04 އެޕްރީލް 2017 - 14:53
ވޮޝިންޓަން (އެޕްރީލް 4) - ރިޔާސީ ކެމްޕޭނުގެ ވައުދާ އެއްގޮތަށް ރައީސް ޑޮނަލްޑް ޓްރަމްޕުގެ މުސާރަ އިން ބައެއް ނޭޝަނަލް ޕާކް ސާވިސް އަށް ދިނުމަށް ނިންމާފައިވާ ކަމަށް ވައިޓް ހައުސް އިން ބުނެފި އެވެ.
ވައިޓް ހައުސްގެ ތަރުޖަމާން ޝޯން ސްޕައިސާ ވިދާޅުވީ ޓްރަމްޕް ނިންމާފައި ވަނީ މި އަހަރުގެ ފުރަތަމަ ތން މަސް ދުވަހުގެ މުސާރަ ޕާކްތަކާއި މޮނިއުމެންޓަތައް އަދި ދިގު މުއްދަތަކަށް ރައްކާތެރިކަން ބޭނުންވާ ތަންތަން ބަލަހައްޓާ ސަރުކާރުގެ އެޖެންސީ އަށް ހަދިޔާ ކުރުމަށް ކަމަށެވެ. ޓްރަމްޕުގެ މުސާރައިގެ ތެރޭން ނޭޝަނަލް ޕާކް ސާވިސް އަށް ހަދިޔާ ކުރަނީ 78،333 ޑޮލަރެވެ.
ކެމްޕޭން ތެރޭގައި ޓްރަމްޕް ވަނީ ރައީސް ކަމަށް ހޮވިވަޑައިގެންފި ނަމަ މުސާރައިގެ ގޮތުގައި އަހަރަކު ލިބޭ 400،000 ޑޮލަރު ޗެރިޓީއަކަށް ހަދިޔާ ކުރައްވާނެ ކަމަށް ވިދާޅުވެފަ އެވެ. ނަމަވެސް މުސާރައިގެ ބައެއް ހަދިޔާ ކުރަން ނިންމި ނޭޝަނަލް ޕާކް ސާވިސް އަކީ ޗެރިޓީއެއް ނޫނެވެ.
ރައީސް ޑޮނަލްޑް ޓްރަމްޕް ވައުދުވެވަޑައިގެންފައިވާ ގޮތަށް އެމަނިކުފާނުގެ މުސާރަ ޗެރިޓީއަކަށް ހަދިޔާ ކުރައްވާނީ އަހަރުގެ ފަހުކޮޅު ކަމަށް ޕްރެސް ސެކްރެޓަރީ ޝޯން ސްޕައިސާ ކުރިން ވަނީ ވިދާޅުވެފަ އެވެ. އަދި ޓްރަމްޕުގެ މުސާރަ ހަދިޔާ ކުރާނެ ޗެރިޓީއެއް އިޚްތިޔާރު ކުރުމުގައި އެމަނިކުފާނަށް ފާޑުކިޔާ މީޑިއާތަކުން ވެސް އެހީތެރިވުމަށް ސްޕައިސާ ވަނީ އެދިވަޑައިގެންފަ އެވެ.