02 އެޕްރީލް 2017 - 14:12
އައްޑޫގެ ކުނި މެނޭޖް ކުރުމުގެ މަސައްކަތް އިއްޔެއިން ފެށިގެން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ފަށައިފި އެވެ.
އެ ކުންފުނިން ބުނީ ހިދުމަތް ހޯދާ ފަރާތްތަކުން އެ ކުންފުނީގައި ރަޖިސްޓް ކުރަން ޖެހޭނެ ކަމަށެވެ. މީގެ ކުރިން އައްޑޫގައި ކުނި އުކާލުމުގެ ޚިދުމަތް ދެމުން އައީ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އިންނެވެ.
މެނެޖިން ޑިރެކްޓަރު އިބްރާހީމް ފުއާދު ވިދާޅުވި ގޮތުގައި އެމްއާރްޑީސީގައި ރަޖިސްޓްރީކޮށްފައި ހުރި ފަރާތްތަކުން ވެމްކޯގައި އަލުން ރަޖިސްޓްރީކުރަން ޖެހޭނެ އެވެ.
"އެގޮތުން މިހާރު ކުނި ކަލެކްޓް ކުރަންދާ އިރު، އަޅުގަނޑުމެންގެ ސްޓާފުން ތިބޭނެ، ފޯމްތައް ފުރައި ދިނުން ފަދަ ކަންކަމުގައި އެހީތެރިވާން،" އޭނާ ވިދާޅުވި އެވެ.
"އޭގެ އިތުރަށް ހިތަދޫގައި ހުންނަ އަޅުގަނޑުމެންގެ އޮފީހުން ވެސް ރެޖިސްޓްރޭޝަން ފޯމްތައް ލިބެން ހުންނާނެ."
ފުއާދު ވިދާޅުވި ގޮތުގައި އެމްއާރްޑީސީގައި މިހާތަނަށް ރަޖިސްޓްރީ ނުވާ ފަރާތްތަކުން ވެސް ވެމްކޯގައި ރަޖިސްޓްރީވާން ޖެހޭނެ އެވެ.
ވެމްކޯގެ އައްޑޫ އޮފީސް ހުންނަނީ ހިތަދޫ ބޮޑު މަގުގައި ހުންނަ ޝީޝާ ފިހާރަ ކައިރީގަ އެވެ.
"އަޅުގަނޑުމެން މި ޚިދުމަތް ދޭނީ އެމްއާރްޑިސީން މީގެ ކުރިނ މި ހިދުމަތް ދެމުން އައި އަގުތަކަށް ވުރެ ކުޑަ އަގުތަކެއްގައި،" ފުއާދު ވިދާޅުވި އެވެ.
ވެމްކޯއާ އައްޑޫގެ ކުނި މެނޭޖް ކުރަން ހަވާލު ކުރީ މިދިޔަ މަހުގެ 26 ވަނަ ދުވަހު އެވެ.
އެ ކުންފުނިން މިހާރު ވަނީ ކުނި ޖަމާކުރަން މާލޭގައި ވެސް ބޭނުން ކުރާ ވައްތަރުގެ އުޅަނދުތައް އައްޑު އަށް ގެނެސްފަ އެވެ. މީގެ އިތުރުން ކުނިކޮށީގައި ބޭނުން ކުރަން އެކްސްކަވޭޓަރު ވެސް ވަނީ ގެނެސްފަ އެވެ.
"ދޮޅު މަހެއްހާ ދުވަހުގެ ތެރޭގައި އަނެއްކާވެސް އިތުރު ވެހިކަލްތައް އައްޑު އަށް އަންނާނެ،" ފުއާދު ވިދާޅުވި އެވެ.
އައްޑޫގެ ކުނި ވަގުތީ ގޮތުން މެނެޖް ކުރަން އެމްއާރްޑީސީއާ ހަވާލުކުރީ މެއި 17، 2016 ގަ އެވެ.