ބަންގްލަދޭޝްގެ ބޮޑުވަޒީރުކަމުގައި ޝައިހް ހަސީނާ ހުންނެވި އިރު އިންސާނިއްޔަތާ ހިލާފު ޖަރީމާތަކެއް ހިންގި ކަމުގެ ކުށުގައި އޭރުގެ ޕޮލިސް ޗީފާއި އޭނާގެ ދަށުން މަސައްކަތްކުރި ދެ މީހަކު ދަންޖައްސައި މަރަން މިއަދު ހުކުމްކޮށްފި އެވެ.
ކުރީގެ ޕޮލިސް ޗީފް ހަބީބުއްރަހްމާނާއި އިތުރު ދެ އޮފިސަރެއްގެ މައްޗަށް ޝަރީއަތް ހިންގައި ހުކުމް އިއްވީ ވެސް ޣައިރު ހާޒިރުގަ އެވެ. ހަސީނާގެ ވެރިކަން 2024 ވަނަ އަހަރުގެ އޯގަސްޓް މަހު ވެއްޓުމާ އެކު އެ އެންމެން ވަނީ ފިލައިފަ އެވެ.
މި މީހުންގެ މައްޗަށް ހުކުމްކޮށްފައި މި ވަނީ ހަސީނާގެ ޒަމާންވީ ވެރިކަން ދަރިވަރުންގެ މުޒާހަރާތަކާ އެކު ވައްޓާލުމަށް ފަހު ގާއިމުކޮށްފައިވާ ވަގުތީ ސަރުކާރުން އަންނަ މަހުގެ 12 ގައި އާންމު އިންތިހާބު ބާއްވަން ތާވަލްކޮށްފައި ވަނިކޮށެވެ.
މި ތިން މީހުންގެ އިތުރުން ފަސް ފުލުހަކަށް މިއަދު އެކި އަދަބުތަކުގެ ހުކުމް އިއްވާފައިވެ އެވެ. މިއީ ހަސީނާ އިސްތިއުފާ ދެއްވައި ފިއްލަވައިގެން އިންޑިއާއަށް ވަޑައިގަތް ދުވަސް ކަމަށްވާ އޯގަސްޓް 5، 2024 ގައި މުޒާހަރާގެ ތެރެއިން ހަ މީހަކު މަރާލި މައްސަލައަކާ ގުޅޭ ދައުވާތަކެއްގަ އެވެ.
ބަންގްލާދޭޝްގައި 2024 ވަނަ އަހަރުގެ ޖުލައި މަހުން ފެށިގެން އޮގަސްޓް މަހުގެ ނިޔަލަށް ކުރި މުޒާހަރާގެ ތެރޭގައި 1،400 އަށް ވުރެ ގިނަ މީހުން މަރާލާފައިވާ ކަމަށް އދ. އިން ވަނީ ބުނެފަ އެވެ.
އިންޑިއާގައި ފިއްލަވައިގެން އުޅުއްވާ ހަސީނާގެ މައްޗަށް، މިދިޔަ ނޮވެމްބަރު މަހުގެ 28 ވަނަ ދުވަހު ވަނީ އިންސާނިއްޔަތާ ހިލާފް އަމަލުތައް ހިންގުމުގެ ކުށުގައި، ދަންޖައްސައި މަރަން ހަމަ މި ކޯޓުން ހުކުމްކޮށްފަ އެވެ.