10 ޑިސެމްބަރ 2025 - 07:02
ދުނިޔޭގެ މަޝްހޫރު، އެމެރިކާގެ ރެސްޓޯރަންޓް ފްރެންޗައިޒް، 'ޓީޖީއައި ފްރައިޑޭސް' ގެ ރެސްޓޯރަންޓެއް މާލޭގައި ހުޅުވަން ނިންމައި، އެކަން އިއުލާނުކޮށްފި އެވެ.
'ޓީޖީއައި ފްރައިޑޭސް' ހިންގާ ކުންފުނި، ޝުގާލޯފް ޓީޖީއައިއެފުން ވަނީ ރާއްޖޭގެ ބްރޫ އެންޑް ފީސްޓް ހޯލްޑިންގްސް އާއެކު ފްރެންޗައިޒް އެއްބަސްވުމެއްގައި ސޮއިކޮށްފަ އެވެ.
ބްރޫ އެންޑް ފީސްޓް ހޯލްޑިންގްސް އަކީ މިހާރު ވެސް ރާއްޖެ އަށް ގިނަ ފުޑް ފްރެންޗައިޒްތައް ތައާރަފްކޮށްފައިވާ ކުންފުންޏެކެވެ. އޭގެ ތެރޭގައި، ޗިކިންގް، ގްލޯރިއާ ޖީންސް، މޯތީ މަހަލް އަދި ބޭކާސް ބާސްކެޓް ހިމެނެ އެވެ.
އެ ކުންފުނީގެ ޗެއާމަން، މުހައްމަދު އަންވަރު ވިދާޅުވި ގޮތުގައި، 'ޓީޖީއައި ފްރައިޑޭސް' އާ އެކު ރާއްޖޭގައި ބައިނަލްއަގުވާމީ ޑައިނިން އެކްސްޕީރިއަންސް އިތުރު ހަރުފަތަކަށް ގެންދެވޭނެ އެވެ.
މި ފްރެންޗައިޒް އެއްބަސްވުމުގެ ދަށުން، 'ޓީޖީއައި ފްރައިޑޭސް'ގެ ފުރަތަމަ ރެސްޓޯރަންޓްތައް ހުޅުވަން ހަމަޖެހިފައިވަނީ މާލެ ސަރަހައްދުގަ އެވެ.
އަދި އޭގެ ފަހުން، ރިސޯޓުތަކަށް މި ބްރޭންޑު ފުޅާކުރުމަށް ވަނީ އަމާޒު ހިފައިފަ އެވެ.
ތަފާތު 35 ގައުމެއްގައި 'ޓީޖީއައި ފްރައިޑޭސް'ގެ 380 އެއްހާ އައުޓްލެޓުތައް ހިންގަ އެވެ.
މި ފަހުން، 'ޓީޖީއައި ފްރައިޑޭސް'އިން ވަނީ ބައިނަލްއަގުވާމީ އިތުރު މާކެޓުތަކަށް ވިޔަފާރި ފުޅާކުރުމުގެ މަސައްކަތް ފަށައިފަ އެވެ.
މިގޮތުން، ފާއިތުވި ދެ މަހެއްހާ ދުވަހުގެ ތެރޭގައި، އުޒްބަކިސްތާނު، ޖަޕާނު، ޕެރޫ، އިންޑިއާ އަދި މެކްސިކޯގައި 100 އަށް ވުރެ ގިނަ އައުޓްލެޓު ހުޅުވަން ނިންމައިފަ އެވެ.