަށް ވަނީ ފަސް މީހެއްގެ ގައިން ނެގި ލޭ ވަނީ އަޅައިފަ އެވެ. އެއީ ދިއްދޫ، ހަނިމާދޫ، ނޮޅިވަރަމް އަދި ކުޅުދުއްފުށި ލިބުނު ޑޯނަރުންނެވެ.
"ހއ. އާއި ހދ. އާއި ށ. ނ. އަދި ރ. ގެ ރަށްތަކަށް ގުޅައި ބަަލައިފިން އެއިން ރަށެއްގައި އެ ގްރޫޕްގެ ލޭ ދެވޭނެ [އިތުރު] މީހެއް ހުރިތޯ. ޕޮލިހުންނާއި އެމްއެންޑީއެފާއި ކައުންސިލާއި ރައްޓެހިންނަށް ގުޅައިގެން، އެ ރަށްތަކުގައި ލޭ ދެވޭނެ މީހެއް ހުރިތޯ ބެލީ،"
އެންމެ ފަހުން ކުރި މަސައްކަތުން ރޭގެ ވަގުތެއްގައި މާލެއިން ކުޅުދުއްފުއްޓަށް މީހަކު ގެންގޮސް ވަނީ ލޭ ނަގައިފަ އެވެ. އެ މީހާގެ ޓިކެޓުގެ ކަންކަން ވެސް ހަމަޖެއްސީ ލޭ ބޭނުންވާ މީހާގެ އާއިލާއިންނެެވެ. އެކަމަކު ޓިކެޓް ހޯދަން މި ދުވަސްވަރު ދަތިކަމަށާއި އެކަމުގައި އެހީތެރިކަން ބޭނުންވާ ކަމަށް ބުންޏެވެ. އޭނާ ބުނީ ދިއްދުއާއި ހަނިމާދޫން ލޭ ދޭން މީހުން އައީ އަމިއްލަ ހަރަދުގައި ކަމަށެވެ.
"ރޭގައި އެމްއެންޑީއެފްގައި މަސައްކަތްކުރާ މީހަކު ކުޅުދުއްފުއްޓަށް އައިސް ލޭ ދީފައި އެ ދިޔައީ،"
އެކަމަކު އިތުރު ހަތަރު ޑޯނަރުން އަދި ބޭނުންވާ ކަމަށް އޭނާ ބުންޏެެވެ.
އޭނާ ބުނީ މިވަގުތު ލޭ ބޭނުން ނުވި ނަމަވެސް ހަތަރު ޑޯނަރުން ހޯދާފައި ބެހެއްޓުމަށް ޑޮކްޓަރު ވަނީ ބުނެފައި ކަމަށެވެ. އޭނާ ބުނީ ލޭ ހޯދަން ސޯޝަލް މީޑިއާގައި އެހީއަށް އެދުނީ ޑޯނަރުން ހޯދުމަކީ އުނދަގޫ ކަމަކަށްވާތީ ކުރިއާލައި މީހުން ހޯދައި އެ މީހުންނަށް އެރަށަށް ގޮސް ލޭ ދެވޭނެކަން ޔަގީންކުރަން ކަމަށެވެ.
"މިއީ ހޯދަން އުނދަގޫ ގްރޫޕެއް ވީމާ ކުރިއާލައި ހޯދާފައި ބެހެއްޓީމަތާ އެ ބޭނުންވާ ގަޑިއަށް ލިބޭނެކަމުގެ ޔަގީންކަން އޮންނާނީ."
އޭނާ ބުނީ ލޭ ދޭން ދާ މީހުންގެ ޓިކެޓުގެ ހަރަދުތައް އާއިލާއިން ހަމަޖައްސައިދޭނެ ކަމަށެވެ.
މި ދުވަސްވަރަކީ މާލޭ ސަރަަހައްދުގައި ވެސް ލޭ ހޯދަން އުނދަގޫ ދުވަސްވަރެކެވެ. އެހެންވެ، ވޮލެންޓިއާކޮށް ލޭ ހަދިޔާކުރާ މިންވަރު އިތުރުކޮށްދޭން ބްލަޑް ސާވިސް އިން ވެސް ވަނީ އެދިފަ އެވެ.