03 އެޕްރީލް 2017 - 09:26
ވޮޝިންޓަން (އެޕްރީލް 3) - ޗައިނާގެ އެހީތެރިކަން ލިބުނަސް ނުވަތަ ނުލިބުނަސް، އެމެރިކާ އެކަނި ނަމަވެސް ނޯތު ކޮރެއާގެ ނިއުކްލިއާ މައްސަލަ ހައްލު ކުރާނެ ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
"ޗައިނާ އިން ނޯތު ކޮރެއާ މައްސަލަ ހައްލު ނުކުރަންޏާ އެމެރިކާ އިން އެކަން ކުރާނަން،" އިނގިރޭސި ވިިލާތުގެ ފައިނޭންޝަލް ޓައިމްސް އަށް ދެއްވި އިންޓަވިއުއެއްގައި ޓްރަމްޕް ވިދާޅުވި އެވެ.
ޓްރަމްޕް މިމޭރުމުން ވާހަކަ ދައްކަވާފައި ވަނީ ޗައިނާގެ ރައީސް ޝީ ޖިންޕިން މި ހަފުތާގައި އެމެރިކާ އަށް ވަޑައިގަތުމަށް ހަމަޖެހިފައި ވަނިކޮށެވެ.
"ނޯތު ކޮރެއާގެ މައްޗަށް ޗައިނާގެ ނުފޫޒު ވަރަށް ބޮޑު. ނޯތު ކޮރެއާ މައްސަލަ ހައްލު ކުރުމުގައި އެމެރިކާ އަށް އެހިވާނެތޯ ނުވަތަ ނޫންތޯ ނިންމާނީ ޗައިނާ އިން. ކޮރެއާ މައްސަލާގައި ޗައިނާ އިން އެހީވެއްޖެ ނަމަ އެ ގައުމަށް ވެސް ރަނގަޅުވާނެ. އެ މީހުން އެހީ ނުވެއްޖެ ނަމަ އެއްވެސް ބަޔަކަށް ރަނގަޅެއް ނުވާނެ،" ޓްރަމްޕް ވިދާޅުވި އެވެ.
ނޯތު ކޮރެއާގެ މައްސަލަ ހައްލު ކުރަން އަޅާނެ ފިޔަވަޅަކާ ގުޅޭ ގޮތުން ޓްރަމްޕް އެއްވެސް ތަފްސީލެއް ނުދެއްވަ އެވެ.
އެމެރިކާގެ ޚާރިޖީ ވަޒީރު ރެކްސް ޓިލަސަން މިދިޔަ މަހު އޭޝިއާ އަށް ކުރެއްވި ދަތުރުފުޅުގައި ވަނީ ނޯތު ކޮރެއާއާ ދެކޮޅަށް އަސްކަރީ ފިޔަވަޅު އެޅުމަކީ ވެސް ނެތް ކަމެއް ނޫން ކަމަށް ވިދާޅުވެފަ އެވެ. އަދި އެމެރިކާގެ ދިފާއީ ވަޒީރު ޖޭމްސް މެޓިސް ވެސް ވަނީ ނޯތު ކޮރެއާ އިން ނިއުކްލިއާ ހަތިޔާރު ބޭނުންކޮށްފި ނަމަ އެއާ އެއްވަރުގެ ރައްދެއް ދޭނެ ކަމަށް އިންޒާރު ދެއްވައިފަ އެވެ.