30 ނޮވެމްބަރ 2025 - 19:37
އިންޑިއާގައި މިދިޔަ ހަފްތާތަކުގައި މިނިކާ ކުއްތާ ހަމަލާ ދިނުމުގެ ސަބަބުން ނުވަ މީހަކު މަރުވެފައިވާ ކަމަށާއި އޭގެ ތެރޭގައި ގިނައީ ކުޑަކުދިން ކަމަށް ޖަންގަލި ބަލަހައްޓާ އިދާރާތަކުގެ އޮފިޝަލުން ބުނެފި އެވެ.
ފޮރެސްޓް ރޭންޖާސް އިން ބުނީ މިނިކާ ކުއްތާގެ ހަމަލާތައް ގިނަވެފައި ވާތީ އެސޮރުމެން ހޯދަން މިހާރު ޑްރޯން ބޭނުންކުރަން ފަށާފައިވާ ކަމަށެވެ.
ފުލުހުން ބުނި ގޮތުގައި މިނިކާ ކުއްތާގެ ހަމަލާގައި އެންމެ ފަހުން މަރުވީ އުއްތަރަ ޕްރަދޭޝްގެ އުތުރުގެ ބަހްރައިޗް ޑިސްޓްރިކްޓްގައި މިދިޔަ ހޮނިހިރު ދުވަހު 10 މަހުގެ އަންހެން ކުއްޖަކު ކަމަށެވެ. އެ ކުއްޖާއަށް ހަމަލާ ދިނީ މަންމަ ކައިރީގައި ނިދާފައި އޮއްވައި ކަމަށް ފުލުހުން ބުންޏެވެ.
މިނިކާ ކުއްތާއެއް އެ ކުއްޖާ ޖަހައިގަނެގެން ގެންދިއީ އެވެ. ކުއްޖާ ހޯދަމުން ދަނިކޮށް ފެނުނީ ހުސް ބިމެއްގައި މަރުވެފައި އޮއްވަ އެވެ.
އޭގެ އެއް ދުވަސް ކުރިން ގޭދޮށުގައި ފަސް އަހަރުގެ ކުއްޖަކު ދުވާލު ވަގުތު މަންމައާ އެކު ހުއްޓާ ޖަހައިގަނެގެން ގެންދިޔަ އެވެ. އެ ކުއްޖާ ފެނުނީ ވަރަށް ބޮޑަށް ހަމަލާދީ ޒަހަމްކޮށްލާފައި އޮއްވައި އުއްދަނޑި ދަނޑެއްގެ ތެރެއިންނެވެ. އެ ކުއްޖާ މަރުވީ ހޮސްޕިޓަލަށް ގެންދަނިކޮށެވެ.
އޮފިޝަލުން ވިދާޅުވީ އެކަހެރި އަވަށްތަކުން ސެޕްޓެމްބަރު މަހުން ފެށިގެން މިފަދަ ހާދިސާތައް ރިޕޯޓްކުރަމުން އަންނަ ކަމަށެވެ.
ބަހްރައިޗް ޑިސްޓްރިކްޓުގައި ވަނީ މިދިޔަ ތިން މަަހު، މިނިކާ ކުއްތާގެ ސަބަބުން މަރުވި މީހުންގެ އަދަދު ނުވަޔަކަށް އަރައިފަ އެވެ. މީގެ ތެރޭގައި އުމުރުން ދުވަސްވީ ދެމަފިރިއަކު ވެސް ހިމެނެ އެވެ.
ފޮރެސްޓް އޮފިސަރު ރާމް ސިންގް ޔާދަވް އޭއެފްޕީއަށް ބުނީ އެ ސަރަހައްދުގައި ޑްރޯން ބޭނުންކޮށްގެންނާއި ތަންތަނުގައި ކެމެރާ ޓްރެޕް ހަރުކޮށްގެން އަދި ހަތިޔާރާ އެކު މީހުން ބައިތިއްބައިގެން ބަލަހައްޓަން ފަށާފައިވާ ކަމަށެވެ.
"މިނިކާ ކުއްތާގެ އުޅުމަށް ބަދަލުތަކެއް އަތުވެއްޖެ ކަމަށް ބެލެވެނީ. މި ފަހުން އެސޮރުމެން ދުވާލު ވަގުތު ވެސް ނުކުމެ ހަރަކާތްތެރިވެ އެބަ އުޅޭ. މިއީ އާދަޔާ ހިލާފް ކަމެއް،" ޔަދާވް ބުންޏެވެ.
އެހެން އޮފިސަރަކު ބުނީ މި ޖަނަވާރުތައް ވަރަށް ޖެހިލުން ކުޑަ ކަމަށް މިހާރު ފާހަގަވާ ކަމަށެވެ.
ބަހްރައިޗް ޑިސްޓްރިކްޓުގައި މިދިޔަ އަހަރު ވެސް މިފަދަ ހަމަލާތަކުގައި ނުވަ މީހަކު މަރާލި އެވެ.
ބަހްރައިޗް ޑިސްޓްރިކްޓްގެ "ގްރާސްލޭންޑް" ބިންތައް ނޭޕާލްގެ ދެކުނު ބޯޑަރާ ގާތްގަނޑަކަށް 50 ކިލޯމީޓަރު (30 މޭލު) ގައި އޮންނައިރު އެއީ ހިމާލަޔަންގެ ގަސް ބޯ ޖަންގަލިތަކުން ފޮރުވިފައި އޮންނަ ހިސާބެކެވެ.
ތަޖުރިބާކާރުން ބުނަނީ މިނިކާ ކުއްތާ އިންސާނުންނަށް ހަމަލާ ދެނީ ކުދި ފުއްލާ ފަދަ، ދިފާއެއް ނެތް ޖަނަވާރު ވެސް ކާން ނުލިބި ހައިހޫނުކަން ވަރަށް ބޮޑުވުމުން އެހެން ގޮތެއް ނެތިގެން ކަމަށެވެ.
އިންޑިއާގައި އުޅޭ ކަމަށް ބެލެވޭ ތިން ހާހެއްހާ މީގެ ޖަނަވާރުގެ ތެރެއިން ގިނަ އެއްޗެހި އުޅެނީ ހިމާޔަތްކޮށްފައިވާ ސަރަހައްދުން ބޭރުގަ އެވެ. އަދި އޭގެ ތެރެއިން ގިނަ އެއްޗެހި ވެސް އުޅެނީ އިންސާނުން ދިރިއުޅޭ ސަރަހައްދުތަކާ ވަރަށް ކައިރީގަ އެވެ. -- އޭއެފްޕީ